|
Bu günlərdə Şamaxı ictimaiyyətinin, xüsusən
idmansevərlərin sevincinə səbəb olan bir hadisə baş
vermişdir. Belə ki, şamaxılıların ən sevimli
güləşçilərindən biri olan Qüdrət Tacı oğlu Məmmədyarov
"Azərbaycan Respublikasının əməkdar məşqçisi" fəxri
adına layiq görülmüşdür.
 Bildiyimiz
kimi, Şamaxı tarixən öz məşhur idmançıları ilə daim
seçilmiş, Azərbaycanımızın adını yüksəklərə
qaldırmışdır. Bu səbəbdən də yüksək yerlər tutan
idmançılarımız möhtəşəm qələbələrlə doğma yurdlarına
qayıtmışlar.
Hələ 60-cı illərdə Şamaxı şəhər C.Cəbrayılbəyli adına 5
nömrəli orta məktəbdə təhsil aldığım illərdə mənə dərs
demiş, məşhur güləşçi-müəllimlər Zakir Səmədov və Qədri
Bağıyev bizdə idmanın bir çox sahələrinə maraq yaradır,
xüsusən idmanın güləş növü üzrə əlavə məşğələlər təşkil
edir və yarışlara hazırlaşdırırdılar. Məhz belə
yarışlara hazırlaşanlar arasında yeniyetmə
istedadlılardan biri də Qüdrət Məmmədyarov xüsusilə
fərqlənərək məşqlərini müntəzəm olaraq davam etdirirdi.
Gələcəyin fəxri idmançısının ilk məşqçisi də Şamaxıda
böyük hörmət sahibi olan müəllim-məşqçi Qədri Bağıyev
olur. Daha sonra Qüdrətin gələcəyini görən uzaqgörən
idmançılar onun hazırlaşdırılmasını ən məşhur
məşqçilərdən biri olan Xankişi Hüseynova həvalə edirlər.
Bir çox turnir və yarışlarda fərqlənən gənc Qüdrət
1969-cu ildə Bakı Bədən Tərbiyəsi Texnikumuna daxil
olur və 1972-ci ildə müvəffəqiyyətlə təhsilini başa
vuraraq bədən tərbiyəsi müəllimi ixtisasına yiyələnir.
1972-ci ildə Şamaxı şəhər 1 nömrəli orta məktəbində bir
il müəllim işləyən Q.Məmmədyarov 1973-1975-ci illərdə
hərbi xidmətdə olur. Bu dövrdə ciddi məşqlərdən sonra
sərbəst güləş üzrə yarışlarda dalbadal qələbələr qazanan
gənc Qüdrət tanınmağa başlayır.
1974-cü ildə Qüdrət Məmmədyarovun sərbəst güləş üzrə
şöhrəti parlaq şəkildə özünü SSRİ Silahlı Qüvvələrinin
yarışında büruzə verir. O, bu yarışda bütün rəqiblərini
geridə qoyaraq birinci yerə çıxır.
Daha sonra 1975-ci ildə "Məhsul" Cəmiyyətinin SSRİ
birinciliyində 3-cü yeri tutan Qüdrət Məmmədyarov SSRİ
idman ustası normasını yerinə yetirərək yüksək fəxri ada
layiq görülür.
Dəfələrlə Azərbaycan çempionatlarında iştirak edən və
yüksək yerlər tutan Qüdrət Məmmədyarovun adı 70-ci
illərin məşhur Şamaxı idmançıları olan Telman Xəlilov,
Həsrət Məmmmədyarov, Qahir Mahmudov, Rövşən Hüseynov,
Adil Salahov, Bahadur Mirzəliyev, Tərlan və Elşən
Məmmədovlarla birgə çəkilir. Onu xususi olaraq qeyd edək
ki, Qudrətin qardaşı Həsrət Məmmədyarov da böyük
nailiyyətləri olan fəxri idmançılarımızdandır.
Şamaxı idmanının intibah dövrü də məhz bu idmançılarla
sırf bağlı idi.
Sözsüz ki, adını çəkdiyimiz bu idmançıların
yetişdirilməsində və həvəsləndirilməsində Xankişi
Hüseynov, Emin Ramazanov, Zakir Səmədov, Xoşsəfa İbadov,
İbrahim Zabitov, Hacıbaba Şıxıyev, Nuhbaba Şıxıyev,
Əhliman Qəhrəmanov, Əlisoltan Əmirov kimi Şamaxı güləş
ənənələrini qoruyub saxlayan və məharətlə davam etdirən
50-60-cı illərin məşhur pəhləvanlarının rolu da az
deyildir.
Özünü bütövlükdə Azərbaycanda güləşin inkişafına həsr
etməyi qarşısına məqsəd qoyan Qüdrət Məmmədyarov idman
qələbələrini başa vurduqdan sonra məşqçi-müəllim kimi
şərəfli bir yolun yolçusu olur. Məhz bu gün onun
yetirmələri arasında Azərbaycan çempionu, dünya və
Avropa miqyaslı beynəlxalq turnirlərin qalibi və
mükafatçıları da vardır.
Belə ki, hazırda Şamaxı Uşaq-Gənclər İdman Məktəbində
sərbəst güləş növü üzrə məşqçi işləyən Qüdrət
Məmmədyarov Ruslan Surxayev, Emil Qasımov, Faiq Qasımov,
Elvin Qasımov, Elşən Hüseynov, Seyid Qarayev, Mahir
Mahmudov, Əli Piriyev, Elşən Hüseynov kimi respublika
səviyyəli idmançılar yetişdirmişdir. Dəfələrlə müxtəlif
yarışlarda müvəffəqiyyətlə çıxış edən bu güləşçilər
1-3-cü yerlərə layiq görülərək idman dərəcələrini
ödəyərək müxtəlif mükafatlarla təltif olunmuşlar.
Sevindirici haldır ki, Q.Məmmədyarovun ən parlaq
yetirməsi olan Ruslan Surxayev 42-45-50 kq çəki
dərəcəsində sərbəst güləş üzrə Avropa çempionu və 2 dəfə
dünya mükafatçısıdır. Eyni zamanda o, 4 dəfə respublika
çempionudur.
Hazırda Mahir Məmmədov isə Azərbaycanın yığma
komandasının tərkibində müxtəlif beynəlxalq yarışlarda
müvəffəqiyyətlə çıxış edir.
Ömrünün 60-cı baharını yaşayan yubilyar bu gün böyük
həvəslə uğurlarını bir müəllim-məşqçi kimi həm M.Hadi
adına şəhər 9 nömrəli tam orta məktəbdə, həm də Şamaxı
Uşaq-Gənclər İdman Məktəbində davam etdirməkdədir.
Şamaxı idmanının şöhrətləndirilməsi üçün əlindən gələni
əsirgəməyən Q.Məmmədyarov 2009-cu ildə Azərbaycan
Respublikasının "Fəxri bədən tərbiyəsi və idman işçisi",
2013-cü ildə isə "Əməkdar məşqçi" fəxri adlarına layiq
görülmüşdür.
60 yaşlı sevimli yubilyarımızı, əməkdar
müəllim-məşqçimizi rayonun çoxsaylı təhsil işçiləri
adından yeni fəxri ad alması münasibəti ilə ürəkdən
təbrik edir, ona uzun ömür, möhkəm cansağlığı, gözəl
yetirmələrinə ən ali turnir və yarışlarda neçə-neçə
qələbə soraqları və arzularının çiçəklənməsi üçün xoş
günlər arzulayırıq.
Ədalət MƏMMƏDOV,
Şamaxı RTŞ-ın əməkdaşı, Azərbaycan Respublikasının
qabaqcıl təhsil işçisi |
