|
 Aprelin
16-da AMİ-nin Şamaxı filialında görkəmli Azərbaycan
şairəsi Məhsəti Gəncəvinin 900 illik yubileyinə həsr
olunmuş elmi-praktik konfrans keçirildi. Tədbir xalq
artisti Həsənağa Turabovun ifasında Məhsəti Gəncəvinin
rübailərinin lent yazısının səslənməsi ilə başlandı.
Tədbiri giriş sözü ilə açan filialın direktoru,
filologiya elmləri üzrə fəlsəfə doktoru T.Yusifova qeyd
etdi ki, bu gün milli mənəvi dəyərlərinin sahibi olan
müstəqil Azərbaycan Respublikasında görkəmli
şəxsiyyətlərin yubileylərinin keçirilməsi ənənə halını
almışdır. Azərbaycan Respublikasının Prezidenti cənab
İlham Əliyev 2013-cü il yanvarın 16-da görkəmli şairə
Məhsəti Gəncəvinin 900 illik yubileyinin keçirilməsi
haqqında sərəncam imzalayıb. Təsadüfi deyildir ki,
Məhsəti Gəncəvinin 900 illik yubileyi YUNESKO-nun
görkəmli şəxsiyyətlərin və əlamətdar hadisələrin qeyd
olunması proqramına da daxil edilmişdir. T.Yusifova
Məhsəti Gəncəvini yetirən XII əsr Azərbaycan intibah
mədəniyyətinin özəlliklərindən, Azərbaycan
dövlətçiliyinin tarixindən də bəhs etdi.
Sonra dil-ədəbiyyat və onların tədrisi metodikası
kafedrasının müdiri E.Eminalıyev "Məhsəti Gəncəvinin
həyat və yaradıcılığı" mövzusunda geniş məruzə ilə çıxış
etdi. O qeyd etdi ki, Məhsəti Gəncəvi yaradıcılığının
əsas leytmotivi olan humanizm, azad cəmiyyət, qadına
ehtiram Avropa şərqşünaslarını belə heyran etmiş,
Azərbaycan-islam intibahının yetirməsi olan bu sənətkara
onlarla elmi, bədii əsər həsr olunmuşdur. Məhsəti
Gəncəvi dünya ədəbiyyatının görkəmli sənətkarlarının
cərgəsində şərəfli yer tutur.
 Kafedranın
baş müəllimi Ə.Əkbərov Məhsəti Gəncəvi rübailərinin
dünya xalqlarının dillərinə, xüsusən rus dilinə
tərcüməsi məsələsi üzərində dayanaraq bu sahədə görülən
işlərdən, vacib məsələlərdən bəhs etdi. Baş müəllim
M.Maqsudov "Məhsəti yaradıcılığının bəzi məqamları
haqqında", S.Baxşıyeva "Məhsəti rübailərinin dil-üslub
xüsusiyyətləri" mövzularında çıxışlar etdilər.
Tədbirdə filialın Azərbaycan dili və ədəbiyyatı
müəllimliyi ixtisasının tələbələrindən Xəyalə Tağıyeva,
Səadət Zülfüqarova və Tünzalə Mustafayeva Məhsəti
Gəncəvinin yaradıcılığından danışaraq onun rübailərindən
parçalar səsləndirdilər.
Filialın kitabxanasında Məhsəti Gəncəvinin 900 illik
yubileyi münasibətilə şairənin yaradıcılığını əks
etdirən guşə hazırlanmış, oxu zalında bədii qiraət
gecəsi keçirilmişdir. |
