|
 BSU-da
X şagird-tələbə elmi konfransı
Bakı Slavyan Universitetində ulu öndər Heydər Əliyevin
anadan olmasının 90-cı ildönümünə həsr olunmuş "Müasir
Azərbaycan ulu öndər Heydər Əliyev ideyaları işığında"
mövzusunda X şagird-tələbə elmi konfransı keçirilmişdir.
BSU Məktəb-Lisey Kompleksi Şagird Elmi Cəmiyyətinin və
Universitet Tələbə Elmi Cəmiyyətinin yaxından iştirakı
ilə təşkil olunmuş konfransın Təşkilat komitəsinə 218
şagird və tələbənin məruzəsinin tezisləri təqdim
olunmuşdur.
Konfransın əsas əhəmiyyəti ondan ibarətdir ki, tədbirə
Bakı, Sumqayıt və Abşeron məktəbliləri və BSU-nun
müxtəlif fakültələrinin tələbələri ilə yanaşı, Şuşa,
Laçın, Ağdam, Xocavənd, Cəbrayıl rayonlarında yerləşən
qaçqın və köçkün məktəblərinin istedadlı şagirdləri də
fəal şəkildə qoşulmuşlar. 2004-cü ildən mütəmadi olaraq
keçirilən şagird-tələbə elmi konfransına qaçqın
məktəblərinin şagirdlərinin cəlb olunması Azərbaycan
Respublikasının Prezidenti İlham Əliyevin istedadlı və
qabiliyyətli uşaqlara qayğının artırılması ilə bağlı
fərmanına uyğun Bakı Slavyan Universitetinin həyata
keçirdiyi ən mühüm layihələrdən biridir.
Konfransın işi "Heydər Əliyev və Azərbaycan
iqtisadiyyatı", "Ulu öndər və müasir Azərbaycan təhsili",
"Heydər Əliyev və Azərbaycan mədəniyyəti və ədəbiyyatı",
"Ulu öndərin irsini necə öyrənir və təbliğ edirik?", "Müasir
Azərbaycanda gənclər və idman hərəkatı" bölmələri üzrə
təşkil olunmuşdu. Məktəblilər, tələbələr, qaçqın və
köçkün məktəblərinin gənc istedadları ana dili ilə
yanaşı xarici dillərdə də məruzələrlə çıxış etmişlər.
Bölmə iclaslarına universitetin alimləri və məktəb
müəllimləri ilə birgə şagird və tələbələr də rəhbərlik
edirlər.
Plenar iclasda AMEA-nın Humanitar və ictimai elmlər
bölməsinin akademik katibi, BSU-nun rektoru, AMEA-nın
müxbir üzvü, professor K.Abdullayev çıxış edərək
universitetin professor-müəllim heyətinin qaçqın
məktəblərin istedadlı şagirdlərinin elmi işlərinə
rəhbərliyini, BSU-nun bu məktəblərlə sıx əməkdaşlığını
vurğulamış və bu işdə zəhməti keçən əməkdaşlara
təşəkkürünü bildirmişdir. Son tədris ili ərzində Bakı
Slavyan Universiteti Tədris hissəsinin Şuşa rayon Təhsil
İdarəsi və BSU Məktəb-lisey kompleksinin Malıbəyli kənd
1 nömrəli tam orta məktəbi ilə əməkdaşlığının faydasını
qeyd etmişdir.
Açılış mərasimində çıxış edən Bakı şəhər 190 nömrəli
orta məktəbin direktoru Afət Bakıxanova, 132-134 nömrəli
təhsil kompleksinin direktoru Sara Xanlarova, Ağdam
rayon 24 nömrəli tam orta məktəbin direktoru Nəriman
Məmmədov, Azərbaycan Tibb Universitetinin professoru
Məhbubə Vəliyeva, BSU Məktəb-lisey kompleksi Şagird
parlamentinin sədri Oksana Sokolova, BSU Məktəb-lisey
kompleksinin direktoru, professor Telman Cəfərov şagird-tələbə
konfransının əhəmiyyətini vurğulamışlar və çıxışçılara
uğurlar diləmişlər.
Açılışın sonunda Şuşa rayon məktəbliləri və BSU Məktəb-Lisey
Kompleksinin şagirdləri konfrans iştirakçılarını konsert
proqramı ilə salamlamışlar.
Elmi konfransda BSU Məktəb-Lisey Kompleksinin, Şuşa
rayon Malıbəyli kənd tam orta məktəbinin, Heydər Əliyev
adına Müasir Təhsil Kompleksinin, Bakı Türk Anadolu
Liseyinin, akademik Zərifə Əliyeva adına liseyin, Heydər
Əliyev adına liseyin, BDU "Gənc istedadlar" liseyinin,
Bakı şəhəri 132-134 nömrəli təhsil kompleksinin,
İncəsənət Gimnaziyasının, 1, 190, 18, 42, 46, 133, 164
nömrəli, Ağdam rayonu 24 nömrəli, Xocavənd rayonu Tuğ
kənd, Laçın rayonu Kaha kənd və s. orta məktəblərin
VII-XI sinif şagirdləri, BSU tələbələri maraqlı
məruzələrlə çıxış etmişlər.
Bağlanışdan öncə şagirdlərin universitetlə tanışlığına
şərait yaradılmışdır. Şagird-tələbə elmi konfransının
bağlanışı onunla paralel keçirilən və ulu öndərin
yubileyinə həsr edilən Magistrantların Beynəlxalq Elmi
konfransı ilə birgə təşkil olunmuşdur ki, bu da
universitet auditoriyasında şagird, tələbə, magistr
tanışlığı və əməkdaşlığının gözəl nümunəsinə çevrildi.
Bölmələrdə fərqlənən şagirdlərə diplom və hədiyyələr
verilmişdir. |
