|
Mirzə Ələkbər Sabir Fondu "Azərbaycan ədəbi dilinin
tətbiqi qüsurlarının monitorinqi" layihəsinin
təqdimatını keçirmişdir. Tədbirdə ekspertlər, QHT və
KİV-lərin nümayəndələri iştirak etmişlər.
Tədbiri giriş sözü ilə fondun prezidenti, BDU-nun
dosenti Sevda Tahirli açaraq bildirmişdir ki, layihə
2013-cü ilin aprelindən etibarən Azərbaycan
Respublikasının Prezidenti yanında Qeyri-Hökumət
Təşkilatlarına Dövlət Dəstəyi Şurasının maliyyə dəstəyi
ilə həyata keçirilir.
Layihənin əsas məqsədi dil haqqında Konstitusiya
Qanununun tələbindən irəli gələrək, geniş ictimai
kütlələr arasında dillə bağlı bilik və təsəvvürləri
düzgün formalaşdırmağa borclu olan mənbələrdə sistematik
yol verilən qüsurların monitorinqi, ortaya çıxan
situasiyaların sistemləşdirilməsi və təhlili, alınmış
nəticəni ictimaiyyətin diqqətini cəlb etməklə, ölkənin
ədəbi dil qurumları və dilin təmizliyinə məsul digər
təşkilatların iştirakı ilə geniş müzakirələr təşkil
etməkdir.
Həmçinin xidmət sektoru müəssisələri, yerli və
beynəlxalq şirkətlərin yerli nümayəndəliklərinə
vətəndaşların müraciətini cavablandırarkən yanlış dil
seçimlərinin yolverilməzliyi barədə xəbərdarlıq
ünvanlanması layihənin əsas məqsədlərindəndir.
Bildirilmişdir ki, layihədən bütün Azərbaycan
ictimaiyyəti faydalanacaqdır. Layihəni 3 ay müddətinə
icra etmək nəzərdə tutulmuşdur.
Rəşad ZİYADOV |
