|
İnquşetiya Respublikasının Nazran şəhərində Rusiya
Gənclər Birliyinin, Rusiya Federasiyası Təhsil və Elm
Nazirliyinin və Azərbaycan Respublikası Gənclər və İdman
Nazirliyinin birgə dəstəyi ilə "Tələbə baharı Qafqazda"
Beynəlxalq festivalı keçirilmişdir.
Azərbaycan Tələbə Gənclər Təşkilatları İttifaqından
bildirmişlər ki, festivalın ilk günündə iştirakçı
ölkələrin təqdimatı keçirilmişdir. Təqdimatda Azərbaycan
mətbəxinin ən gözəl nümunələri, şirniyyat və eləcə də
müxtəlif əl işləri, milli xalçamız və suvenirlərimiz
nümayiş olunmuşdur. Milli rəqs və musiqilərimizin
təqdimatından sonra digər iştirakçı ölkələrə Azərbaycan
komandasının adından hədiyyələr təqdim edilmişdir.
Rusiya Federasiyasının və İnquşetiyanın dövlət və
hökumət nümayəndələrinin də iştirak etdikləri konsert 15
ölkədə canlı yayımlanmışdır. Festivalda gənclərimizin
çıxışı tamaşaçılar tərəfindən maraqla qarşılanmışdır.
Sonda təşkilatçılar tərəfindən Azərbaycan komandasına
"Tələbə baharı Qafqazda" festivalının laureat diplomları
və hədiyyələri təqdim olunmuşdur. Konsertdən sonra
İnquşetiya Respublikasının prezidenti Azərbaycan
nümayəndə heyətini qəbul edərək tələbələrimizin uğurlu
çıxışlarını xüsusi vurğulamışdır.
Rəşad ZİYADOV |
