|
 Azərbaycan
Respublikasının Təhsil Nazirliyi və Təhsil İşçiləri Azad
Həmkarlar İttifaqı Respublika Komitəsinin birgə qərarına
uyğun olaraq 2013-cü ilin aprel ayında ali məktəb
tələbələrinin bədii yaradıcılıq festivalı keçirilmişdir.
Azərbaycan xalqının ümummilli lideri Heydər Əliyevin 90
illik yubileyinə həsr olunmuş festival zamanı 15
iştirakçı ali məktəbin bədii özfəaliyyət kollektivlərinə
baxış keçirilmiş, kollektiv və tək ifaçılar arasından
qaliblər müəyyənləşdirilmişdir. İyunun 28-də Təhsil
Nazirliyində festival qaliblərinin mükafatlandırılması
mərasimi olmuşdur.
Tədbiri Təhsil Nazirliyi Tərbiyə və məktəbdənkənar
müəssisələrlə iş şöbəsinin müdiri Ağababa İbrahimov
açmışdır. Mərasimdə iştirak edən Təhsil Nazirliyi
Aparatının rəhbəri Ceyhun Bayramov festival haqqında
məlumat verərək onun Təhsil Nazirliyi və Azərbaycan
Təhsil İşçiləri Azad Həmkarlar İttifaqı Respublika
Komitəsinin birgə qərarına əsasən 2007-ci ildən etibarən
keçirildiyini və artıq ənənə halını aldığını
bildirmişdir. Qeyd etmişdir ki, festivalın məqsədi
tələbələri milli vətənpərvərlik, mədəniyyətimiz,
incəsənətimiz, milli adət və ənənələrimizə hörmət
ruhunda tərbiyə etmək, onların bədii-estetik səviyyəsini
yüksəltmək, mədəni həyat tərzinin formalaşması işinə
kömək göstərmək, eləcə də incəsənət və mədəniyyətimizin
ayrı-ayrı sahələri üzrə istedadlı gənclərin üzə
çıxarılması, qabiliyyətlərinin inkişaf etdirilməsinə
dəstək verməkdir.
 Sayca
yeddinci olan builki festivalın Azərbaycan xalqının
ümummilli lideri, müasir Azərbaycan dövlətinin banisi,
ulu öndər Heydər Əliyevin 90 illik yubileyinə həsr
olunduğu üçün xüsusi önəm kəsb etdiyini söyləyən
C.Bayramov əsasən dövlət ali təhsil müəssisələrinin,
özəl ali məktəblərdən isə yalnız Odlar Yurdu
Universitetinin iştirak etdiyi bu mədəniyyət və
incəsənət yarışmasının xalq çalğı alətləri ansamblı, xor
kollektivləri, rəqslər (milli rəqslər, müasir rəqslər,
solo rəqslər), bədii qiraət, muğam ifası, mahnılar
(vokal bəstəkar mahnıları, xalq mahnıları, müasir
mahnılar) və aşıq musiqisi nominasiyaları üzrə
keçirildiyini bildirmişdir.
Diqqətə çatdırılmışdır ki, yalnız final mərhələsinə 650
tələbənin qatıldığı festival ulu öndər Heydər Əliyevin
90 illik yubileyi ərəfəsində Gənc Tamaşaçılar Teatrında
70 tələbənin iştirakı ilə keçirilmiş qala konserti ilə
yekunlaşmışdır.
C.Bayramov bildirmişdir ki, münsiflər heyəti tərəfindən
aparılan seçim əsasında müsabiqə iştirakçılarının 13-ü
I, 12-si II, 12-si III yerə, 25 nəfər isə həvəsləndirici
yerə layiq görülmüşdür. Festivalda Azərbaycan Dövlət
Neft Akademiyasının, Azərbaycan Dövlət İqtisad
Universitetinin və Bakı Dövlət Universitetinin
kollektivlərinin yüksək nəticələr əldə etdiyini söyləyən
Aparat rəhbəri eyni zamanda Odlar Yurdu Universiteti
tələbələrinin də fərqləndiyini diqqətə çatdırmış,
növbəti illərdə bu sahədə işləri daha da
genişləndirməyin, özəl ali məktəblərin də bu işə
yaxından qoşulmasının vacibliyini vurğulamışdır.
C.Bayramov çıxışının sonunda qalibləri təbrik etmiş,
festivalın keçirilməsində əməyi olanlara minnətdarlığını
bildirmişdir.
Azərbaycan Təhsil İşçiləri Azad Həmkarlar İttifaqı
Respublika Komitəsi sədrinin müavini Şaiq Əsgərov da
mərasim iştirakçılarını salamlayaraq festivalın, xüsusən
də onun yekun tədbirinin yüksək səviyyədə keçirildiyini
bildirmiş, bu işlərdə zəhmət payı olanlara təşəkkür
etmişdir.
O, Azərbaycan Dillər Universitetinin rəhbərliyinin
festivalın təşkili və keçirilməsinə verdiyi dəstəyi
xüsusilə yüksək dəyərləndirmişdir.
Sonra qaliblərin mükafatlandırılması mərasimi olmuşdur.
I, II və III yerlərin sahiblərinə diplomlar və
hədiyyələr, həvəsləndirici yerə layiq görülənlərə isə
diplomlar təqdim edilmişdir.
Yusif ƏLİYEV |
