|
 Məlumdur
ki, Azərbaycan Respublikasının Prezidenti cənab İlham
Əliyevin sərəncamı ilə 2013-cü il ölkəmizdə "İKT ili"
elan olunmuşdur. "İKT ili" ilə bağlı tədbirlər və
imtahan semestrinin keçirilməsi ilə əlaqədar Astara
Pedaqoji Kollecinin direktoru, fəlsəfə doktoru, əməkdar
müəllim, dosent Əlihəsən Həmzəyevin fikirlərini
öyrəndik:
- Astara Pedaqoji Kollecində "İKT ili" ilə bağlı mühüm
işlər həyata keçirilir. İlk əvvəl qeyd etməliyəm ki,
mənim təşəbbüsümlə may ayının əvvəlində Rusiya, Türkiyə,
Hindistan, Özbəkistandan gəlmiş tanınmış alimlərin və
Azərbaycanın görkəmli elm xadimlərinin iştirakı ilə
xalqımızın ümummilli lideri Heydər Əliyevin 90 illik
yubileyinə həsr olunan "İnformasiya-kommunikasiya
texnologiyaları və qloballaşma" mövzusunda beynəlxalq
konfrans keçirildi.
Bu yaxınlarda kollecdə Azərbaycan Respublikası Gənclər
Təşkilatları Milli Şurası (ARGTMŞ), Astara Rayon Gənclər
və İdman İdarəsi "Astara" İntellektual İnkişaf Klubu ilə
birgə sosial şəbəkələrdən istifadəyə həsr olunmuş
maarifləndirici təlim təşkil olunmuşdur. Tədbir Gənclər
və İdman Nazirliyinin dəstəyi ilə Gənclər Təşkilatları
Milli Şurasının keçirdiyi "Xətdə ol" Sosial Şəbəkə
Akademiyası layihəsinin rayon və şəhərlərdə təşkil
olunan silsilə təlimləri çərçivəsində baş tutmuşdur.
Layihənin məqsədi region gənclərinin informasiya
texnologiyaları sahəsinə marağının artırılması və sosial
şəbəkələrdən düzgün istifadəsinə zəmin hazırlanmasıdır.
Tədbirdə "Mənim virtual dünyam", "Xətdə Facebook",
"Xətdə Twitter", "Xətdə Bloq", "Xətdə Youtube"
mövzularında gənclərə geniş məlumat verilmişdir. Təlim
zamanı videoçarxlardan istifadə edilmiş, əyani vəsait
olaraq CD diskləri və kitabçalar gənclərə paylanmışdır.
Təlimin yekununda layihənin qiymətləndirilməsi, irad və
təkliflərin qeyd olunması məqsədilə tədbir iştirakçıları
tərəfindən sorğu anketləri doldurulmuşdur.
Kollecdə yay imtahan sessiyasında şəffaflığı təmin etmək
məqsədilə imtahanlar yeni qaydalar əsasında kompüterlə
aparılır. İmtahanların obyektiv və şəffaf şəraitdə
keçməsi üçün "İmtahan qərargahı" yaradılmışdır. Bundan
əlavə, şöbələr üzrə münaqişə komissiyaları fəaliyyət
göstərir. Təkmilləşdirilmiş sistem əsasında təşkil
olunan imtahanlarda gün ərzində 50-55 tələbə iştirak
edir. İmtahanları yüksək səviyyədə təşkil etmək üçün
kollecin tədris binasında 2 imtahan kompüter zalı
yaradılmış və ümumilikdə 50 son model kompüter
qoyulmuşdur. İmtahanda tələbələrə təqdim edilən suallar
4 variantda tərtib olunmuşdur. İmtahanın gedişi kollec
rəhbərliyi tərəfindən veb-kamera vasitəsilə izlənilir.
Yeni qayda ilə keçirilən imtahanlarda ümumilikdə ibtidai
sinif müəllimliyi, məktəbəqədər təlim və tərbiyə,
informatika müəllimliyi ixtisaslarının I-II kursları
üzrə 500-ə yaxın tələbə iştirak edir. Kurslar üzrə
imtahanlarda nəzarətçi qismində laborantlar iştirak
edir. Hər bir fənn üçün tələbəyə kompüter vasitəsilə 50
test tapşırığı və 1 saat vaxt verilir. Proses başa çatan
anda tələbənin topladığı bal, düzgün və səhv cavabların
sayı, qiymələndirmə faizi ekranda göstərilir və tələbə
aldığı qiyməti dərhal bilir. Qiymətləndirmə kredit
sisteminə uyğun olaraq çoxballı sistem əsasında
aparılır. Tələbə imtahanda 0-50 bal arası bal toplaya
bilər. İmtahanlarda fənlər üzrə təqdim edilən bütün
suallar bir ay əvvəldən tələbələrə paylanılmışdır.
İmtahana giriş zamanı mobil telefon, əl çantası,
konspekt və digər yardımçı vasitələr tələbələrdən alınır
və ayrıca otaqda saxlanılır. İmtahan bitdikdən sonra
həmin əşyalar tələbələrə qaytarılır. Bu sistem tətbiq
olunandan sonra tələbələrdə intizam və məsuliyyət hissi
xeyli artmışdır. Əksər tələbələr kompüterlə imtahan
verilməsini yüksək qiymətləndirir və razılıqlarını
bildirirlər. Valideynləri imtahanlara cəlb etmək
istiqamətində də iş aparılır. İmtahanda iştirak edən
valideynlər yaradılan şəraitə görə kollec rəhbərliyinə
minnətdarlıqlarını ifadə edirlər.
Ə.Həmzəyev demişdir ki, ölkəmizdə gənclərin müasir
biliklərə və informasiya-kommunikasiya texnologiyalarına
tam surətdə mükəmməl yiyələnməsi üçün hər cür şərait
yaradılır. Azərbaycan Respublikasının Prezidenti cənab
İlham Əliyev təhsili inkişaf etdirmək məqsədi ilə
demişdir: "İnkişaf etmiş ölkələrin təcrübəsinə nəzər
salsaq görərik ki, o ölkələr inkişaf edib ki, orada
təhsil yüksək səviyyədədir. Dünyada gedən tərəqqinin
əsas əlaməti də bilik, savaddır. Ona görə Azərbaycanda
yeni gənc nəslin yetişdirilməsi və tərbiyə olunmasında
təhsilin çox böyük əhəmiyyəti var".
Biz təhsil işçiləri qarşımızda duran vəzifələri
layiqincə yetinə yetirmək və keyfiyyətli pedaqoji kadr
hazırlığı işində uğur əldə etməkdən ötrü əlimizdən
gələni edəcəyik.
Azad ABDULLAYEV |
