|
 AMİ-nin
Şamaxı filialında ümummilli lider Heydər Əliyevin anadan
olmasının 90 illik yubileyi ilə əlaqədar silsilə
tədbirlər keçirilir. Aprelin 19-da "Azərbaycan
ədəbiyyatının tarixi inkişafında Heydər Əliyev
mərhələsi" mövzusunda keçirilmiş "dəyirmi masa" bu
tədbirlərdən biri oldu.
Tədbir ümummilli lider Heydər Əliyevin siyasi
hakimiyyəti illərində ədəbiyyat və incəsənət xadimləri
ilə görüşlərini, yubiley mərasimlərində, görkəmli
şəxsiyyətlərin abidələrinin, ev-muzeylərinin açılışında
çıxışlarını əks etdirən filmin nümayişi ilə başlamışdır.
Filialın direktoru, filologiya elmləri üzrə fəlsəfə
doktoru Tünzalə Yusifova tədbiri giriş sözü ilə açaraq
ümummilli lider Heydər Əliyevin istər birinci, istərsə
də ikinci hakimiyyəti illərində milli mənəvi
dəyərlərimizin qorunması, tətbiqi, tədqiqi və nəşri
sahəsində tarixi xidmətlərindən bəhs etmişdir.
Vurğulanmışdır ki, ulu öndər Heydər Əliyev Azərbaycan
ədəbiyyatının klassiklərinin tədqiqi və nəşri, yubiley
mərasimlərinin keçirilməsi, abidələrinin, muzeylərinin
yaradılması sahəsində əvəzolunmaz işlər görmüşdür. İlk
dəfə 1974-cü ildə dahi Azərbaycan şairi İ.Nəsiminin 600
illik yubileyinin YUNESKO-nun xətti ilə keçirilməsi,
"Kitabi-Dədə Qorqud" dastanlarının 1300 illik möhtəşəm
yubiley tədbirləri məhz bu dahi şəxsiyyətin adı ilə
bağlıdır. Humanitar və xüsusi fənlər kafedrasının
müdiri, dosent M.Alıcanov "Heydər Əliyev - Azərbaycan
mədəniyyətinin qarantı", dil, ədəbiyyat və onların
tədrisi metodikası kafedrasının müdiri E.Eminalıyev
"Heydər Əliyev və türk xalqları ədəbiyyatı", həmin
kafedranın müəllimi R.Quliyeva "Azərbaycan ədəbiyyatında
əbədi obraz" mövzularında maraqlı çıxışlar etmişlər.
Tələbələrdən Elvin Bəhrəmov, Əfruz Əhmədli, Natəvan
Zülfiqarova, Səxavət Cəfərov mövzu ətrafında çıxış
edərək ulu öndərin mədəniyyətimizin inkişafındakı tarixi
rolunun gənclər tərəfindən böyük sevgi ilə öyrənildiyini
bildirmişlər.
Filialın kitabxanasında ümummilli lider Heydər Əliyevin
yubileyi ilə əlaqədar kitab sərgisi təşkil edilmiş, ulu
öndərin diqqət və qayğısı sayəsində nəşr olunmuş
nüsxələr nümayiş etdirilmişdir. |
