|
 Ümummilli
lider Heydər Əliyevin 90 illik yubileyi münasibəti ilə
bu günlər ölkəmizin hər yerində, bütün idarə və
müəssisələrdə, eləcə də təhsil ocaqlarında tədbirlər
keçirilir.
Ulu öndərə məhəbbətin təzahürü, onun əziz və işıqlı
xatirəsinə ehtiramın ifadəsi olan belə tədbirlərdən biri
də aprelin 17-də Bakıdakı 283 nömrəli tam orta məktəbdə
təşkil olunmuşdu. Məktəbin Azərbaycan dili və ədəbiyyat
müəllimi Dildar Bədirovanın təşkilatçılığı ilə
hazırlanmış və əsasən onun dərs dediyi IX "c" sinif
şagirdləri tərəfindən təqdim edilmiş "Sənsiz səninlə..."
adlı maraqlı ədəbi-bədii kompozisiya tədris ocağında bu
silsilədən həyata keçirilən növbəti tədbir idi. Belə ki,
Təhsil Nazirliyinin ümummilli lider Heydər Əliyevin 90
illik yubileyinin qeyd olunması ilə bağlı əmrinə uyğun
olaraq məktəbdə bu istiqamətdə müxtəlif tədbirlər həyata
keçirilmişdir. Ulu öndərimizin mənalı və zəngin həyat
yolunun, fəaliyyətinin dərindən öyrənilməsi məqsədi ilə
məktəbdə ayda iki dəfə müəllim və şagirdlər üçün seminar
məşğələləri təşkil olunmuşdur. Şagirdlər tərəfindən
"Heydər irsini öyrənək" mövzusunda referatlar
hazırlanmışdır. Şagirdlər arasında bu mövzuda
müsabiqələr, bilik yarışları, viktorinalar keçirilmiş,
diskussiyalar təşkil olunmuşdur.
Bütün bunlarda məqsəd ulu öndərin nəsillərə nümunə olan
həyat yolunun, inkişafımızın proqramını təşkil edən
zəngin irsinin yeniyetmə və gənclərə çatdırılmasıdır.
Aparıcılar ədəbi-bədii tədbiri açıq elan edib
kompozisiyanın Heydər Əliyevin əziz ruhuna könül
ərməğanı olduğunu bildirdikdən sonra məşhur müğənni
Müslüm Maqomayevin ifasında "Azərbaycan" mahnısının
əzəmətli melodiyası zala yayıldı. Aparıcılar ulu öndərin
bu mahnını çox sevdiyini xatırlatdılar. Sonra onların
ifasında Heydər Əliyevə həsr olunmuş mahnı səsləndi.
Aparıcılar öncə ulu öndərin həyat yolundan bəzi
məqamları diqqətə çatdırıb bu böyük insanın aydın,
təmiz, işıqlı bir yaz günündə dünyaya gəldiyini və ömrü
boyu Azərbaycanın inkişaf yoluna gur işıq saçdığını
bildirdilər. Onlar sözlə dediklərini poeziyanın qüdrətli
dili ilə də ifadə edib ulu öndərin doğum gününə həsr
olunmuş şeirlər söylədilər. Sonra "Yaşa Azərbaycan"
mahnısı tədbir iştirakçılarının ruhunu oxşadı.
Aparıcılar Heydər Əliyevin hakimiyyətdə olduğu illərdə
Azərbaycanın inkişafı, tərəqqisi naminə göstərdiyi
titanik fəaliyyətdən, dövlətçiliyimizin
möhkəmləndirilməsi, müstəqilliyimizin əbədi olması
naminə atdığı addımlardan, onun böyüməkdə olan nəslə
qayğısından xronoloji ardıcıllıqla, müasir Azərbaycanın
qurucusu olan bu dahi şəxsiyyət və dövlət xadiminə böyük
sayğı ilə söz açdılar, onun ideya və əməllərinin
yaşamaqda, layiqli varisi olan ölkə Prezidenti İlham
Əliyev tərəfindən davam etdirilməkdə olduğunu
söylədilər. Tədbir boyu ümummilli liderin xatirəsi böyük
məhəbbətlə anıldı, fəaliyyət yolu, xalqımız qarşısındakı
titanik xidmətləri sözün qüdrəti, poeziyanın dili ilə
bir daha tədbir iştirakçılarına çatdırıldı və
dəyərləndirildi, onun ruhu qarşısında baş əyildi.
Tədbirdə məktəbin IX "c" sinif şagirdləri Türkan
Bağırzadə, Hüseyn Qasımov, Elvina Babayeva, X "f" sinif
şagirdi Nigar Qasımova, aparıcılar X "b" sinif
şagirdləri Xəyyam və Mahirə, VII sinif şagirdi Ayxan
Xəlilli və b. öz ifaları ilə xüsusi fərqləndilər,
iştirakçıların alqışlarını qazandılar.
Ədəbi-musiqili kompozisiyanın sonunda məktəbin
direktoru Şükufə Axundova çıxış edərək bildirdi ki,
Heydər Əliyevin ideyaları, əməlləri tarix boyu yaşayacaq
və xalqımızı daha işıqlı gələcəyə ruhlandıracaqdır.
Ümummilli liderin ölkəmiz qarşısında misilsiz
xidmətlərindən birinin də özündən sonra layiqli varis
qoyması olduğunu deyən direktor hazırda ölkə başçısı
İlham Əliyev tərəfindən gələcəyimiz naminə, təhsilimizin
inkişafı naminə uğurlu siyasətin həyata keçirildiyini,
təhsilimizin, çoxminli müəllim ordusunun diqqət və qayğı
ilə əhatə olunduğunu diqqətə çatdırdı. Şükufə Axundova
müstəqil Azərbaycanın gələcəyi üçün yetişdirdikləri
bugünkü şagirdlərin Heydər Əliyevin ideya və arzularını
əzmlə həyata keçirəcəklərinə inandığını söylədi.
Tədbirdə iştirak edən Binəqədi Rayon İcra Hakimiyyətinin
məsləhətçisi Dilbər Şükurova, Respublika Uşaq Birliyi
Təşkilatı rəhbərləri məktəbinin direktoru Dilarə
Quliyeva, filologiya elmləri doktorları Dilarə Adilova,
Fəridə-Hicran Vəliyeva, filologiya üzrə fəlsəfə doktoru
Hicran Nəsirova və başqaları şagirdlərin təqdim
etdikləri bədii-musiqili proqramı yüksək qiymətləndirib,
tədbiri ulu öndərin xatirəsinə məktəblilərin dəyərli
töhfəsi olduğunu söylədilər.
Yusif ƏLİYEV |
