|
 Azərbaycan
Dillər Universitetinin rektoru, Milli Məclisin deputatı,
professor Səməd Seyidov Avropa Komissiyasının Tərcümə
üzrə baş direktoru Marko Benedetti ilə görüşmüşdür.
Qonağı salamlayan rektor Səməd Seyidov Avropa
Komissiyasının nümayəndələrini ADU-da görməkdən məmnun
olduğunu dilə gətirmişdir. O, bu görüşün əməkdaşlığın
başlanğıcı olduğunu qeyd etmişdir. Rektor Azərbaycanda
gənclərin idarəetmədə böyük rol oynadığını
vurğulamışdır. ADU-nun dillərin tədrisində unikal tədris
ocağı olduğunu deyən professor Səməd Seyidov burada
alman, fransız, İsrail, İndoneziya mərkəzləri ilə
yanaşı, 15-dən artıq mərkəzin fəaliyyət göstərdiyini
bildirmişdir. Universitetdə mövcud olan fakültələr və
ixtisaslar haqqında danışan rektor bunların arasında
qafqazşünaslıq, azərbaycanşünaslıq ixtisaslarının da
olduğunu diqqətə çatdırmışdır. Universitetdə tərcümə
sahəsində yüksək səviyyəli mütəxəssislərin yetişməsinə
xüsusi əhəmiyyət verildiyi bildirilmişdir. Avropa
Birliyi ilə Azərbaycan arasında əlaqələrin gündən-günə
inkişaf etdiyi də vurğulanmışdır. Rektor Səməd Seyidov
Avropa Birliyinin TEMPUS proqramı çərçivəsində ADU-nun
baş koordinator olduğunu söyləmiş və Avropa Birliyinin
proqramlarında ADU-nun iştirakından söz açmışdır.
Avropa Komissiyasının tərcümə üzrə baş direktoru Marko
Benedetti səmimi qəbula görə təşəkkür etmişdir.
Qarşılıqlı əməkdaşlığı yüksək qiymətləndirən qonaq
tərcümənin artıq qlobal məsələ olduğunu bildirmiş və
yeni proqramlarla işləməyin vacibliyini vurğulamışdır.
Görüşdə gələcək əməkdaşlıq, birgə layihələrin həyata
keçirilməsi haqqında fikir mübadiləsi aparılmışdır.
ADU-nun Mətbuat xidməti |
