|
Naxçıvan şəhərindəki Heydər Əliyev Muzeyində Naxçıvan
Özəl Universitetinin tələbələrinin iştirakı ilə "Heydər
Əliyev və Azərbaycan" mövzusunda elmi-praktik konfrans
keçirilmişdir. Ümummilli liderin 90 illik yubileyi ilə
əlaqədar təşkil edilmiş konfransı giriş sözü ilə
Naxçıvan Özəl Universitetinin prorektoru Əli Yusifov
açaraq qeyd etmişdir ki, müstəqil Azərbaycanın qurucusu
ulu öndər Heydər Əliyev şərəfli həyat və fəaliyyəti ilə
xalqımızın simvolu səviyyəsinə yüksəlmişdir.
Vurğulanmışdır ki, xilaskarlıq missiyası ümummilli
liderimizin genişmiqyaslı fəaliyyətinin birmənalı olaraq
əsasını təşkil etmişdir. Heyrətamiz idarəçilik
istedadına, mətin iradəyə və misilsiz əzmkarlığa malik
ulu öndərimiz Azərbaycanda siyasi hakimiyyətə ilk
gəlişində ölkəmizi tənəzzül burulğanından çıxararaq
"imzalar içində imzası olmayan", hətta keçmiş SSRİ
məkanında belə, yaxşı tanınmayan respublikamızı qısa
vaxt ərzində qabaqcıl və nüfuzlu ölkə səviyyəsinə
yüksəldə bilmişdir. 1982-87-ci illərdə fövqəldövlət olan
keçmiş SSRİ-nin rəhbərlərindən biri kimi ən çətin və
mürəkkəb sahələrə nəzarət edən ümummilli liderimiz
müstəsna təşkilatçılığı, siyasi uzaqgörənliyi, iti
zəkası və qibtəolunası işgüzarlığı ilə xalq arasında
böyük hörmət və şöhrət qazanmış Heydər Əliyev fenomeni
xarici dövlətlərin tanınmış siyasi liderlərinin, kütləvi
informasiya vasitələrinin daim diqqət mərkəzində
olmuşdur.
Qeyd olunmuşdur ki, ötən əsrin 90-cı illərinin əvvəlində
naşı və səriştəsiz rəhbərliyin nəticəsi olaraq
Azərbaycanda yaranmış xaos, iqtisadi və sosial böhran,
vətəndaş müharibəsi və dövlət müstəqilliyinin itirilməsi
təhlükəsi yenə də müdrik şəxsiyyət Heydər Əliyevin
1993-cü il iyunun 15-də ölkəmizdə siyasi hakimiyyətə
qayıdışı ilə aradan qaldırılmış, dövlət çevrilişlərinin
qarşısı alınmış, Azərbaycan dinamik inkişaf yoluna qədəm
qoymuşdur. Dövlət müstəqilliyimizin qorunub
saxlanmasında, dövlətçiliyimizin möhkəmləndirilməsində,
daxili və xarici siyasətin xalqın mənafeyinə uyğun
qurulmasında, iqtisadi, sosial və mədəni sahələrdə
inkişafın təmin edilməsində, milli mənəvi dəyərlərin
dirçəlişində, azərbaycançılıq məfkurəsinin milli
ideologiyaya çevrilməsində ölçüyəgəlməz xidmətləri dahi
rəhbərə sonsuz ehtiram, məhəbbət və əbədiyyət
qazandırmışdır.
Sonra məruzə ətrafında Heydər Əliyev Muzeyinin direktoru
Ramil Orucəliyevin, Naxçıvan Özəl Universiteti YAP ərazi
ilk təşkilatının sədri Mehman Şabanovun çıxışları
olmuşdur. Çıxışlarda qeyd edilmişdir ki, ümummilli
liderimiz Heydər Əliyevin dövlətçilik amalı XX əsrin
90-cı illərində dəyəri heç bir tarixi hadisə ilə
müqayisəyə gəlməyən nəticə vermişdir. Ulu öndərimiz
Heydər Əliyev yaxın və uzaq gələcəkdə uğur qazanmağın,
Azərbaycanı inkişaf etdirməyin aydın yollarını
göstərmiş, ən dəqiq strategiya və taktikanı müəyyən
etmişdir. Ötən illər ərzində ölkədə müşahidə olunan
sosial-iqtisadi inkişaf, qüdrətli ordu quruculuğu,
respublikamızın regionda lider dövlətə çevrilməsi və
Azərbaycanın beynəlxalq aləmdə nüfuzunun ildən-ilə
artması dahi rəhbərin siyasətinin düzgünlüyünü və
alternativsizliyini bir daha təsdiq edir.
Ulu öndərimizin həyat və fəaliyyəti haqqında filmin də
nümayiş etdirildiyi tədbirin sonunda tələbələri
maraqlandıran suallar cavablandırılmışdır.
Nuray ƏSGƏROVA,
Naxçıvan Özəl Universitetinin Mətbuat xidmətinin
rəhbəri |
