|
İyunun 21-də Azərbaycan və Fransa Respublikaları
arasında imzalanmış dövlətlərarası sazişə əsasən təsis
edilmiş Bakı Fransız Liseyinin İdarəetmə Komitəsinin ilk
iclası keçirilmişdir.
Sazişə əsasən, komitə üzvləri Azərbaycan Respublikası
Dövlət Neft Şirkətinin (ARDNŞ), Azərbaycan Respublikası
Təhsil Nazirliyinin, Heydər Əliyev Fondunun və Fransa
Respublikasının Azərbaycandakı səfirliyinin
nümayəndələrindən təşkil olunmalıdır.
AzərTAc xəbər verir ki, iclasda liseyin İdarəetmə
Komitəsinin prezidenti - ARDNŞ-in kadr, rejim və
informasiya texnologiyaları üzrə vitse-prezidenti Xalik
Məmmədov və üzvləri tam tərkibdə iştirak etmişlər.
İdarəetmə Komitəsinin ilk toplantısında Fransa
Respublikasının Azərbaycandakı səfiri Paskal Menye
iştirak etmişdir.
Komitə üzvlərinin səlahiyyətləri müəyyənləşdirildikdən
sonra İdarəetmə Komitəsinin prezidenti Xalik Məmmədov
bildirmişdir ki, bu lisey ölkəmizdə Fransa təhsil
texnologiyalarının geniş tətbiqinə imkan verəcəkdir.
Lisey uşaq bağçasından başlayaraq 12 illik ümumi təhsil
müəssisəsində tətbiq edilən klassik fransız tədris planı
əsasında fəaliyyət göstərəcəkdir. Məzunlara Fransa
Təhsil Nazirliyinin standartlarına uyğunlaşdırılmış
attestatlar veriləcəkdir.
Fransada tanınacaq həmin attestatların alınması
məzunlara imkan verəcək ki, təhsillərini öz seçimlərinə
uyğun olaraq Avropanın ali təhsil müəssisələrində davam
etdirsinlər.
Daha sonra komitə üzvləri gündəliyə çıxarılmış
məsələlərlə bağlı fikir mübadiləsi aparmışlar.
İclasda liseyin təsisçisi Azərbaycan Beynəlxalq Təhsil
Mərkəzi ilə Fransız Dünyəvi Təhsil Missiyası arasında
imzalanacaq müqavilənin şərtləri müzakirə olunmuş,
sənədin hazırlanması üçün səylərin artırılmasına qərar
verilmişdir. Liseyə qəbul üçün qeydiyyat prosesi barədə
məlumat verilmiş və bununla bağlı marketinq işlərinin
daha da intensivləşdirilməsi qərara alınmışdır.
İclasda liseyin təhsil pillələri üzrə təhsil haqqının
səviyyəsi müəyyənləşdirilmişdir. Bildirilmişdir ki, Bakı
Fransız Liseyi 2014-2015-ci dərs ilində fəaliyyətə
başlayacaqdır. 2013-cü ilin sentyabrında isə liseydə 3
bağça qrupu və I-V siniflər fəaliyyətə başlayacaqlar. |
