|
Masallı rayonu C.Kazımov adına Qodman kənd tam orta
məktəbində Azərbaycanın görkəmli ədəbiyyatşünas alimi,
tanınmış maarifpərvər, ictimai xadim, publisist, yazıçı
və tərcüməçi Firudin bəy Köçərlinin anadan olması ilə
əlaqədar "dəyirmi masa" keçirilmişdir.
Müəllim və şagirdlərimiz F.Köçərlinin keçdiyi ömür
yolundan, yaradıcılığından danışdılar. Yuxarı sinif
şagirdləri Firudin bəy Köçərlinin "Azərbaycan
ədəbiyyatı" əsəri, "Balalara hədiyyə" kitabı haqqında
fikir mübadiləsi etdilər. "Balalara hədiyyə" dərsliyində
alimin topladığı xalq nümunələrindən parçalar
söylənildi. "Azərbaycan ədəbiyyatı" əsərində yer alan
Fizulinin, Nizaminin, Vaqifin yaradıcılığı ilə bağlı
bəzi fikirləri qeyd edildi.
"Dəyirmi masa"da vurğulanmışdır ki, F.Köçərli eyni
zamanda tərcüməçilik fəaliyyəti ilə də məşğul olmuşdur.
O, A.S.Puşkin, M.Y.Lermontov, A.B.Tolstoy və
A.A.Seretelinin bəzi əsərlərini Azərbaycan dilinə,
M.F.Axundzadənin "Aldanmış kəvakib" əsərini isə rus
dilinə tərcümə etmişdir. Şagirdlər bəzi tərcümə
əsərlərindən parçalar söyləmişlər. Müəllimlərdən Sərvər
Mürşüdov F.Köçərlinin publisistika sahəsindəki
fəaliyyətindən, onun "Ana dili", "Müəllimlərimiz və
onların halı" məqalələrindən danışdı. Publisistik
məqalələrinin mövzularının bu gün də gündəmdə olduğu
vurğulandı.
Çıxışlarda vurğulanmışdır ki, görkəmli ədəbiyyatşünas
alim, publisist, tənqidçi və pedaqoq Firudin bəy
Köçərlinin elmi fəaliyyəti Azərbaycan tarixinin
səhifələrində ən önəmli yerlərdən birini tutur.
Pərvanə HƏŞİMOVA,
Masallı rayonu, Qodman kənd tam orta məktəbinin
dil-ədəbiyyat müəllimi |
