|
 Qafqaz
Universitetində "V gənclik şənliyi" adlı tədbir
keçirilmişdir. Azərbaycan xalqının ümummilli lideri
Heydər Əliyevin 90 illik yubileyinə həsr olunmuş
tədbirdə universitetin rektoru, professor Ahmet Saniç
dahi şəxsiyyət, müasir müstəqil Azərbaycan dövlətinin
banisi Heydər Əliyevin müstəsna tarixi xidmətlərindən
danışmış, ulu öndərin milli mənəvi dəyərlərin
qorunmasına və inkişafına daim böyük önəm verdiyini
bildirmişdir. Rektor vurğulamışdır ki, ümummilli lider
Heydər Əliyev irsində Vətən sevgisi, azərbaycançılıq
duyğusu xüsusi yer tutur. Dahi liderin mənalı həyat yolu
ölkəmizin gələcək inkişafının təminatçısı olan gənc
nəslin tərbiyəsi üçün böyük örnəkdir. Müdrik şəxsiyyət
Heydər Əliyevin dövlət gənclər siyasətinin
əhəmiyyətindən bəhs edən professor A.Saniç ümummilli
liderin ideyalarının Azərbaycan Prezidenti İlham Əliyev
tərəfindən əzmlə həyata keçirildiyini xatırlatmışdır.
Rektor rəhbərlik etdiyi universitetin tələbələrinin
seçdikləri ixtisaslara dərindən yiyələnməklə yanaşı,
ölkənin mədəni həyatında da yaxından iştirak
etdiklərini, bu sahədə keçirilən tədbirlərdə fəallıq
göstərdiklərini diqqətə çatdırmışdır. Qeyd olunmuşdur
ki, Gənclər və İdman Nazirliyinin Azərbaycan Tələbə
Gənclər Təşkilatları İttifaqı ilə birgə keçirdikləri
tələbələrin "Univiziya" II mahnı müsabiqəsində Qafqaz
Universitetinin təmsilçisi Zərrin Mahmudzadə I yeri
tutmuşdur.
Sonra "Gənclik şənliyi" çərçivəsində 3000 tələbənin
sərbəst səsverməsi əsasında aparılmış müxtəlif
nominasiyalar üzrə "İlin adamları" seçiminin nəticələri
elan olunmuşdur. Heydər Əliyev Fondunun
vitse-prezidenti, beynəlxalq "Baku" jurnalının baş
redaktoru, Rusiya Azərbaycanlı Gənclər Təşkilatının
sədri, "Ətraf Mühitin Mühafizəsi Fəaliyyəti üzrə
Beynəlxalq Dialoq" - İDEA-nın rəhbəri Leyla xanım
Əliyeva "İl ərzində Azərbaycanın beynəlxalq aləmdə
tanınmasında xüsusi xidməti olan şəxs" nominasiyası üzrə
seçimin qalibi olmuşdur. "İlin müəllimi", "İlin yerli
şirkəti", "İlin xarici şirkəti", "İlin iş dünyasında
uğur qazanmış adamı" və s. nominasiyalar üzrə də
qaliblərin adları açıqlanmışdır.
Sonra maraqlı konsert proqramı nümayiş etdirilmişdir.
Tədbir çərçivəsində universitet şəhərciyində tələbələrin
bədii və intellektual yaradıcılığının məhsulu olan
əsərlərdən, rəsmlərdən, əl işlərindən, maketlərdən və s.
ibarət sərgi nümayiş olunmuşdur.
Yusif ƏLİYEV |
