|
Bu günlərdə Bakıdakı 14 nömrəli tam orta məktəbdə
müstəqil Azərbaycanın memarı ulu öndər Heydər Əliyevin
90 illik yubileyinə həsr edilmiş "Ürəklərdə və tarixin
yaddaşında əbədi yaşayacaqsan" adlı tədbir keçirildi.
Akt zalında təşkil olunmuş tədbirə ilk olaraq üçrəngli
Dövlət bayrağı gətirildi. Dövlət himni ifa olundu.
Ümummilli lider Heydər Əliyevin əziz xatirəsi bir
dəqiqəlik sükutla yad edildi.
Tədbiri giriş sözü ilə məktəbin direktoru Hürzad
Verdizadə açaraq ulu öndər Heydər Əliyevin keçdiyi
mənalı və mübarizələrlə dolu ömür yolundan danışdı.
Bildirdi ki, dahi şəxsiyyətin təhsilimizin,
iqtisadiyyatımızın inkişafı, Azərbaycanın nüfuzunun
beynəlxalq səviyyəyə yüksəlməsi istiqamətində apardığı
böyük siyasət daim öyrənilməli, araşdırılmalı və təbliğ
edilməlidir. Qeyd olundu ki, Heydər Əliyev böyük
azərbaycanlı, dövlət xadimi, siyasi lider olmaqla
yanaşı, eyni zamanda sədaqətli həyat yoldaşı, mehriban,
qayğıkeş, gözəl ata idi.
Azərbaycan Milli Elmlər Akademiyasının müxbir üzvü,
professor Vəli Əliyev dahi şəxsiyyət Heydər Əliyev
haqqında ətraflı məlumat verərək vurğuladı ki, ulu
öndər zəmanəmizin ən nəhəng siyasətçilərindən biridir.
Dərin ağlı, iti zəkası, güclü məntiqi ilə hamını heyrətə
gətirən, xalqını, Vətənini sonsuz məhəbbətlə sevən
şəxsiyyət idi.
Şagirdlərin ulu öndərə həsr etdikləri şeirlər tədbir
iştirakçıları tərəfindən maraqla qarşılandı. Səhnəyə
çıxan şagirdlər ümummilli lider Heydər Əliyevin
xatirəsi önündə baş əydiklərini, böyük öndərin
arzularının, ideyalarının həyata keçirilməsi üçün
üzərlərinə böyük məsuliyyətin düşdüyünü bildirdilər.
Həmişə müqəddəs Vətən uğrunda mübarizədə ön cərgədə
olacaqlarına söz verdilər.
Azərbaycan Dövlət Pedaqoji Universitetinin tarix üzrə
fəlsəfə doktoru Səmayə Mustafayevanın "Heydər Əliyevin
xarici siyasəti", məktəbin tarix müəllimləri Gülnarə
Şamilovanın "Heydər Əliyevin fəaliyyəti və dövlət
quruculuğu", Pəri Hüseynovanın "Heydər Əliyev və
Azərbaycan iqtisadiyyatı", Qurban Qurbanovun "Heydər
Əliyevin daxili siyasətdə uğurları", musiqi müəllimi
Kəmalə Baxışovanın "Heydər Əliyev və Azərbaycan
mədəniyyəti" mövzularında məruzələri dinlənildi.
Tədbirdə ümummilli liderin Azərbaycanın siyasi
təlatümlər keçirdiyi ən böhranlı dövrdə hakimiyyətə
gələrək ölkəni parçalanmadan xilas etməsi ilə bağlı
çıxışları və şərhli slaydlar təqdim olundu. Ulu öndərin
ölkənin inkişafını təmin edəcək neft strategiyasının
memarı olması və bu sahədəki böyük qətiyyəti, dünya
azərbaycanlılarının birləşməsi istiqamətindəki əvəzsiz
xidmətləri barədə də fikirlər səsləndi.
Rəşad ZİYADOV |
