|
Ümummilli lider Heydər Əliyevin anadan olmasının 90
illiyinə həsr olunmuş "Ətraf mühitin mühafizəsi" VII
Beynəlxalq Layihə Olimpiadasının qızıl medalçıları
 Xəbər
verdiyimiz kimi, aprelin 5-də Bakıdakı Heydər Əliyev
adına İdman-Konsert Kompleksində məktəblilərin
ümummilli lider Heydər Əliyevin anadan olmasının 90
illiyinə həsr edilmiş "Ətraf mühitin mühafizəsi" VII
Beynəlxalq Layihə Olimpiadasının ("İNEPO-Euroasia)
açılış, aprelin 6-da isə qaliblərin mükafatlandırılması
mərasimləri keçirilmişdir. Rubrikamızın bugünkü
qonaqları BDU-nun nəzdində fəaliyyət göstərən "Gənc
istedadlar" liseyinin IX sinif şagirdləri - "Ətraf
mühitin mühafizəsi" VII Beynəlxalq Layihə
Olimpiadasının qızıl medalçıları Abbasov İbrahim
Ədalət oğlu və Əliyeva Gülər Rəşad qızıdır.
İbrahim Abbasov: - Mən dünyaya Masallıda gəlsəm də,
Bakıda böyümüşəm. Birinci sinifdən dördüncü sinfi
bitirənə kimi paytaxtımızdakı 173 nömrəli orta məktəbdə
oxumuşam, beşinci sinfin əvvəlindən indiyə kimi isə
"Gənc istedadlar" liseyində təhsil alıram.
İkinci dəfə idi ki, nüfuzlu bir müsabiqəyə qatılırdım.
Birinci dəfə Bakıdakı "Kempinski" otelində keçirilən
"Sabahın alimləri" müsabiqəsində iştirak etmişdim.
Müsabiqəyə təqdim etdiyimiz layihədə biyan köklərindən,
adaçayı otundan və yaşıl çay yarpaqlarından istifadə
etməklə yarasağaldıcı məlhəmlərin hazırlanmasından bəhs
olunurdu. Bu layihəni hazırlayarkən elmi rəhbərimiz,
ATU-nun professoru Ramiz Abbasov bizə müstəsna kömək
göstərmişdi. Müsabiqənin nəticələri elan olunanda bizim
layihəmizin qızıl medala, sertifikata və pul mükafatına
layiq görülməsi məndə özümə inam hissini birə-beş
artırdı. Mənim ikinci dəfə müsabiqəyə qatılmağım üçün
stimul elə həmin inamım olmuşdur.
"Ətraf mühitin mühafizəsi" mövzusunda keçirilən VII
Beynəlxalq Layihə Olimpiadasına (İNEPO-Euroasia)
təqdim etdiyimiz layihədə ultrasəslərin köməyi ilə kənd
təsərrüfatının ziyanvericilərdən qorunması probleminin
həlli yolları göstərilir. Biz münsiflər heyətinin
üzvlərini inandırmağa nail olduq ki, insan qulağının
eşidə bilmədiyi ultrasəslərin köməyi ilə nəinki kənd
təsərrüfatı məhsullarını, hətta heyvanları da
ziyanvericilərdən qorumaq mümkündür.
 Çox
fərəhlənirəm ki, birincidə olduğu kimi, ikinci dəfə də
müsabiqədən qalib kimi qayıtdım. Yenə də qızıl medal,
sertifikat və pul mükafatına layiq görüldüm. Müsabiqədən
evə qayıdanda valideynlərimin sevinci yerə-göyə
sığmırdı. İlk dəfə idi ki, onları bu qədər sevinən
görürdüm. İlk dəfə qalib kimi evə qayıtdığımdan bəri
hiss edirəm ki, ailəmiz və qohumlarımız mənim
uğurlarımla fəxr edirlər.
Biz evdə iki uşağıq. Evin kiçiyi mənəm. Doğmalarım nə
qədər mənimlə qürur duyurlarsa, mən də bir o qədər
qardaşım Fəridlə fəxr edirəm. Çünki o, çox şərəfli bir
yolda- Naxçıvanda hərbi xidmətdə, vətənimizin
keşiyindədir.
- İbrahim, məktəb dövrü ömrün elə illəridir ki, dərslərə
cüzi bir etinasızlıq, diqqətsizlik gələcəkdə xoşagəlməz
nəticələrə gətirib çıxarar. Yəni, vurğulamaq istədiyim
odur ki, şagirdin ən ümdə vəzifəsi dərslərini səylə
oxumaq, bilik qazanmaqdır.
- Əlbəttə, mən bunu tam ciddiyyəti ilə başa düşür və
çalışıram ki, bir dəqiqəmi də hədər yerə sərf etməyim.
Bir məktəbli olaraq mənim əsas vəzifəm müəllimlərimin
verdiyi bütün tapşırıqlara məsuliyyətlə yanaşmaq, onları
vaxtında və dəqiq yerinə yetirməkdir.
Azərbaycan neft-qaz yataqlarının zənginliyi ilə bütün
dünyada tanınır. Mən də gələcəkdə, yəni, ali təhsil
aldıqdan sonra neft-qaz sahəsi üzrə ixtisaslı mütəxəssis
kimi yetişmək, respublikamızın daha da çiçəklənməsində
öz töhfəmi vermək arzusundayam.
Mən hazırda "Gənc istedadlar" liseyinin IX sinif
şagirdiyəm və I ixtisas qrupu üzrə imtahanlara
hazırlaşıram. Heft-qaz mühəndisliyi üzrə ali təhsil
almaq, seçdiyim ixtisasa yiyələnəndən sonra isə öz
potensialımı ölkə iqtisadiyyatımızın və neft sənayemizin
inkişafına yönəltmək, bu sahələrdə ən aparıcı simalardan
biri olmaq arzusundayam. Mənim ən qlobal istəyim budur
ki, əməyimiz, elmimiz, bacarığımız sayəsində
Azərbaycanın adı inkişaf etmiş ölkələrin sırasında
çəkilsin.
- Səndə elmə marağı əsas kim oyadıb, müəllimlərin, yoxsa
valideynlərin?
- Təbii ki, bütün övladlar kimi mən də valideynlərimi
özüm üçün müqəddəs varlıq hesab edirəm. Mənim anam evdar
qadındır. Atam isə dini təhsil görüb. Demək istəyirəm
ki, elmə olan sonsuz marağımı məndə məhz müəllimlərim
yaradıblar. Onlar təhsil yollarında mənim üçün bir yol
göstərən mayakdırlar.
- Təbii ki, asudə vaxt sarıdan çətinliyin olur. Elə bir
təsadüf olubmu ki, stadionda futbol oynayan uşaqları
görüb həvəsə düşəsən?
- Belə təsadüflər çox olub. Əslində futbolun ən sevdiyim
idman növü olmasına baxmayaraq, futbol oynamaq həvəsimi
həmişə içimdə boğmuşam. Düşünmüşəm ki, mənim üçün əsas
şərt elm, savad qazanmaq, müəllimlərimin və
valideynlərimin etimadlarını doğrultmaqdır.
- Özünə ən yaxın dost kimi hesab edirsən?
- Mənim məktəbdə də, qohum və tanışlar arasında da
çoxlu dostlarım var. Ancaq özümə ən yaxın dost, sirdaş
qardaşım Fəridi hesab edirəm.
- Hobbin nədir?
- Mütaliə. Ən son oxuduğum kitab alleqorik şəkildə
qələmə alınsa da, əslində tarixi əsərdir.
- Ən böyük arzun nədir?
- Torpaqlarımızın işğal altında qalan hissəsinin azad
olunması elliklə hamımızın arzusudur.
 Gülər
Əliyeva: -
1997-ci il dekabrın 28-də Bakıda anadan olmuşam. Əslən
Ordubaddanıq. Anam da BDU-nun məzunudur. İxtisasca
riyaziyyatçıdır. Atam isə ticarətçidir. Biz ailədə üç
uşağıq. Mən, bacım və qardaşım. Evimizin ilki mənəm.
Bacım da bizim liseyin şagirdidir. Qardaşım isə başqa
məktəbdə oxuyur. Hər üçümüz dərs əlaçısıyıq. Bizim
təhsil aldığımız "Gənc istedadlar" liseyi şagirdlərin
müsabiqələrdə iştirak etməsinə, yeni layihələr
hazırlamasına daha çox üstünlük verir.
Mən Bakıdakı 43 nömrəli tam orta məktəbdə I sinfə
getmişəm. IV sinfi başa vuranda "Gənc istedadlar"
liseyində təhsilimi davam etdirmək üçün imtahan vermiş
və qəbul olunmuşam. Bu lisey haqqında çox eşitmişdim.
Mənə isə bu fikrimdə anam dəstək oldu.
İlk oxuduğum məktəbdən ayrılmaq mənə çox çətin oldu.
Nərgiz adlı məktəb yoldaşımla indi də səmimi
əlaqələrimiz var.
İlk sinif müəllimim Rahibə xanımın məni necə
mehribanlıqla "qızım" çağırmasını hər zaman
xatırlayıram.
Mən gələcəkdə ali təhsil almaq üçün I ixtisas qrupu üzrə
imtahanlara hazırlaşıram. Buna baxmayaraq bütün fənləri
sevərək oxuyuram.
Əsrimiz texnologiya əsridir, mən də zamanın tələbinə
müvafiq texnologiya üzrə ixtisaslaşmaq istəyirəm. Bizim
gələcək həyatımız qarşıdakı iki ildən asılıdır.
Məqsədimizə çatmaq üçün hər dəqiqəmizin dəyərini
bilməliyik. Ali təhsilimi xarici ölkələrdən birində
almaq arzusundayam.
Ən sevdiyim fənlər riyaziyyat və fizikadır. Dəqiq
fənləri sevdiyim üçün riyaziyyat və fizikanı oxuyarkən
sanki dincəlirəm.
İlk dəfə IV sinifdə oxuyarkən müsabiqə iştirakçısı
olmuşam.
"İNEPO" beynəlxalq layihə olimpiadasında lisey yoldaşım
İbrahimlə mən iştirak etdik. Ətraf mühitin mühafizəsinə
həsr olunmuş müsabiqədə İbrahimlə birgə təqdim etdiyimiz
layihə yüksək qiymətləndirildi və nəticədə biz qızıl
medala layiq görüldük. Kənd təsərrüfatı məhsullarının və
mallarının ultrasəs vasitəsilə qorunmasından bəhs edən
layihəmiz böyük maraq doğurdu. Bizim təklif etdiyimiz
ultrasəs nə insanlara, nə heyvanlara, nə də bitkilərə
heç bir mənfi təsir göstərmir. O, sadəcə ziyanvericiləri
məhv edir. Layihəmizi hazırlamaqda müəllimimiz Fazil
Orucov bizə çox yaxından kömək etdi, bilmədiklərimizi
başa saldı.
Qasım Hüseynov, BDU-nun professoru, "Gənc istedadlar"
liseyinin direktoru:
İbrahim Abbasov və Gülər Əliyeva liseyimizin ən fəal
şagirdlərindəndir. Hər ikisi həm "əla" qiymətlərlə
oxuyur, həm də ictimai işlərdə fəal iştirak edirlər.
Bu yaxınlarda Sumqayıt və Bakı məktəbləri arasında
"Sabahın alimləri" müsabiqəsi keçirilmişdir. Həmin
müsabiqədə tibb nominasiyası üzrə İbrahimlə Gülər
birlikdə bir layihə hazırlamışdılar. Həmin nominasiyada
İbrahimlə Gülər birinci yeri tutdular. Hesab edirəm ki,
bu, çox böyük uğur idi, çünki həmin nominasiya üzrə
təqdim edilən layihələrin sayı həddindən artıq çox idi.
Bilirsiniz ki, bu yaxınlarda, konkret olaraq aprelin
5-də və 6-da "Ətraf mühitin mühafizəsi" mövzusunda
keçirilən müsabiqədə İbrahimlə Gülər də iştirak
etmişdilər. Məktəbimizin fizika müəllimi Firuz Kərimovun
elmi rəhbərliyi altında şagirdlərimizin hazırladıqları
layihə müsabiqədə qızıl medala layiq görülmüşdür. Yəni,
İbrahimlə Gülər birinci yeri qazandılar, qızıl medalla
bərabər sertifikat və pul mükafatı da aldılar.
Bilirsiniz, indi təbiətdə kənd təsərrüfatı
ziyanvericiləri həddindən artıq çoxdur. Onları
zərərsizləşdirmək tədbirləri səmərəsiz qalır. Adətən
onları zərərsizləşdirmək məqsədi ilə DTT, xlorofos,
metafos və s. kimi kimyəvi maddələrdən istifadə olunur.
Amma bu maddələr zərərvericilərlə bərabər insan
orqanizmi üçün də çox təhlükəlidir və onun məhvinə
gətirib çıxardır.
Şagirdlərin təklif etdikləri qurğu isə müəyyən
elektrotezlikli səslər çıxardır, həmin səsin təsirindən
zərərvericilər olduqları yerdən uzaqlaşırlar. Müsabiqədə
olan münsiflər heyətinin üzvləri bu işi yüksək
qiymətləndirdilər. Mən inanıram ki, İbrahim də, Gülər
də gələcəkdə daha böyük uğurlara imza atacaqlar.
Hazırladı: Ellada UMUDLU |
