|
İyunun 13-də Azərbaycanın Türkiyədəki səfirliyinin,
Azərbaycan Respublikası Dövlət Neft Şirkətinin (ARDNŞ),
Azərbaycan Təhsil, Mədəniyyət və Həmrəylik Dərnəyi
(AZEDER) və "Palmali" Şirkətlər Qrupunun dəstəyi ilə
2013-cü ildə Türkiyənin ali təhsil ocaqlarında təhsilini
müvəffəqiyyətlə başa vurmuş 400-ə yaxın məzun üçün
tədbir təşkil olunmuşdur.
Səfirlikdən AzərTAc-a bildirmişlər ki, Türkiyənin
müxtəlif şəhərlərindən Ankaraya toplaşan məzunlar
ümummilli liderimizin adını daşıyan parkda ulu öndər
Heydər Əliyevin abidəsi önünə əklil qoymuşlar.
Ümummilli liderimizin və şəhidlərimizin əziz xatirəsi
bir dəqiqəlik sükutla yad edildikdən sonra Azərbaycanın
Dövlət himni səsləndirilmişdir.
Məzunlar Vətənə xidmət andını içmişlər.
Sonra səfirlikdə davam etdirilən tədbirdə Türkiyənin Ali
Təhsil Şurasının (YÖK) sədri Gökhan Çetinsaya, Türk
Əməkdaşlıq və İnkişaf Agentliyinin (TİKA) sədri Serdar
Çam, TÜRKSOY-un baş katibinin müavini Fırat Purtaş,
ARDNŞ-in vitse-prezidenti Samir Kərimli, Türkiyənin
təhsil nazirinin müavini Zübeyir Yılmaz, Ankaranın
Etimesqut rayon bələdiyyəsinin başçısı Ənvər Dəmirəl,
ali məktəblərin rektorları, Türkiyə Böyük Millət
Məclisinin deputatları, elm adamları, ictimai xadimlər,
diaspor nümayəndələri, Ankarada akkreditə olunmuş
diplomatik nümayəndəliklərin rəhbərləri və təmsilçiləri,
eləcə də KİV nümayəndələri iştirak etmişlər.
Tədbirdə çıxış edənlər iki qardaş ölkə arasında
əlaqələrin daha da inkişafında və möhkəmlənməsində
gənclərin, xüsusilə də tələbələrin rolunu xüsusi qeyd
etmişlər.
Səfirliyin təhsil müşaviri Nəcibə Nəsibovanın çıxışı
zamanı yeni məzunlarımıza örnək göstərilməsi məqsədilə
Türkiyə universitetlərini bitirmiş və çalışdıqları
müxtəlif sahələrdə böyük müvəffəqiyyətlərə imza atmış
Bakıdakı Mərkəzi Klinik Xəstəxananın baş həkimi Kamran
Musayev, "Santex" şirkətinin prezidenti Samir Cəfərov,
turizm şirkətinin prezidenti Mahir Əhmədov tədbir
iştirakçılarına təqdim olunmuşlar.
Sonra universiteti fərqlənmə diplomu ilə bitirən
məzunlarımıza hədiyyələr təqdim olunmuş, həmyerlimiz
Cavid Təbrizli Azərbaycan xalq mahnılarını ifa etmiş,
qonaqlara ziyafət verilmişdir.
Azərbaycanlı məzunlar Mustafa Kamal Atatürkün
mavzoleyini ziyarət etmiş, məzarı önünə əklil qoymuş və
xatirə dəftərinə ürək sözlərini yazmışlar.
Daha sonra məzunlar Ankaranın Keçiören rayonunda inşa
olunan Azərbaycan Meydanı və Xocalı Soyqırımı Abidəsinə
baş çəkmişlər. Xocalı Soyqırımı Abidəsi önünə əklil
qoyulduqdan sonra parkda məzuniyyət tortu kəsilmişdir.
Məzunlarımız tədbirin son hissəsini "Kent Otel"
mehmanxanasında ziyafət və şənliklə qeyd etmişlər.
Burada da tələbələrimizə hədiyyələr təqdim olunmuş,
Azərbaycanın xalq və bəstəkar mahnıları iştirakçılara
gözəl anlar yaşatmışdır. |
