|
Paytaxtımızda təşkil olunmuş ekologiya, ətraf mühitin
mühafizəsi problemləri və onların həlli yollarına həsr
edilən Ətraf Mühitin Mühafizəsi VII Beynəlxalq Layihə
Olimpiadası (İNEPO-Avrasiya) ilə bağlı aprelin 2-də Bakı
Özəl Türk Liseyində KİV nümayəndələri üçün mətbuat
konfransı keçirildi.
Tədbiri Azərbaycan-Türkiyə Özəl Liseyləri Baş İdarəsinin
rəisi, Ətraf Mühitin Mühafizəsi VII Beynəlxalq Layihə
Olimpiadasının (İNEPO-Avrasiya) təşkilat komitəsinin
sədri Məsud Kurnaz açaraq olimpiada barədə media
nümayəndələrinə ətraflı məlumat verdi. Bildirdi ki, 5-6
aprel tarixlərində Bakıda ümummilli lider Heydər
Əliyevin anadan olmasının 90 illiyinə həsr edilmiş Ətraf
Mühitin Mühafizəsi VII Beynəlxalq Layihə Olimpiadası
(İNEPO-Avrasiya) keçiriləcəkdir. Azərbaycan
Respublikası Təhsil Nazirliyi, Heydər Əliyev Fondunun
vitse-prezidenti Leyla xanım Əliyevanın təsisçisi olduğu
İDEA Ətraf Mühit Kampaniyası, Ekologiya və Təbii
Sərvətlər Nazirliyi, Azərbaycan Respublikası Dövlət Neft
Şirkəti, "Çağ" Öyrətim İşlətmələri Şirkəti,
"İNEPO-Avrasiya" Ekologiya İctimai Birliyi və İctimai
Televiziya və Radio Yayımları Şirkətinin birgə
təşkilatçılığı ilə təşkil olunan bu mötəbər tədbirdə
dünyanın 45 ölkəsindən 500-ə yaxın məktəbli
yarışacaqdır.
Məsud Kurnaz şagirdlərin bu olimpiadaya böyük həvəs
göstərdiklərini söyləyərək təqdim olunan layihələrdə
ətraf mühitin mühafizəsi, ekologiya ilə bağlı bir sıra
problemlərin öz əksini tapdığını və hazırlanmış xüsusi
stendlərin ölkə ictimaiyyəti tərəfindən maraqla
qarşılanacağından əmin olduğunu bildirdi.
"Çağ" Öyrətim İşlətmələri Şirkəti İdarə Heyətinin sədri
Ənvər Özərən hazırda dünyada qlobal problemlərdən
birinin məhz ekoloji tarazlığın pozulması olduğunu
deyərək paytaxtımızda keçirilən Ətraf Mühitin Mühafizəsi
VII Beynəlxalq Layihə Olimpiadasının (İNEPO-Avrasiya) da
məktəblilərimizin dünyanın 45 ölkəsindən gəlmiş
şagirdlərlə birlikdə ekologiya, ətraf mühitin qorunması
ilə bağlı öz fikir və təkliflərini bölüşməyə,
problemlərin həlli yollarını göstəməyə xidmət etdiyini
bildirdi.
Olimpiadaya qatılmaq istəyən xarici ölkələrin, eyni
zamanda şagirdlərin sayının ildən-ilə artmasından,
ölkəmizin artıq neçə illərdir ki, mötəbər yarışa ev
sahibliyi etməsindən məmnunluğunu ifadə edən Ənvər
Özərən bunun eyni zamanda Azərbaycan təhsilinin, elminin
inkişafından xəbər verdiyini dedi. Bakıda artıq sayca
7-cisi keçirilən beynəlxalq olimpiadanın digər ölkələrdə
təşkil olunan yarışlardan bir sıra özəllikləri ilə
fərqləndiyini qeyd edən Ənvər Özərən bildirdi ki, xarici
ölkələrdən gələn məktəblilər ilk olaraq xalqımızın
qonaqpərvərliyi, mehribanlığı ilə qarşılaşırlar. Bakıda
qaldıqları müddət ərzində ölkəmizin mədəniyyəti və
tarixi haqqında müəyyən məlumatlar əldə etməklə yanaşı
onlar üçün paytaxtımızın bir sıra görməli yerlərinə
ekskursiyalar təşkil olunur.
Çıxışının sonunda Ənvər Özərən olimpiada iştirakçılarına
uğurlar arzulayaraq tədbirin təşkilində əməyi olanlara
təşəkkür etdi.
Məlumat üçün bildirək ki, olimpiadanın ilk günü -
aprelin 5-də iştirakçılar təmsil etdikləri ölkələr
haqqında stendləri və ətraf mühitin mühafizəsi ilə bağlı
hazırladıqları layihələri nümayiş etdirəcəklər.
Münsiflər heyəti tərəfindən olimpiada iştirakçılarının
təqdim etdikləri layihələr diqqətlə nəzərdən keçirilərək
ətraflı təhlil ediləcək və qaliblər
müəyyənləşdiriləcəkdir. Aprelin 6-da isə Heydər Əliyev
adına İdman - Konsert Kompleksində qaliblərin
mükafatlandırılması mərasimi keçiriləcəkdir.
Samirə KƏRİMOVA |
