|
Mayın 22-də Azərbaycan Respublikasının təhsil naziri
Mikayıl Cabbarov ölkəmizdə səfərdə olan Türkiyə
Respublikasının milli təhsil naziri Nabi Avçının
rəhbərlik etdiyi nümayəndə heyəti ilə görüşmüşdür. Sonra
hər iki nazirin birgə mətbuat konfransı keçirilmişdir.
Azərbaycan Respublikasının təhsil naziri Mikayıl
Cabbarov ölkəmizlə qardaş Türkiyə arasında təhsil
sahəsində təşəkkül tapmış əlaqələrin inkişaf
etdirilməsinin zəruriliyi haqqında fikirlərini
bildirmişdir. Nazir Türkiyənin milli təhsil naziri Nabi
Avçının rəhbərlik etdiyi nümayəndə heyətinin Azərbaycana
səfərinin əhəmiyyətini qeyd etmişdir. Türkiyənin milli
təhsil naziri Nabi Avçının rəhbərlik etdiyi nümayəndə
heyəti ilə keçirilmiş görüşdən söz açan təhsil naziri
Mikayıl Cabbarov müzakirələr zamanı qarşılıqlı təcrübə
mübadiləsinə davam edilməsinin və konkret layihələrin
həyata keçirilməsinin səmərəli olacağına inam ifadə
edildiyini bildirmiş, əməkdaşlığın daha da
genişləndirilməsi məsələləri ətrafında fikir
mübadiləsinin aparıldığı, görüşlə bağlı birgə bəyanat
qəbul olunduğu barədə məlumat vermişdir.
Nazir görüş zamanı habelə təhsil sahəsindəki əlaqələrin
institusional strukturunu daha da gücləndirmək məqsədi
ilə "Təhsil sahəsində əməkdaşlıq haqqında Saziş" üzrə
danışıqlar prosesinin sürətləndirilməsi istiqamətində
razılığa gəldiklərini diqqətə çatdırmışdır.
Təhsil naziri Mikayıl Cabbarov təhsil sahəsindəki
əlaqələrin daha da inkişafına verdiyi dəyərə görə Nabi
Avçıya təşəkkürünü bildirərək qeyd etmişdir ki,
xalqlarımızın doğmalığı ölkələrimiz arasında
münasibətlərin hərtərəfli inkişafına zəmin yaradır.
Türkiyənin milli təhsil naziri Nabi Avçı səmimi qəbula
görə Azərbaycan Respublikasının təhsil naziri Mikayıl
Cabbarova minnətdarlığını bildirmiş və Azərbaycanda
olmaqdan məmnunluğunu ifadə etmişdir. Qonaq
Azərbaycan-Türkiyə təhsil əlaqələrinin inkişaf
perspektivləri ilə bağlı fikirlərini söyləmiş,
ölkələrimiz arasında təhsil sahəsində təcrübə mübadiləsi
istiqamətində bir sıra əhəmiyyətli addımlar atılmasının
vacibliyini nəzərə çatdırmışdır.
Daha sonra təhsil nazirləri media nümayəndələrini
maraqlandıran sualları cavablandırmışlar.
Y.ƏLİYEV |
