|
Bakıdakı 292 nömrəli tam orta məktəbdə I "a" sinfinin
müəllimi Cəmilə Abdullayevanın təşkilatçılığı ilə
"Əlifba bayramı" mövzusunda tədbir keçirilmişdir.
Məktəbin direktoru Təranə Qasımova tədbirin
əhəmiyyətindən danışaraq bildirmişdir ki, ömrümüzün ən
maraqlı, xatirəyə çevrilən anları məhz uşaqlıq
illəridir. Biz birincilərin balaca, lakin öz
xəyallarında uydurduqları zəngin dünyalarına səyahət
etməyi bacarmalıyıq. Bunun üçün, ilk növbədə, onlarla
təmasda olmaq gərəkdir.
Sonra söz birincilərə verilmişdir. Şagirdlər
müəllimlərinin çəkdiyi zəhməti yüksək
qiymətləndirmişlər. Bildirmişlər ki, müəllimimizin
zəhməti sayəsində əlifba bizə çox şey öyrətdi. Bizə
yazmağı, oxumağı, düşünməyi, vətənimizə, bayrağımıza,
gerbimizə, himnimizə məhəbbəti aşıladı. Bütün bunlara
görə sevimli müəllimlərimizə minnətdarıq.
Sonra şagirdlər əlifba sırası ilə bir-bir vətənə,
müstəqil Azərbaycana, məktəbə, müəllimə aid şeir
söyləmiş, rəqs etmiş və ədəbi-bədii kompozisiya
göstərmişlər.
Tədbirdə iştirak edən valideynlər, təlim-tərbiyə işləri
üzrə direktor müavini Afaq Həmidova, tərbiyə işləri üzrə
müavin Məlahət Kərimova da çıxış edərək demişlər ki,
müəllim peşəsi bütün zamanlarda ən çətin peşələrdən
sayılmışdır. Lakin onların arasında sinif müəlliminin
işi isə daha ciddi məsuliyyət tələb edir. Çünki
birincilərə ilk hərfi, əlifbanı öyrədən birinci sinif
müəllimidir.
Sonda birincilər müəllimləri ilə xatirə şəkli də
çəkdirmişlər.
Şakir CƏFƏROV |
