|
Üzeyir Hacıbəyli adına Bakı Musiqi Akademiyasında məzun
günü keçirilmişdir. Bu münasibətlə təşkil olunan
tədbirdə Bakı Musiqi Akademiyasının rektoru, professor,
xalq artisti Fərhad Bədəlbəyli, akademiyanın prorektoru
Yeganə Axundova çıxış edərək akademiyanın uzunillik
tarixi-mədəni ənənələrindən danışmışlar.
Qeyd olunmuşdur ki, Şərqdə ilk konservatoriyalardan biri
olan Bakı Musiqi Akademiyası bir əsrə yaxın şanlı tarixə
malikdir. 1921-ci ildə dahi Azərbaycan bəstəkarı,
Şərqdə ilk operanın müəllifi Üzeyir Hacıbəylinin
təşəbbüsü ilə yaradılmış Dövlət Konservatoriyası hazırda
Azərbaycanın aparıcı ali təhsil müəssisələrindən birinə
çevrilmişdir. Akademiyada beynəlxalq müsabiqələr
laureatları, tanınmış bəstəkarlar, alim və
tədqiqatçılardan ibarət professor-müəllim heyəti
çalışır. Çıxışlarda vurğulanmışdır ki, Bakı Musiqi
Akademiyasının məzunları müxtəlif xarici ölkələrdə
keçirilmiş beynəlxalq müsabiqələrdə uğurla çıxış
etmişlər. Milli və dünya musiqi ənənələrinin layiqli
təmsilçisi kimi akademiya öz fəaliyyətini bu gün yüksək
səviyyədə davam etdirir.
Çıxış edənlər daha sonra bu il Bakı Musiqi Akademiyasını
bitirən 100- dən artıq gəncə nailiyyətlər diləmiş,
onların hər zaman xoş soraqlarının gəlməsini
arzulamışlar.
Tədbir "Məzun gunü" adlı maraqlı konsert proqramı ilə
davam etmişdir.
Samirə KƏRİMOVA |
