|
 Naxçıvan
Dövlət Universitetinin fizika-riyaziyyat fakültəsinin
fizika müəllimliyi ixtisasının IV kurs tələbəsi Elgün
Tağıyevin təşkilatçılığı ilə onun pedaqoji təcrübədə
olduğu Naxçıvan şəhər Heydər Əliyev adına tam orta
məktəbdə Azərbaycan xalqının ümummilli lideri Heydər
Əliyevin 90 illik yubileyinə həsr olunmuş "Heydər Əliyev
və Azərbaycan gəncləri" mövzusunda bilik yarışması
keçirilmişdir. Naxçıvan şəhər tam orta məktəbləri
arasında bütün fənlər üzrə 50 test sualından ibarət
bilik yarışması maraqlı və yaddaqalan olmuşdur.
Bilik yarışmasının yekununda çıxış edən Naxçıvan şəhər
Heydər Əliyev adına tam orta məktəbin direktoru, əməkdar
müəllim Namiq Məmmədov vurğulamışdır ki, Azərbaycan
gəncliyi ictimai həyatın bütün sferalarında aktiv
fəaliyyəti ilə seçilir və siyasi, iqtisadi, humanitar,
sosial tədbirlərin həyata keçirilməsində mühüm rol
oynayır. Dövlətin gənclərin fəaliyyəti üçün yaratdığı
geniş imkanlar nəticəsində bu təbəqənin cəmiyyətin
avanqard qüvvəsinə çevrildiyi bildirilmişdir.
Naxçıvan Dövlət Universitetinin Yeni Azərbaycan
Partiyası universitet şəhərciyi ərazi ilk təşkilatının
sədri, pedaqogika üzrə fəlsəfə doktoru, dosent, əməkdar
müəllim Kamal Camalov çıxışında bildirmişdir ki, bu gün
dövlət gənclər siyasəti ümummilli lider Heydər Əliyevin
layiqli davamçısı olan Prezident İlham Əliyev tərəfindən
uğurla həyata keçirilir.
Naxçıvan Dövlət Universitetinin nəzəri fizika
kafedrasının müdiri Fərman Qocayev, Universitet Gənclər
Təşkilatının sədri, magistr Arzu Abdullayevin
çıxışları, Naxçıvan Dövlət Universitetinin
fizika-riyaziyyat fakültəsinin fizika müəllimliyi
ixtisasının IV kurs tələbəsi Elgün Tağıyevin "Heydər
Əliyev və Azərbaycanda təhsil", Naxçıvan şəhər Heydər
Əliyev adına tam orta məktəbin IX sinif şagirdi Aytən
Xəlilovanın "Heydər Əliyev və Azərbaycan gəncləri
məktəbli təfəkküründə" mövzularında məruzələri
dinlənilmişdir.
Sonda bilik yarışmasının nəticələri açıqlanmışdır.
Ümummilli lider Heydər Əliyevin adını daşıyan tam orta
məktəb yarışmanın qalibi elan olunmuşdur. 17 nömrəli tam
orta məktəb II, 11 nömrəli tam orta məktəb isə III yerlə
kifayətlənmişlər. Qaliblər Naxçıvan Dövlət
Universitetinin fəxri fərmanları ilə təltif olunmuşlar.
Tədbirin təşkilatçısı, Naxçıvan Dövlət Universitetinin
fizika-riyaziyyat fakültəsinin fizika müəllimliyi
ixtisasının IV kurs tələbəsi Elgün Tağıyev isə pedaqoji
təcrübə dövründə fərqləndiyinə və ictimai işlərdə fəal
iştirakına görə Naxçıvan Dövlət Universitetinin fəxri
fərmanı ilə təltif olunmuşdur.
Bədii hissədə isə Heydər Əliyev adına tam orta məktəbin
şagirdlərinin ifasında ümummilli liderə həsr olunmuş
mahnılar və şeirlər səsləndirilmişdir.
Mina QASIMOVA |
