|
 Müstəqil
Azərbaycanın memarı Heydər Əliyevin tarixi rolu ilə
bağlı yeni bir mərhələ başlanır. Heydər Əliyevin siyasi,
dövlətçilik, diplomatik və iqtisadiyyat sahəsində
cahanşümul fəaliyyətini əks etdirən yeni tədqiqat
əsərləri yazılır. Onun tarixi fəaliyyətinin əsas
istiqamətlərindən biri də mədəniyyət və incəsənətimizin
tərəqqisi ilə bağlıdır. Ulu öndər Azərbaycan
mədəniyyətinin və incəsənətinin böyük hamisi idi.
Hər bir xalqın mədəniyyəti onun böyüklüyünün,
müdrikliyinin, birliyinin təcəssümüdür. Azərbaycan xalqı
qədim tarixə və mədəniyyətə malik bir xalq kimi artıq
bütün dünyada tanınmışdır. Azərbaycan mədəniyyətinin
yaranması və mənəvi rolunun yüksək dəyərləndirilməsində
tarix boyu bir çox şəxsiyyətlərin xidməti olmuşdur ki,
yeni dövrün də belə bir nəhəng şəxsiyyəti məhz Heydər
Əliyevdir.
Azərbaycan mədəniyyətinin hərtərəfli inkişafında və onun
zəngin mənəvi-mədəni irsinin dünya mədəni aləminə
çatdırılmasında Heydər Əliyev çox böyük rol oynamışdır
və bu fəaliyyət respublikanın gələcək mənəvi-siyasi
həyatı üçün örnək və irsə münasibətdə siyasətin
konsepsiyasının yaranması baxımından mühüm əhəmiyyətə
malikdir.
Dahi şəxsiyyətin bu sahədə gördüyü işlərlə bağlı
professor Timuçin Əfəndiyevin "Heydər Əliyev və milli
mənəvi dəyərlərimiz" monoqrafiyasında və bu günlərdə
çapdan çıxmış "Heydər Əliyev: Mədəniyyət və əbədiyyət"
(Bakı, Təhsil. 2013) adlı kitabında nəzəri analitik
üslubda söhbət açılır.
Dünya şöhrətli siyasətçi, Azərbaycan xalqının ümummilli
lideri Heydər Əliyevin milli mədəniyyətimizin
tarixindəki misilsiz xidmətlərindən bəhs edən
fotomonoqrafiya ulu öndərin anadan olmasının 90 illik
yubileyinə həsr olunmuşdur. Kitabda mətnin və şəkillərin
vəhdəti əsasında Heydər Əliyevin mədəniyyət və
incəsənətimizin tarixindəki xidmətləri əksini tapmışdır.
Xalqların tarixində elə rəqəmlər var ki, onlar həm
həqiqi, həm də rəmzi gücü ilə mənsub olduğu xalqın adını
əbədiyyətə aparıb çıxarır. 10 may 1923-cü il Azərbaycan
tarixinin əzəmət və möhtəşəmlik zirvəsi, Heydər Əliyev
adını dünyaya bəxş edən və əbədiyyətə ucaldan bir
tarixdir. Tariximizə və milli mənəvi yaddaşımıza "Ulu
öndər", "Ümummilli lider" kimi şərəfli adlarla daxil
olmuş Heydər Əliyevin adı onunla eyni epoxada yaşayıb
işləmiş, mənalı çıxışlarını dinləmiş, canlı ünsiyyətdə
olmuş insanlar üçün olduqca əziz və doğmadır.
Fotomonoqrafiya ümummilli liderimiz Heydər Əliyevin
çoxcəhətli mədəniyyət nəzəriyyəsinin təbliğinə həsr
olunmuşdur. Heydər Əliyev istər çoxəsrlik zəngin
ədəbiyyatımız, istərsə də qədim və bədii cəhətdən kamil
mədəniyyət və incəsənətimizin ayrı-ayrı sahələrindən
bəhs edərkən bütün bunlara dövlətçilik
nöqteyi-nəzərindən, azərbaycançılıq fəlsəfəsinin
məxəzləri kimi yanaşmışdır.
Heydər Əliyev deyirdi: "Ədəbiyyatımızın,
incəsənətimizin, mədəniyyətimizin ən böyük və
fərqləndirici xüsusiyyətlərindən biri də odur ki,
zaman-zaman istedadlı insanlar mədəniyyətimizdə yeni
yollar, yeni cığırlar açırlar, yeni formalar meydana
gətirirlər".
Müasir ədəbiyyatımızın, incəsənətimizin və
mədəniyyətimizin bəşəri arenada öz nadir inciləri ilə
dünyanı heyran qoyması, ölkəmizin şöhrətini qaldırması,
xalqımızın qədim mədəniyyətə malik olması bu müdrik
fikri təsdiq edir. Məlum olduğu kimi, XX əsrdə
Azərbaycan mədəniyyətinin bütün sahələrinin sürətli
inkişafı, geniş miqyasda təbliği və böyük nailiyyətləri
bilavasitə Heydər Əliyevin müstəsna tarixi xidmətlərinin
nəticəsi idi. Onun rəhbərlik etdiyi 70-80-ci illərdə,
xüsusən sonrakı dövrdə mədəni və ədəbi irsimizə, təsviri
sənətə, teatra qayğı xeyli dərəcədə artmışdı. Heydər
Əliyevin bilavasitə himayədarlığı və gərgin səyləri
nəticəsində bu gün Azərbaycan incəsənəti bütün dünya
miqyasında tanınmışdır.
Heydər Əliyevin nəzəri siyasi irsi, dövlətçilik və
millətçilik təcrübələri bizim milli sərvətimiz,
tövsiyələri yaddaşımızın əbədiyyət dərsidir. Bizim üçün
doğma olan cəhət də budur ki, 2013-cü ildə öz
fəaliyyətində Heydər Əliyev ideyalarını həyata keçirən
Azərbaycan Dövlət Mədəniyyət və İncəsənət
Universitetinin yaranmasının 90 illiyi tamam olur.
Təqdim olunan fotomonoqrafiyada 1969-cu ildən sonrakı
dövrdə - Heydər Əliyev epoxasında yaşayan mədəniyyət və
incəsənət xadimlərinin həyat və yaradıcılığına ulu
öndərin göstərdiyi diqqət və qayğı ön plana
çəkilmişdir. Kitab geniş oxucu kütləsi üçün nəzərdə
tutulmuşdur.
Gülşən ƏLİYEVA,
Azərbaycan Dövlət Mədəniyyət və İncəsənət
Universitetinin professoru |
