|
Aprelin 18-də Naxçıvan Müəllimlər İnstitutu Naxçıvan
şəhər 10 nömrəli tam orta məktəblə birlikdə ümummilli
lider Heydər Əliyevin 90 illik yubileyinə həsr olunmuş
"Məktəbdə psixoloji xidmətin aktual problemləri"
mövzusunda elmi-praktik konfrans keçirmişdir.
Konfransda çıxış edən Naxçıvan Şəhər Təhsil Şöbəsinin
baş məsləhətçisi Sabir Məmmədov bildirmişdir ki, bu gün
ulu öndərimiz Heydər Əliyevin 90 illik yubileyi
ərəfəsində hər bir məktəbdə yüksək səviyyəli tədbirlər
keçirilir. Bu tədbir də silsilə tədbirlərin davamıdır.
Naxçıvan Müəllimlər İnstitutu ilə birgə həyata
keçirdiyimiz bütün işlər təhsilin inkişafına yönəlmişdir
və "Məktəbdə psixoloji xidmətin aktual problemləri"nin
müzakirəsinə həsr olunur. Ali təhsil müəssisəsi ilə
məktəbin qarşılıqlı əlaqəsi həm də şagirdlərin ali
təhsil müəssisəsi ilə əlaqəsinin yaradılmasına xidmət
edir.
Naxçıvan Muxtar Respublikasının Təhsil Nazirliyinin şöbə
müdiri Firudin Zamanov çıxış edərək təhsil islahatının
günün vacib məsələsinə çevrilməsindən danışmışdır.
Naxçıvan Müəllimlər İnstitutunun rektoru, professor Oruc
Həsənli çıxış edərək bildirmişdir ki, yeni təhsil
islahatının həyata keçirilməsi ümummilli liderimiz
Heydər Əliyevin 15 iyun 1999-cu il tarixli, 168 saylı
sərəncamı ilə başlamışdır. Təhsil islahatının əsas
məqsədi iki şəxs - öyrədən və öyrənən arasındakı fərdi
təlim prosesindən başlayaraq beynəlxalq təhsil
şəbəkəsinədək genişlənən bir yolda uşaqların idrak
fəaliyyətini inkişaf etdirməkdən ibarətdir. Bu yolda
bütün ağırlıq müəllimlərlə yanaşı eyni zamanda məktəb
psixoloqunun da üzərinə düşür. Məktəbdə psixoloji
xidmətin düzgün təşkili və həyata keçirilməsi xarakter
müxtəlifliyinə malik olan uşaqların gələcəyin əsl
vətəndaşı olacaq şəxsiyyət kimi formalaşmasına gətirib
çıxarır. Müəllimlər İnstitutunun məktəblərlə birlikdə
apardığı işin də mərkəzində insan amili, şəxsiyyət amili
dayanır.
İnstitutun müəllimi Çinarə Qurbanlı, metodist Mənsim
Tarverdiyev, 10 nömrəli məktəbin psixoloqu Aynurə
Həsənova çıxış edərək məktəb psixoloji xidmətinin aktual
problemlərindən danışmışlar.
Naxçıvan Müəllimlər İnstitutunun IV kurs tələbəsi
Gülnar Mövsümova şair-dramaturq Həsənəli Eyvazlının
"Naxçıvan haqqında ballada" poemasından bir parçanı
bədii qiraətlə söyləmişdir.
Naxçıvan Müəllimlər İnstitutunun rektoru, professor Oruc
Həsənli məktəbə psixoloji xidmət işi ilə bağlı 3000
səhifəlik, kurikulumla əlaqədar isə 1000 səhifəlik
tədris materialının elektron variantını, o cümlədən
professor Oruc Həsənlinin metodistlər Səmayə Əliyeva və
Səkinə Həsənova ilə birlikdə yazdığı "Məktəb
psixoloqunun stolüstü lüğəti" metodik kitabını,
"Kurikulumların hazırlanması və tətbiqi məsələləri",
"Azərbaycan xalq mahnıları və klassik romansları" adlı
kitabları məktəbə hədiyyə etmişdir.
Naxçıvan Müəllimlər İnstitutunun Mətbuat xidməti |
