|
Bakının Sabunçu rayonundakı 108 nömrəli tam orta
məktəbdə ulu öndər Heydər Əliyevin 90, Azərbaycan Xalq
Cümhuriyyətinin 95 illik yubileylərinə həsr olunmuş
geniş tədbir keçirilmişdir. Əvvəlcə qonaqlar məktəbin
Azərbaycan dili və ədəbiyyat müəllimi Rəna
Süleymanovanın X "a" sinfində "Heydər Əliyev və
Azərbaycan" mövzusunda hazırladığı "açıq dərs"i
dinləmişlər. Dərsdə ümummilli lider Heydər Əliyevin
keçdiyi zəngin həyat yolu, Azərbaycana rəhbərlik etdiyi
dövrlər ardıcıllıqla təhlil edilmiş, Azərbaycan
ədəbiyyatı və dili haqqında söylədiyi yüksək fikirləri,
təhsilimizin inkişafındakı xidmətləri qeyd olunmuşdur.
Şagirdlərdən Elmir Heydərov, Tubu Əliyeva, Məsməxanım
Nəcəfova, Aynur Əliyeva, Sara Babayeva və başqaları
çıxışlarında xalqımızın böyük oğlu Heydər Əliyevin
gələcək nəsillərə örnək olacaq həyatının müxtəlif
məqamlarına toxunmuşlar, şeir nümunələri söyləmişlər.
Daha sonra yubiley mərasimi II "a" sinfinin rəhbəri
Xırdaxanım Kazımovanın təşkilatçılığı və məktəbin uşaq
birliyinin rəhbəri İlahə Məlikovanın köməkliyi ilə
hazırlanan ədəbi-bədii kompozisiya ilə davam etmişdir.
Azərbaycanı məhv olmaq təhlükəsindən qurtarmış,
müstəqilliyimizin möhkəmləndirilməsində misilsiz
xidmətlər göstərmiş ulu öndər Heydər Əliyevin digər
sahələrlə yanaşı, elm və təhsilin inkişafına da xüsusi
diqqət yetirdiyi vurğulanmışdır. Əgər 1918-ci il mayın
28-də ilk dəfə əldə etdiyimiz müstəqillik cəmi 23 ay
davam etdisə, Heydər Əliyevin qurduğu müstəqil
dövlətimiz 22-ci ilini yaşayır. Dahi rəhbərin əsasını
qoyduğu Azərbaycan bu gün daha da inkişaf edir.
Çıxışlarda o da vurğulanmışdır ki, ölkəmiz Prezident
İlham Əliyevin rəhbərliyi ilə yeni-yeni uğurlara imza
atmaqdadır.
Şagirdlərin ifa etdikləri mahnılar, Vətənimiz-Azərbaycan
haqqında səsləndirdikləri şeirlər, Əsgər, Məryəm, Emin,
Şükran, Kamil, Xuramanın və digər kiçikyaşlıların
nümayiş etdirdikləri rəngarəng rəqslər qonaqlar
tərəfindən alqışlarla qarşılanmışdır.
Ədəbi-bədii kompozisiyanın sonunda Heydər Əliyevin öz
kövrək, həyəcanlı səsi ilə söylədiyi Səməd Vurğunun
"Azərbaycan" şeirindən bir parça və Ağadadaş Ağayevin
ifasında "Heydər xalqım deyəcək, xalq Heydər söyləyəcək"
mahnısı səsləndirilmişdir.
Tədbirin sonunda məktəbin direktoru Narınc Mehdiyeva
mərasimdə iştirak edən bütün qonaqlara minnətdarlığını
bildirmiş, Heydər Əliyev irsinin məktəblərdə daha
dərindən öyrənilməsinin vacibliyindən danışmışdır. O,
bunu şagirdlərin gələcək həyat yolunun uğurlu olmasını
şərtləndirən əsas amil kimi qiymətləndirmiş və
ədəbi-bədii kompozisiyanın iştirakçılarına xatirə
hədiyyələri təqdim etmişdir.
Bakı Şəhəri üzrə Təhsil İdarəsi Metodik Mərkəzinin
Sabunçu-Xəzər bölməsinin müdiri Alı Məmmədov tədbirə
yekun vuraraq qeyd etmişdir ki, bugünkü tədbir iki
böyük bayramı özündə birləşdirir. Həm ümummilli lider
Heydər Əliyevin anadan olmasının 90 illik yubileyi, həm
də 28 May - Respublika Günü şagirdlərin ifasında gözəl
ümumiləşdirilmişdir. Tədbirin yüksək səviyyədə keçdiyini
bildirən A.Məmmədov pedaqoji kollektivə gələcək
fəaliyyətlərində uğurlar, şagirdlərə isə elmin sirlərinə
daha dərindən yiyələnmələrini arzulamışdır.
Samirə DADAŞOVA,
Bakıdakı 108 nömrəli tam orta məktəbin Azərbaycan dili
və ədəbiyyat müəllimi |
