|
 Bu
günlərdə Bakı Modern Məktəbinin 1A 1 sinfində "Əlifba
bayramı" keçirildi. Sinif müəllimi Sevinc Əliyevanın
köməyi ilə yüksək səviyyədə hazırladıqları tədbirdə
balacalar sanki valideynlərinə, müəllimlərinə,
dostlarına sərgüzəştlər, tədqiqatlarla dolu, çətin, eyni
zamanda çox maraqlı keçən ilk tədris ilində
öyrəndiklərinin hesabatını verdilər.
Qeyd edək ki, gənc olmasına baxmayaraq, qabaqcıl iş
təcrübəsi ilə seçilən Sevinc Əliyeva 2011-2012-ci tədris
ilində keçirilmiş "Ən yaxşı müəllim" müsabiqəsinin ən
yüksək bal toplamış qaliblərindən biridir. Onun
peşəkarlığı şagirdlərinin hazırlığından da hiss
olunurdu. Onlar yalnız şeir söyləmək və mahnı oxumaqla
kifayətlənməyərək məharətlərini əyləncəli viktorinalar,
təqdimatlar, rəqslər, bədii gimnastika nömrələri,
özlərinin yaratdıqları maraqlı səhnəciklərlə nümayiş
etdirdilər.
Uşaqlar dünyamızın bəzəyi, gözümüzün nurudur. Onların
dilində səslənənləri, saf körpə qəlblərindən gələnləri
dinləmək insana böyük zövq verir. Bu tədbirdə də iki
şagirdin vətənə aid müxtəlif şeirləri və mətni həyatla
əlaqələndirmələri qonaqların böyük marağına səbəb oldu.
Bu onu göstərir ki, respublikamızda təhsil sahəsində
görülən işlər, həyata keçirilən layihələr özünü
doğruldur, kurikulumun düzgün tətbiqi uşaqlarımızı,
gələcəyimiz olan balalarımızı yaradıcı edir. Onlar
düşünür, araşdırır, tətbiq edirlər. Bu isə çox
sevindirici haldir.
Tədbirin sonunda birinciləri Bakı Modern Məktəbinin
direktoru Gülarə Əfəndiyeva, maliyyə direktoru Gülbəniz
Dibirova, birincilərin dili ilə desək, onların
məktəbdəki qayğıkeş nənəsi Tənzifə xanım təbrik etdilər.
Gülarə Əfəndiyeva rəhbərlik etdiyi təhsil ocağında başa
çatan ilk tədris ilində ilk "Əlifba bayramı" sevincini
bu uşaqlarla yaşadığını vurğuladı. Müəllimlərinin və
valideynlərinin böyük əməyi, diqqəti və qayğısı
sayəsində şagirdlərin ağıllı, savadlı, vətənini, ana
dilini sevən əsl vətənpərvərlər kimi böyüyəcəyinə əmin
olduğunu deyən direktor onlara qarşıdakı təhsil
illərində böyük uğurlar, şəxsi həyatlarında sevinc və
xoşbəxtlik arzuladı. Sonra birincilərə diplomlar təqdim
olundu. 1A1 sinfinin 12 şagirdindən 7-si müvəffəqiyyət
(əlaçı), 5 nəfəri isə uğur diplomları ilə təltif
edildi.
Hicran ƏKBƏROVA |
