|
Bakı şəhəri 257 nömrəli tam orta məktəbdə Azərbaycan
Xalq Cümhuriyyətinin yaranmasının 95 illiyi
münasibətilə VIII "a" sinif şagirdlərinin iştirakı
ilə tədbir keçirilmişdir.
Üzeyir Hacıbəylinin "Koroğlu" operasının uvertürasının
sədaları altında üçrəngli Dövlət bayrağı səhnəyə
gətirilmişdir. Dövlət himni səsləndirilmişdir. Bayram
tədbiri ulu öndər Heydər Əliyevin təhsillə, vətənimizin
müstəqilliyi, gənclərə vətənpərvərlik hissinin
aşılanması ilə bağlı söylədiyi müdrik kəlamların
səsləndirilməsi ilə başlamışdır.
Tədbirin aparıcıları olan şagirdlər Azərbaycan Xalq
Cümhuriyyətinin yaranması, müstəqilliyimizin əldə
olunduğu tarixi şərait, AXC-nin fəaliyyəti, onun qəbul
etdiyi dövlət bayrağı, himni haqqında geniş məlumat
vermişlər.
Məktəbin direktoru Qarat Qaratov iştirakçıları bu tarixi
gün münasibəti ilə təbrik etmişdir. O, iştirakçılara
Respublika Gününün yaranması və mühüm tarixi
əhəmiyyətindən danışmışdır. Müstəqil Azərbaycan
dövlətinin yaranması və inkişafında misilsiz xidməti
olan ümummilli lider Heydər Əliyevin dövlətçilik
ənənələrindən söz açan direktor bu siyasi kursun
cənab Prezidentimiz İlham Əliyev tərəfindən uğurla davam
etdirildiyini qeyd etmişdir.
Tədbirin aparıcıları bildirmişlər ki, ulu öndər Heydər
Əliyev respublikamızda yenidən hakimiyyətə qayıtdıqdan
sonra xalqımızın rifah halının yüksəldilməsi, ölkəmizin
gücləndirilməsi, iqtisadiyyatımızın, elmimizin,
mədəniyyətimizin inkişaf etdirilməsi və milli
maraqlarımızın qorunması üçün bütün varlığı ilə
çalışmışdır.
Şagirdlər məktəbdə onlara vətənpərvərlik ruhunun çox
möhkəm şəkildə aşılandığını bir daha öz çıxışları ilə
sübut etmişlər. Onlar vətənimizin gözəlliklərinə,
dilimizə, qəhrəmanlarımıza, ümummilli lider və cənab
Prezidentimizə həsr olunmuş şeirlər söyləmiş və
mahnılar ifa etmişlər. Ulu öndərimizin və dövlət
başçımızın fəaliyyəti ilə bağlı slaydlar nümayiş
olunmuşdur.
Tədbirdə fəal iştirakları ilə fərqlənən şagirdlərdən
Fidan Həşimli, Fərid Abdullayev, Nərmin Ağasıyeva,
Elnar Alməmmədov, Səmayə Aşurova, Valeh Oruclu, Vasif
Əliyev, Fəridə Əliyeva və Şəhla Qurbanova məktəb
rəhbərliyi tərəfindən diplomla mükafatlandırılmışdır.
Tədbirin sonunda məktəb rəhbərliyi, Xətai RİH-in
nümayəndələri və qonaqlar yüksək səviyyəli bu işin
təşkilinə görə məktəbin təlim-tərbiyə işləri üzrə
direktor müavini Şəhla Xəlilovaya öz təşəkkürlərini
bildirmişlər.
Rəşad ZİYADOV |
