|
 Mayın
31-də paytaxtın Xətai rayonunda yerləşən Heydər Əliyev
adına liseydə "Son zəng" mərasimi keçirilmişdir.
Tədbirdə liseyin müəllim-şagird kollektivi ilə yanaşı,
Xətai Rayon İcra Hakimiyyətinin başçısı Razim Məmmədov,
ziyalılar, valideynlər və digər qonaqlar iştirak
etmişlər.
Öncə iştirakçılar liseyin qarşısında ucaldılmış
ümummilli lider Heydər Əliyevin büstünü ziyarət edərək
önünə gül dəstələri qoymuşlar. Sonra Azərbaycan
Respublikasının Dövlət himninin sədaları altında
üçrəngli Dövlət bayrağımız səhnəyə gətirilmişdir.
Tədbiri giriş sözü ilə açan liseyin direktoru, əməkdar
müəllim Fikrət Xəlilov məzunları təbrik edərək onlara
gələcək həyatlarında uğurlar arzulamışdır. Bildirmişdir
ki, bu gün ölkəmizin hər yerində olduğu kimi, adı
Azərbaycan xalqının tarixinə qızıl hərflərlə yazılmış
ümummilli liderimiz Heydər Əliyevin adını daşıyan bu
möhtəşəm təhsil ocağında da bayram əhvali-ruhiyyəsi
vardır. F.Xəlilov qeyd etmişdir ki, lisey 110 məzununu
Azərbaycan cəmiyyətinə yola salır. Liseyin məzunlarının
qəbul imtahanlarında hər il yüksək nəticələr
göstərdiyini nəzərə çatdıran F.Xəlilov həmin
göstəricinin bu il daha da yüksək olacağına ümid
bəslədiyini bildirmişdir. Qeyd etmişdir ki, hər il
olduğu kimi, 2012-2013-cü tədris ilində də liseyin
şagirdləri fənn olimpiadalarının şəhər və respublika
turunda uğurlu nəticələr əldə edərək yüksək yerlər
tutmuşlar. Dünya azərbaycanlıları tərəfindən böyük
sevinclə qeyd olunan ümummilli liderimiz Heydər Əliyevin
anadan olmasının 90 illiyi münasibətilə keçirilən "Gül
bayramı"nda liseyin kollektivi də fəal iştirak etmişdir.
Nümayiş etdirilən eksponatlara baxış zamanı liseyin
şagirdi İsmayıl Əvəzovun yağlı boya ilə çəkdiyi
"Qızılgül" rəsm işi III yerə layiq görülmüşdür. Bundan
başqa, ulu öndər Heydər Əliyevin anadan olmasının 90
illik yubileyi ilə əlaqədar Təhsil, Rabitə və
İnformasiya Texnologiyaları nazirlikləri və Heydər
Əliyev Fondunun birgə keçirdiyi "Heydər Əliyev
məktəblilərin gözü ilə" adlı inşa yazı müsabiqəsinin
respublika turunda liseyin IX sinif şagirdi Fidan
Rəhimli III yeri tutmuş və müsabiqənin qalibi olaraq
noutbukla mükafatlandırılmışdır. Bundan başqa, liseyin
şagirdlərinin bir çox müsabiqə və yarışlarda uğurla
çıxış etdiyini bildirən F.Xəlilov liseyin hər bir
məzununa təhsil aldıqları liseyin adını şərəflə daşımağı
və gələcəkdə ölkəmiz üçün layiqli vətəndaş - bacarıqlı
mütəxəssis olmağı tövsiyə etmişdir.
Tədbirdə çıxış edən Xətai Rayon İcra Hakimiyyətinin
başçısı Razim Məmmədov əlamətdar gün münasibətilə
məzunları təbrik etmişdir. Bildirmişdir ki,
respublikamızın nümunəvi məktəblərindən olan liseyin
uğurları hamı kimi məni də sevindirir. Dövlət tərəfindən
təhsilə göstərilən diqqət və qayğıdan söz açan
R.Məmmədov möhtərəm Prezidentimiz İlham Əliyevin
rəhbərliyi altında ölkədə aparılan islahatları yüksək
qiymətləndirərək məzunlara bu imkanlardan maksimum
dərəcədə faydalanmağı tövsiyə etmişdir. Bu günün
təkrarolunmaz bir gün olduğunu nəzərə çatdıran icra
başçısı məzunlara vətənə, millətə sədaqətlə xidmət
etməyi tövsiyə etmişdir.
Mərasimdə məktəbin müəllimləri, şagirdlər çıxış edərək
xoş arzularını bildirmişlər.
Sonra birincilər onbirinciləri şeir, mahnı və rəqslərlə
təbrik etmişlər. Onbirincilər məktəbin rəmzi açarını
onunculara təqdim etdikdən sonra "son zəng" çalınmışdır.
Niyazi RƏHİMOV |
