|
 Bakı
Pedaqoji Kadrların İxtisasartırma və Yenidənhazırlanma
İnstitutunun rektoru, professor Asəf Zamanov mayın 13-də
Britaniya Şurasının (British Council) Azərbaycan üzrə
yeni təyin olunmuş direktoru xanım Yelizavet Vayt ilə
görüşmüşdür. A.Zamanov hörmətli qonağı salamlayaraq yeni
təyinatı münasibəti ilə onu təbrik etmişdir. Britaniya
Şurası ilə BPKİYİ-nin 2012-ci ilin yanvar ayından
başlamış və uğurla davam edən əməkdaşlığın
nəticələrindən, institutun fəaliyyət istiqamətləri, o
cümlədən beynəlxalq əlaqələrindən söz açılmışdır.
Britaniya Şurası ilə imzalanmış layihənin Bakıda
fəaliyyət göstərən məktəblərin ingilis dili
müəllimlərinin professional inkişafı üçün əhəmiyyəti,
Böyük Britaniyanın ali məktəblərinə məqsədyönlü
səfərlərin nəticələri xüsusi olaraq vurğulanmışdır.
Görüşdə Avropa və Azərbaycanın TEMPUS layihəsi
çərçivəsində birgə fəaliyyət göstərən bir neçə ali
məktəblərinin, həmçinin Britaniya Şurasının
təşkilatçılığı ilə cari ilin sentyabr ayında Bakıda
keçiriləcək "Xarici dillərin tədrisində yeni
tendensiyalar: mövcud təcrübə və inkişaf strategiyaları"
beynəlxalq elmi-praktik konfransla əlaqədar təşkilati
məsələlər, gələcək əməkdaşlıq müzakirə edilmişdir.
İnstitutla tanışlıq Heydər Əliyev muzey-lektoriyasından
başlamışdır. Rektor ümummilli liderin həyatı və
fəaliyyəti barədə qonağa məlumat vermişdir. Heydər
Əliyev muzey-lektoriyası ilə tanışlıqdan məmnun qalan
qonaq Xatirə kitabına ürək sözlərini yazmışdır.
İxtisasartırma kurslarında tədris prosesi ilə yaxından
tanışlıq, müdavimlərlə müzakirələr, beynəlxalq əlaqələr
şöbəsinin uğurlu fəaliyyəti, qısa zaman kəsiyində artıq
ənənəyə çevrilmiş beynəlxalq elmi konfransların təşkili
xanım Yelizavet Vaytda böyük təəssürat yaratmışdır.
Azərbaycanda fəaliyyətə başladıqdan sonra ilk rəsmi
səfərinin bu ali təhsil ocağında reallaşmasından
məmnunluğunu bildirən qonaq səmimi qəbula görə professor
Asəf Zamanova təşəkkürlərini bildirmiş və əməkdaşlığın
daha da genişlənəcəyinə inamını ifadə etmişdir.
R.ZİYADOV |
