|
 Mayın
4-də Bakıdakı "Gülüstan" sarayında Azərbaycan xalqının
ümummilli lideri Heydər Əliyevin 90 illik yubileyinə
həsr olunmuş məktəblilərin respublika inşa yazı
müsabiqəsi qaliblərinin mükafatlandırılması mərasimi
keçirilmişdir. Mərasimdən öncə tədbir iştirakçıları
Fəxri xiyabana gələrək ulu öndər Heydər Əliyevin əziz
xatirəsini yad etmiş, məzarı önünə gül dəstələri
qoymuşlar. Görkəmli oftalmoloq alim, akademik Zərifə
xanım Əliyevanın xatirəsi də anılmış və məzarı üzərinə
tər çiçəklər düzülmüşdür.
Dövlət qurumlarının nümayəndələrinin, Milli Məclis
deputatlarının, ali məktəb rektorlarının, qalib
şagirdlərin və onların təhsil aldıqları məktəblərin
rəhbərlərinin iştirak etdikləri mərasimdə əvvəlcə
ümummilli lider Heydər Əliyevin zəngin həyat və
fəaliyyətindən bəhs edən film nümayiş olunmuşdur.
Mərasimi açan Azərbaycan Respublikasının təhsil naziri
Mikayıl Cabbarov geniş çıxış etmişdir.
Təhsil
naziri Mikayıl Cabbarovun çıxışı
 Əziz
şagirdlər!
Hörmətli qonaqlar!
Bu gün biz çox əlamətdar bir hadisə münasibətilə -
Azərbaycan xalqının ümummilli lideri Heydər Əliyevin 90
illik yubileyinə həsr olunmuş məktəblilərin respublika
inşa yazı müsabiqəsinin qaliblərinin mükafatlandırılması
münasibətilə "Gülüstan" sarayına toplaşmışıq. Heydər
Əliyevin anadan olmasının ildönümlərinə həsr edilən inşa
müsabiqəsi bu il 7-ci dəfədir ki, keçirilir. Yekun
mərhələ iştirakçılarının inşaları nazirlikdə təşkil
edilmiş komissiya tərəfindən yoxlanılıb
qiymətləndirilmiş, nəticə etibarı ilə 85 nəfərin
mükafatlandırılması qərara alınmışdır. Onlardan 8 nəfər
I, 7 nəfər II, 16 nəfər III, 54 nəfər isə həvəsləndirici
IV yerə layiq bilinmişdir. Fürsətdən istifadə edərək,
müsabiqənin keçirilməsində göstərdikləri mənəvi və maddi
dəstəyə görə Heydər Əliyev Fonduna, Yeni Azərbaycan
Partiyasına, Respublika Həmkarlar İttifaqları
Konfederasiyasına, Rabitə və İnformasiya Texnologiyaları
Nazirliyinə öz dərin təşəkkürümü bildirirəm.
 Heydər
Əliyevin ömür yolu Vətənə və millətə təmənnasız xidmətin
parlaq nümunəsidir. Azərbaycan tarixinin 30 ildən artıq
bir dövrü bilavasitə ulu öndərin adı ilə bağlıdır.
Misilsiz idarəetmə istedadına malik olan ümummilli
liderimiz Azərbaycana rəhbərlik etdiyi bütün dövrlərdə
quruculuğun, sosial-iqtisadi inkişafın, ictimai-siyasi
sabitliyin, dövlətçiliyin təminatçısı olmuş, ən ağır
vaxtlarda Azərbaycanın mənafeyi naminə xilaskarlıq
missiyasını yerinə yetirmişdir.
Heydər Əliyev Azərbaycanda güclü iqtisadiyyatın
yaradılması ilə bərabər, cəmiyyətin tərəqqisinin əsas
hərəkətverici qüvvəsi hesab olunan təhsilin inkişafına
da böyük diqqət və qayğı göstərmişdir. Ölkəmizdə təhsil
islahatlarına başlanması, Dünya Bankının islahatlar
prosesinə cəlb edilməsi, təhsil sahəsində öz həllini
gözləyən problemlərin aradan qaldırılmasına yönəlmiş bir
sıra dövlət proqramlarının qəbulu birmənalı şəkildə
ümummilli lider Heydər Əliyevin təşəbbüsü və qətiyyətli
mövqeyi sayəsində mümkün olmuşdur.
Dünya şöhrətli dövlət xadimi, Azərbaycan xalqının milli
və mənəvi lideri Heydər Əliyevin öz həmvətənlərinə
əmanət qoyduğu müstəqil Azərbaycan ölkə Prezidenti İlham
Əliyev cənablarının müdrik rəhbərliyi ilə gələcəyə doğru
inamla addımlayır. 2003-cü ildən bu günədək Azərbaycanın
ictimai-siyasi, sosial-iqtisadi sahələrdə əldə etdiyi
möhtəşəm uğurlar Heydər Əliyev ideallarına, ulu öndərin
siyasi kursuna sadiqliyi təsdiq edir.
Heydər Əliyevin əzəmətli şəxsiyyəti, onun Azərbaycana,
doğma xalqına həsr edilmiş şərəfli ömür yolu və zəngin
fəaliyyəti bu günün və gələcəyin gəncləri üçün parlaq
nümunə, ibrətamiz tərbiyə məktəbidir.
Əziz şagirdlər! İnşalarınızla tanış olduqca onların hər
bir sətrində ulu öndərə hədsiz məhəbbətinizi hiss
edirik, səmimi duyğularınızın şahidi oluruq. İnanırıq
ki, ulu öndərimizə qəlbinizdə qərar tutmuş məhəbbət
hissləri sizi heç vaxt tərk etməyəcəkdir.
Müsabiqənin bütün qaliblərini səmimi-qəlbdən təbrik
edir, təhsilinizdə və gələcək həyatınızda hamınıza
yeni-yeni uğurlar arzu edirəm.
Fürsətdən istifadə edərək bu gün təhsil sahəsi
qarşısında duran əsas vəzifələrə də toxunmaq istərdim.
Məlum olduğu kimi, Azərbaycan Respublikası Prezidentinin
2012-ci il 29 dekabr tarixli Fərmanı ilə "Azərbaycan -
2020: gələcəyə baxış" İnkişaf Konsepsiyası qəbul
olunmuşdur. Təhsil sahəsinin və insan kapitalının
inkişafı konsepsiyanın əsas prioritetlərindən biridir.
İnanırıq ki, konsepsiya ilə müəyyən edilmiş
istiqamətlərdə görüləcək fəaliyyət nəticəsində
Azərbaycanda müasir təhsil sisteminin formalaşdırılması
uğurla başa çatdırılacaq, milli təhsilimizin dünya və
Avropa təhsil məkanına inteqrasiyası güclənəcək,
təhsilin keyfiyyəti xeyli yüksələrək ölkəmizin
gələcəyinin və dayanıqlı inkişafının əsasını təşkil
edəcəkdir.
Təhsil sisteminin səviyyəsi milli şüurun və milli
identifikasiyanın formalaşması ilə yanaşı hər bir xalqın
müasir dünyada yerini müəyyənləşdirir. Heydər Əliyevin
banisi olduğu müasir Azərbaycan dövlətinin dünya
dövlətləri arasında ön sıralarda layiqli yerinin
tutmasına yönəlmiş Prezident İlham Əliyevin yorulmaz
fəaliyyəti hər birimizin gözünün qabağında həyata
keçirilir. Təhsil sisteminin qarşısında duran hədəflər
sadə və aydındır: təhsil yüksək keyfiyyətli, səmərəli,
qanunun aliliyinə əsaslanan, müstəqil dövlətimizin
vətənpərvər və müasir baxışlı vətəndaşını formalaşdıran
olmalıdır.
Nazirlik təhsil sahəsində dövlət siyasətini və
tənzimlənməsini həyata keçirən mərkəzi icra hakimiyyəti
orqanı kimi təhsil sisteminin müəyyən edilmiş
istiqamətlər üzrə inkişafını təmin etmək əzmindədir.
Lakin sistemin daxilində mövcud olan bəzi problemlər
qarşımızda duran məsələlərin həllini ciddi
mürəkkəbləşdirir. Təhsil sistemində neqativ hallar gənc
nəslin sağlam yetişdirilməsi prosesinə, onların vətəndaş
kimi inkişafına öz zərərli təsirini göstərir.
Nazirlik əsas diqqəti təhsil sahəsində qanun
pozuntularına şərait yaradan və onları doğuran
səbəblərin aradan qaldırılmasına yönəltmək
niyyətindədir. Bunun yeganə həll yolu problemlərə
sistemli yanaşmanın təmin olunmasıdır. İlk növbədə
mövcud vəziyyəti doğuran səbəblər dəqiq
müəyyənləşdirilməli, onların aradan qaldırılması üçün
effektiv vasitələr tapılmalı və məqsədyönlü kompleks
xarakterli tədbirlər hazırlanmalıdır.
Fikrimi konkret misala - attestat verilməsi məsələsinə
gətirmək istəyirəm. Hazırda qüvvədə olan qaydalara
əsasən 11-ci sinifi bitirən və istənilən fəndən illik
qiyməti "2" olan şagirdlər ümumtəhsil məktəblərində
buraxılış imtahanına buraxılmır, eyni zamanda imtahana
buraxılan şagirdlər hər hansı imtahandan "2" qiyməti
aldığı təqdirdə onların yekun attestasiyası aparılmır.
Nəticədə hər iki halda göstərilən kateqoriyadan olan
məzunlar attestat almaqdan və müvafiq olaraq ali və
yaxud orta ixtisas təhsili müəssisələrinə qəbul olunmaq
üçün sənəd vermək hüququndan məhrum olunurlar. Statistik
məlumatlara əsasən, 2009-2010-cu dərs ilində şagirdlərin
ümumi sayının 22%-i (21.465 nəfər), 2010-2011-ci dərs
ilində 24%-i (22.469 nəfər), 2011-2012-ci dərs ilində
10,5%-i (9011 nəfər) attestat almamışdır.
Heç kəsə sirr deyil ki, yekun olaraq "2" qiyməti
alanlara attestatların verilməməsi yerlərdə sui-istifadə
hallarına geniş yol açan amillərdən birinə çevrilmişdir.
Attestat məzunun biliyinin göstəricisidir. "Təhsil
haqqında" Qanunun təhlili attestatın verilməsi
məsələsinin yekun qiymətləndirmənin qeyri-kafi
nəticələri ilə bağlı olmadığını göstərir. Hər bir halda
attestat olsa belə, qanunvericiliyə əsasən orta məktəb
məzununun tələbə olması ali təhsil müəssisələrinə
mərkəzləşdirilmiş qaydada keçirilən qəbul imtahanlarının
nəticələrindən asılıdır.
Qeyd olunan məsələnin böyük ictimai əhəmiyyət kəsb
etdiyini nəzərə alaraq, Təhsil Nazirliyi tam orta (yəni,
11 illik) təhsil səviyyəsini bitirən bütün məzunlara
attestatın verilməsinin tərəfdarıdır.
Çıxışımda ümumtəhsil məktəblərində mövcud olan bəzi
problemlərə də toxunmaq istərdim. Bu problemlər hamıya
məlumdur, amma müəyyən nüanslar da vardır. Misal kimi
dərslik məsələsində. Cəmiyyətdə belə bir fikir
formalaşıb ki, dərslikləri Təhsil Nazirliyi hazırlayır.
Amma həqiqətdə bu belə deyil. Hər bir dərsliyin öz
müəllifləri var və dərslik onların zehni əməyinin
məhsuludur. Dərsliklərin məzmununu isə ictimai əsaslarla
fəaliyyət göstərən Qiymətləndirmə Şurası qiymətləndirir.
Təbii ki, hamıdan çox biz maraqlıyıq ki, məktəblərdə
təhsil keyfiyyətli dərsliklər üzrə təşkil edilsin.
Obyektiv səbəblərə görə bu müəyyən vaxt tələb edən
məsələdir. Biz bu sahədə olan problemlərin aradan
qaldırılması istiqamətində qətiyyətli tədbirlər
görəcəyik.
Məktəb elə bir məkandır ki, burada biz uşaqlarımızın
mənəviyyatının əsaslarını qoyuruq. Məktəblərdə hökm
sürən psixoloji atmosfer övladlarımızın gələcək həyat
yoluna, mənəvi dəyərlərinə və əqidələrinə, milli
identifikasiyasına və vətəndaşlıq hisslərinə bilavasitə
təsir edir. Bundan irəli gələrək bildirirəm ki,
məktəblərdə baş verən mənfi hallara qarşı Təhsil
Nazirliyinin mövqeyi barışmaz olacaq. Mən bu məsələdə
valideynlərin rolunu da qeyd etmək istərdim. Təhsil
sahəsində nazirliyin və ya təhsil müəssisəsinin
təkbaşına səyləri ilə vəziyyətin düzəldilməsinə inanmaq
sadəlövhlük olardı. Bu, eyni zamanda hər bir ailənin və
bütövlükdə cəmiyyətin ümumi işidir. Vətəndaş
cəmiyyətinin formalaşmasında təhsil sahəsinin xüsusi
yeri vardır və onun kiçik modeli məhz burada
valideynlərin və digər maraqlı tərəflərin iştirakı ilə
yaradılır. Bizim mövqeyimiz ondan ibarətdir ki,
məktəblərin idarə olunmasında və təhsil ocaqlarında
müsbət atmosferin yaradılmasında valideynlərin rolu
artırılmalı, bunun üçün islahatlar aparılmalıdır.
Şagirdlərin hüquqları ilə yanaşı, biz müəllimlərin
hüquqlarının da qorunmasına xüsusi diqqət yetirəcəyik,
onlara hörmətli yanaşma təmin ediləcək, iş mühitləri,
maddi təminat məsələləri də diqqət mərkəzində
saxlanılacaqdır.
Azərbaycan dilində müsahibinə müraciətdə "müəllim"
sözünün işlənilməsi qarşı tərəfin yüksək statusuna işarə
və ona olan etimadın göstəricisidir. Bizim fəaliyyətimiz
müəllim peşəsinin əvvəlki nüfuzunun bərqərar olmasına
yönəldiləcəkdir.
Bugünkü tədbir yalnız ümumtəhsil müəssisələrinə aid
olduğu üçün mən məktəblərdəki diqqətçəkən problemləri
qeyd etdim. Bununla belə vacib hesab etdiyim dövlət
xətti ilə xaricdə təhsil alan azərbaycanlı tələbələrin
qarşılaşdığı problemlərə də ayrıca toxunmaq istərdim.
Dünya təcrübəsində çox nadir hallarda dövlətin xaricdə
təhsil alan həmvətənlərinin bütün təhsil və yaşayış
xərclərini üzərinə götürməsi ilə rastlaşmaq olar.
Azərbaycan Respublikasının Prezidenti İlham Əliyev
cənablarının bu məsələyə olan diqqəti və xüsusi
münasibəti nəticəsində "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" qəbul olunmuşdur. Möhtərəm Prezident bu
proqrama start verməklə neft kapitalının insan
kapitalına çevrilməsi siyasətini ortaya qoydu və
ölkəmizin gələcəyinə ən yaxşı investisiya kimi bunun
böyük bir inkişaf prosesinin başlanğıcı olduğunu
vurğuladı.
Lakin təəssüf olsun ki, bu sahədə son dövrə kimi
müxtəlif pozuntulara, əsassız tələblərə rast gəlinirdi.
Nəticədə xaricdə təhsil alan tələbələrimizin təhsil
haqlarının ödənilməsində gecikmələr, süründürməçilik
halları artmışdır. Mən özüm xaricdə təhsil almış bir
şəxs kimi çox gözəl başa düşürəm ki, belə gecikmələr nə
kimi çətinliklər törədir. Bütün bunlar Azərbaycan
gəncliyinin intellektual elitasını təşkil edən bu
kateqoriyalı tələbələrin təhsilalma prosesinə mənfi
təsir göstərirdi. Bu, yolverilməzdir və tərəfimizdən bu
prosesin şəffaf şəkildə həyata keçirilməsi tələb edilən
bütün addımlar atılacaqdır. Nazirliyin İnternet saytında
tərəfimizdən telebe@edu.gov.az səhifəsi açılmış
və xaricdə təhsillə bağlı qarşılaşan problemlər haqqında
bu ünvana müraciətlər ünvanlana bilər.
Əsas məqsədimiz dövlətin yaratdığı təhsil imkanlarından
heç bir süni maneə olmadan hər kəsin yararlanması,
vətəndaşlar arasında bərabər təhsil şəraitinin və
hüququnun tənzimlənməsidir. Fəaliyyətimiz dövründə
çalışacağıq ki, hər bir vətəndaş Konstitusiyamızın
onlara verdiyi bu yüksək hüquqdan rahatlıqla istifadə
edə bilsinlər.
Bu gün bu salonda Azərbaycanın gələcək istedadları
toplaşıb. Onlara üz tutub demək istərdim: Siz çox
xoşbəxtsiniz ki, müstəqil Azərbaycan dövlətində
doğulmusunuz, həyata keçirilən misilsiz quruculuq
işlərinin şahidisiniz. Ölkəmizi dövlət başçımızın
rəhbərliyi ilə əldə olunmuş nailiyyətlərin üzərində
gələcək yüksəkliklərə apara bilən ümidimizsiniz. Əmin
ola bilərsiniz ki, hər birinizin həyat yolu diqqətimizin
mərkəzindədir və Azərbaycan dövləti hər zaman öz
vətəndaşlarının yanındadır.
Çıxışımın sonunu Heydər Əliyevin təhsildəki islahatlar
barədə dediyi sözlərlə bitirmək istərdim:
"Təhsildə dəyişikliklər inqilab yolu ilə deyil, təkamül
yolu ilə getməlidir".
***
YAP sədrinin müavini - icra katibi, Milli Məclisin
deputatı Əli Əhmədov
mərasimdə söz alaraq qalibləri təbrik etmiş, artıq
yeddinci ildir ki, keçirilən "Heydər Əliyev şagirdlərin
gözü ilə" mövzusundakı müsabiqənin əhatə dairəsinə görə
ölkəmizdə ən kütləvi müsabiqələrdən biri olduğunu
bildirmişdir. Heydər Əliyevin zəngin irsinin
öyrənilməsində mühüm rol oynayan inşa müsabiqəsinin
gənclərin milli mənəvi dəyərlər, dövlətçilik məfkurəsi
əsasında formalaşması kimi müqəddəs və çox əhəmiyyətli
bir vəzifəyə xidmət etdiyini vurğulayan icra katibi,
onun təşkili və keçirilməsində ölkəmizin ümumtəhsil
məktəblərində çalışan çoxlu sayda müəllimin fədakarlıq
göstərdiyini qeyd etmişdir.
Əli Əhmədov ümidvar olduğunu bildirmişdir ki, müsabiqədə
iştirak edən gənclər Heydər Əliyev irsinə dərindən
yiyələnərək gələcəyin vətənpərvər, yüksək keyfiyyətli
təhsil almış vətəndaşları kimi yetişəcəklər. İcra katibi
diqqətə çatdırmışdır ki, Yeni Azərbaycan Partiyası
müsabiqənin keçirilməsinə həmişə dəstək verməyə
çalışmışdır. Partiya rəhbərliyinin qərarı ilə
müsabiqənin qaliblərinə - I, II və III yerləri tutanlara
ali məktəblərə daxil olduqları halda bu təhsil
ocaqlarında oxuduqları 4 il ərzində YAP tərəfindən ayda
50 manat məbləğində təqaüd verilir. Hazırda əvvəlki
illərin müsabiqə qaliblərindən 30 nəfəri bu təqaüdü
alır. Ə.Əhmədov yeni qaliblər arasından da bu şansı
qazananların olacağına əminliyini bildirmişdir.
Azərbaycan Həmkarlar İttifaqları Konfederasiyasının
sədri, Milli Məclisin deputatı Səttar Mehbalıyev
çıxışında bu günlər ölkəmizin hər yerində ümummilli
lider, Azərbaycan dövlətinin yaradıcısı Heydər Əliyevin
anım mərasimlərinin keçirildiyini qeyd edib, ulu öndərin
Azərbaycan xalqı qarşısındakı mühüm xidmətlərindən söz
açmışdır.
S.Mehbalıyev ulu öndər Heydər Əliyevin gənclərə, onların
təhsilinə həmişə böyük diqqət və qayğı göstərdiyini
xatırlatmış, müdrik rəhbərin siyasətinin Prezident İlham
Əliyev tərəfindən uğurla davam etdirildiyini
söyləmişdir.
Müsabiqə barədə fikirlərini bildirən Səttar Mehbalıyev
onun keçirilməsinin Azərbaycan gənclərinin Heydər Əliyev
irsinə daha dərindən bələd olmalarına imkan yaratdığını,
eləcə də istedadlı gənclərin aşkara çıxarılıb inkişaf
etdirilməsi işinə güclü stimul verdiyini söyləmişdir.
Bildirmişdir ki, Azərbaycan Həmkarlar İttifaqları
Konfederasiyası da bu istiqamətdə bir sıra addımlar
atmışdır. Konfederasiya tərəfindən 1400 nəfərdən artıq
ali məktəb tələbəsinə adlı təqaüdlər verildiyini, orta
məktəblərin yuxarı siniflərində təhsil alan əlaçı
şagirdlərin hər birinin 50 manat məbləğində təqaüdə
layiq görüldüyünü deyən S.Mehbalıyev inşa müsabiqəsində
I, II və III yerləri tutan şagirdlərin də hər birinə
100, həvəsləndirici yerləri tutanlara isə 50 manat
məbləğində Azərbaycan Həmkarlar İttifaqları
Konfederasiyası fondundan vəsait ayrıldığını diqqətə
çatdırmışdır.
Rabitə və informasiya texnologiyaları nazirinin müavini
Elmir Vəlizadə
çıxışında Heydər Əliyevin doğum gününə həsr olunmuş inşa
yazı müsabiqəsinin yekun tədbirində iştirak etməkdən
məmnunluğunu ifadə edərək bildirmişdir ki, RİTN layihə
başlayandan daim ona dəstək vermiş, müsabiqə
təşkilatçıları olan digər qurumlarla birlikdə onun
təşkili və keçirilməsində yaxından iştirak etmişdir.
Artıq ənənəyə çevrilmiş inşa müsabiqəsinin gənclərə,
onların gələcək fəaliyyətlərinə, özlərinə həyatda yer
tutmalarına müsbət təsir edən hadisə olduğunu qeyd edən
nazir müavini şagirdlər tərəfindən qələmə alınmış inşa
yazılarda ulu öndər haqqında çox səmimi fikirlərin öz
əksini tapdığını, bu fikirlərin adamda qürur hissi
doğurduğunu söyləmişdir.
Ümummilli lider Heydər Əliyevin bütün ömrünü
Azərbaycanın inkişafına həsr etdiyini deyən nazir
müavini ulu öndərin həyatının son günlərinədək
Azərbaycanın dünyada tanınması, bütün sahələrdə
irəliləyişə nail olması üçün əlindən gələni etdiyini
diqqətə çatdırmışdır.
Elmir Vəlizadə əmin olduğunu bildirmişdir ki, gənclər
Heydər Əliyevin qurduğu müstəqil Azərbaycanın gələcəkdə
daha da inkişaf etməsinə, ulu öndərin ideyalarının
həyata keçirilməsinə öz töhfələrini verəcəklər.
Müasir dövrümüzdə həyatın bütün sahələrində, eləcə də
təhsildə informasiya-kommunikasiya texnologiyalarının
rolunun həddən artıq artdığını deyən nazir müavini son
illər İKT-nin təhsilə tətbiqi ilə bağlı iki dövlət
proqramının qəbul olunduğunu və uğurla həyata
keçirildiyini söyləmişdir. Bildirmişdir ki, şagirdlərin
bu texnologiyaları mənimsəməsi, biliklərə yiyələnmələri
onlara yaxından kömək edir. O, təmsil etdiyi qurumun
Azərbaycanda gedən təhsil islahatlarına öz töhfəsini
verdiyini, xaricdə təhsil alan və İKT ixtisasları seçmiş
tələbələrə RİTN tərəfindən dəstək göstərildiyini,
onların təhsil haqqının ödənildiyini diqqətə
çatdırmışdır.
Çıxışının sonunda qaliblərə RİTN tərəfindən müasir
kompüterlər hədiyyə olunduğunu söyləyən E.Vəlizadə bu
vəsaitlərin onlar üçün dünyaya pəncərə açacağına əmin
olduğunu bildirmiş və qaliblərə uğurlar arzulamışdır.
Heydər Əliyev Fondunun nümayəndəsi İlqar Mustafayev
Fondun prezidenti, YUNESKO-nun və İSESKO-nun xoşməramlı
səfiri, Milli Məclisin deputatı Mehriban xanım
Əliyevanın təbrikini tədbir iştirakçılarına
çatdırmışdır. Heydər Əliyev Fondunun əsas məqsədinin
Azərbaycanın tərəqqisi, Azərbaycan xalqının rifahı
naminə ümummilli lider Heydər Əliyevin apardığı
siyasətin, gördüyü işlərin davam etdirilməsinə dəstək,
onun zəngin irsinin öyrənilməsi və təbliği olduğunu
deyən İ.Mustafayev bu istiqamətdə Fondun reallaşdırdığı
tədbirlərdən, layihələrdən bəhs etmiş, müsabiqənin
əhəmiyyətini qeyd etmiş, qaliblərə təhsildə yeni
nailiyyətlər arzulamışdır.
Sonra müsabiqə qaliblərinin adları elan olunmuş və
onlara mükafatlar təqdim edilmişdir.
Yusif ƏLİYEV |
