|
İyunun 27-də Azərbaycan Dövlət Pedaqoji Kollecində məzun
günü qeyd edilmişdir. AzərTAc xəbər verir ki, mərasimdə
kollecin direktoru, filologiya elmləri doktoru,
professor Nurlana Əliyeva cari ildə bu təhsil ocağını
əyani və qiyabi şöbələr üzrə müxtəlif ixtisaslara
yiyələnmiş 750 nəfərə yaxın gəncin bitirdiyini
bildirmişdir.
Məzun günü zəngin tarixi ənənələri olan təhsil ocağının
kollektivi və məzunları üçün hesabat günüdür. Hazırda
pedaqoji kollektiv savadlı müəllim kadrları və xalqın
milli mənəvi dəyərlərinin daşıyıcısı olan vətəndaş
yetişdirməyi əsas vəzifəsi sayır.
Məzunları təbrik edən Yasamal Rayon İcra Hakimiyyətinin
başçısı İbrahim Mehdiyev ölkəmizdə mövcud uğurlu təhsil
islahatlarından, gənclərin elm və təhsillə məşğul
olmaları üçün dövlətin hərtərəfli qayğısından danışmış,
müəllim diplomu alan gənclərə uğurlar arzulamışdır.
Məzunlar dörd il oxuduqları bu qocaman təhsil ocağının
tarixindən və bu gün Azərbaycan təhsil sistemindəki
rolundan bəhs etmişlər. Onlar məhz bu kollecdə təhsil
almaları ilə fəxr etdiklərini söyləmiş, müəllimlərinə
minnətdarlıqlarını ifadə etmişlər.
Müəllim və valideynlər çıxış edərək məzunlara xoş
arzularını diləmişlər.
Tədbirdə, həmçinin təhsildə əldə etdikləri
müvəffəqiyyətlərə və kollecin ictimai həyatında
fərqləndiklərinə görə bir qrup məzuna fəxri fərmanlar
təqdim olunmuşdur.
Məzun günü tələbələrin hazırladıqları rəngarəng konsert
proqramı və bayram şənliyi ilə davam etmişdir. |
