|
Aprelin 23-də Azərbaycan Müəllimlər İnstitutunda (AMİ)
ümummilli lider Heydər Əliyevin 90 illik yubileyi ilə
bağlı "Azərbaycan ədəbiyyatının tarixi inkişafında
Heydər Əliyev mərhələsi" mövzusunda "dəyirmi masa"
keçirilmişdir. İnstitutun rektoru, Milli Məclisin
deputatı, professor Aqiyə Naxçıvanlı tədbiri giriş sözü
ilə açaraq qeyd etmişdir ki, bu il ümummilli lider
Heydər Əliyevin 90 illik yubileyi respublikamızın bütün
müəssisələrində, o cümlədən AMİ və onun on bir
filialında silsilə tədbirlərlə qeyd olunur. Rektor
A.Naxçıvanlı tədbirin əhəmiyyətindən danışaraq
bildirmişdir ki, istər sovet dövründə, istərsə də
müstəqillik illərində ulu öndər Heydər Əliyevin siyasi
fəaliyyətində və ideya-nəzəri irsində aparıcı yer tutan
məsələlərdən birincisi və ən vacibi Azərbaycan xalqının
milli şüurunun inkişafı və möhkəmlənməsi olmuşdur. Hələ
sovet illərində N.Gəncəvinin, M.Füzulinin, İ.Nəsiminin,
H.Cavidin, S.Vurğunun və digər korifeylərin
yaradıcılıqlarına diqqət, onların ideyalarının,
əsərlərinin geniş təbliği Heydər Əliyevin fəaliyyətində
aparıcı yer tuturdu. Bu siyasət hazırda Azərbaycan
Respublikasının Prezidenti cənab İlham Əliyev tərəfindən
uğurla davam etdirilir.
AMEA Folklor İnstitutunun əməkdaşı Tahir Paşazadə "Heydər
Əliyev - milli mənəvi dəyərlərin fədaisi" mövzusunda
çıxış edərək bildirmişdir ki, ulu öndər Heydər Əliyevin
milli mənəvi dəyərlərin qorunub yaşadılması siyasətinin
özəyini dərin elmilik təşkil etmişdir. Ümummilli lider
Heydər Əliyev bütün hakimiyyəti illərində, hətta DTK-ya
rəhbərlik etdiyi dövrlərdə də Azərbaycanın milli
dəyərləri, vətənpərvərlik tarixi uğrunda çalışan, soy-kökümüzün
həqiqətlərini üzə çıxaranların imperiya basqılarından
qorunması naminə əlindən gələni etmişdir. Xüsusilə də
hakimiyyətinin ikinci dövründə qloballaşmanın artan
təhlükələri qarşısında daha da böyük fədakarlıqla milli
mənəvi irsimizin qorunmasına xüsusi önəm vermişdir.
Əlizadə Əsgərli "Milli idealda azərbaycançılıq təfəkkürü"
mövzusunda çıxış edərək ulu öndər Heydər Əliyevin
ideyalarının, onun siyasi fəaliyyətinin çoxşaxəli, dərin
məzmunlu olduğunu və həmişə uğur gətirdiyini
vurğulamışdır. Ulu öndərin irəli sürdüyü azərbaycançılıq
ideologiyası həm də milli mənəvi dəyərlərin, dövlətçilik
ideologiyasının qorunmasını ən mühüm şərt kimi önə çəkir.
Azərbaycan ədəbiyyatı və onun tədrisi metodikası
kafedrasının müdiri Ramil Əliyev, ibtidai və
məktəbəqədər təhsilin metodikası kafedrasının müdiri,
professor Mircəfər Həsənov da çıxış edərək bildirmişlər
ki, ulu öndər Heydər Əliyev bütün həyatı boyu xalqın
tarixən formalaşmış yüksək əxlaqi-mənəvi dəyərlərinə,
xalqımızın ədəbiyyat tarixində böyük iz buraxmış
şairlərin, eləcə də müasir dövrdə yaşayıb yaradan
görkəmli ədiblərin yubileylərinin keçirilməsinə hər
zaman xüsusi diqqət göstərmişdir.
Tədbirin sonunda Yeni Azərbaycan Partiyasının yeni üzvü
olan bir neçə tələbəyə partiya biletləri təqdim
olunmuşdur.
AMİ-nin Mətbuat xidməti |
