|
 Naxçıvan
Dövlət Universitetində məzun günü keçirilmişdir. Əvvəlcə
məzunların bu ali təhsil ocağı ilə bağlı xatirələrini
əks etdirən "Universitet dünyası" adlı slayd nümayiş
olunmuşdur.
NDU-nun rektoru, biologiya elmləri doktoru, dosent Saleh
Məhərrəmov çıxış edərək gənclərə şərəfli tələbə adını
daim uca tutmağı arzulamış, məzunlarla bağlı ürək
sözlərini tədbir iştirakçılarının diqqətinə çatdırmışdır.
Rektor məzunlara bu bilik xəzinəsində yiyələndikləri
sərvəti daim qoruyub saxlamağı və gələcəkdə milli elmin,
təhsilin, dövlətçilik və azərbaycançılıq ideyalarının
inkişafına layiqli töhfələr verməyi diləmişdir.
Magistr pilləsinin məzunu, universitetin gənclər
təşkilatının sədri Arzu Abdullayev çıxış edərək
sevincini paylaşmış, təhsil müddətində qazandığı
biliklərdən, əldə etdiyi nailiyyətlərdən söz açmışdır.
Üçüncü dəfədir ki, məzun həyəcanını yaşadığını qeyd
etmişdir: "Çox sevinirəm ki, ümummilli liderimiz, dahi
şəxsiyyət Heydər Əliyevin və hazırda ulu öndərin siyasi
kursunu uğurla davam etdirən Prezidentimiz İlham
Əliyevin daim diqqət və nəzərdə saxladığı, yüksək
fikirlər söylədiyi Naxçıvan Dövlət Universitetinin
məzunuyam. Azərbaycan gəncliyinə göstərilən dövlət
qayğısına bu universitetdə oxuduğum illərdə şahid
olmuşam". Arzu Abdullayev məzunları bundan sonra da
çalışacaqları sahədə ölkəmizin adını uca tutmağa və
dövlətimizin, xalqımızın, millətimizin inkişafı,
yüksəlişi yolunda irəli getməyə çağırmışdır.
Tarix-filologiya fakültəsinin dekanı, filologiya üzrə
fəlsəfə doktoru, dosent İman Cəfərli çıxış edərək
məzunlara uğurlar arzulamışdır.
Xarici tələbələrin də məzun olduqları tədbirdə
universitetin istedadlı tələbələrinin və Tələbə Teatr
Studiyasının rəqs qrupunun ifalarında musiqi və rəqs
nömrələri təqdim olunmuş, "Karvan" şən və hazırcavablar
klubu üzvlərinin zarafatları isə iştirakçılarda xoş
əhvali-ruhiyyə yaratmışdır.
Mina QASIMOVA,
NDU-nun Mətbuat
şöbəsinin əməkdaşı |
