|
 Bakıdakı
70 nömrəli məktəb-liseydə görkəmli dövlət xadimi,
tariximizə qurucu xilaskar kimi daxil olmuş ümummilli
lider Heydər Əliyevin anadan olmasının 90-cı
ildönümünə həsr edilmiş "Qəlblərdə əbədi yaşayacaqsan"
mövzusunda tədbir keçirilmişdir.
Tədbir iştirakçıları məktəbin foyesində və dəhlizində
açılmış şagirdlərin əl işlərindən ibarət sərgi ilə tanış
olmuşlar. Məktəbin direktoru Nazim Qasımov qeyd
etmişdir ki, ümummilli lider Heydər Əliyevin əziz
xatirəsi Azərbaycan xalqının qəlbində əbədi
yaşayacaqdır. Bildirilmişdir ki, Heydər Əliyev
şəxsiyyətinin müdrikliyi, böyüklüyü ondadır ki, onun
ideyaları, əməli fəaliyyəti təkcə bu günlə
məhdudlaşmamış, həm də uzaq gələcəyə ünvanlanmışdır.
Azərbaycan tarixinin 1969-cu ilin 14 iyulundan sonrakı
dövrünün əhatəli təhlili və qiymətləndirilməsi belə
bir həqiqəti aşkar edir ki, Heydər Əliyevin
respublikaya rəhbər seçilməsindən sonra ölkəmizin
ictimai-siyasi həyatında, o cümlədən maarif və təhsil
sahəsində açıq müşahidə edilən tənəzzül prosesinə son
qoyulmuşdur. 70-80-ci illərdə Azərbaycan intibahını
şərtləndirən, onu səciyyələndirən mühüm amillər
sırasında təhsilin, elmin, mədəniyyətin yüksəlişi
xüsusilə diqqəti cəlb etmişdir. Heydər Əliyevin
uzaqgörənliklə əsasını qoyduğu təhsil ənənələri
sırasında azərbaycanlı gənclərin respublikamız üçün
gərəkli ixtisaslara yiyələnmələrindən ötrü keçmiş
sovetlər ölkəsinin qabaqcıl ali məktəblərinə
göndərilməsi təcrübəsi xüsusi yer tutmuşdur. Hər il
qabiliyyətli gənclərin böyük bir hissəsinin SSRİ-nin
elm və tədris ənənələri ilə tanınmış qabaqcıl ali
məktəblərinə göndərilməsi Heydər Əliyevin uzaqgörən
siyasətinə ən bariz nümunədir.
Şagirdlər ümummilli lider Heydər Əliyevə həsr edilmiş
mahnılar oxuyub, şeirlər söyləmişlər. Monitor vasitəsilə
ulu öndərin həyat və fəaliyyətindən bəhs edən görüntülər
nümayiş etdirilmişdir. Ümummilli liderin layiqli
davamçısı möhtərəm Prezidentimiz İlham Əliyevin apardığı
daxili və xarici siyasəti işıqlandıran görüntülər də
monitor vasitəsilə göstərilmişdir.
Çıxış edənlər dünya siyasətinin nəhəngi, Azərbaycan
xalqının müdrik oğlu, müstəqil Azərbaycan
Respublikasının memarı və qurucusu Heydər Əliyevin
uzaqgörən siyasətindən, ömrünü Vətəninə və millətinə
həsr etməsindən söz açmışlar.
Tədbirin sonunda təhsil ocağında ulu öndər Heydər
Əliyevin 90 illiyi ilə əlaqədar müasir təlim
texnologiyalarının tətbiqi ilə siniflərdə "açıq dərs"lər
dinlənilmişdir.
Rəşad ZİYADOV |
