|
İyunun 25-də Azərbaycan Dövlət İqtisad Universitetinin
(ADİU) Karyera Mərkəzində "Uğurlu karyeranı qur!" devizi
altında "karyera günü" keçirilmişdir.
ADİU-dan AzərTAc-a bildirmişlər ki, tədbir ADİU, Gənclər
və İdman Nazirliyi və VitalCV MMC-nin dəstəyi ilə təşkil
edilmişdir.
Tədbirin əsas məqsədi tələbə və magistrləri
universitetdə keçirilən karyera layihələri ilə tanış
etmək, eləcə də karyera inkişafı ilə əlaqədar
mütəxəssislər tərəfindən iştirakçılara məsləhətlərin
verilməsidir.
Tədbirdə CV-lərin tərtib edilməsi üzrə fərdi
məsləhətlərin verilməsi, "Uğurlu müsahibədən keçmə" üzrə
təlimlərin aparılması və Karyera Mərkəzinin resursları
ilə tanışlıq olmuşdur.
"Karyera günü"ndə ADİU-nun tələbələri ilə yanaşı,
Azərbaycan Texniki, Azərbaycan Dillər və Qərb
universitetlərinin, Azərbaycan Dövlət Neft Akademiyası
və Azərbaycan Turizm İnstitutunun tələbələri də iştirak
etmişlər. |
