|
 Martın
29-da Naxçıvan Özəl Universitetində 31 mart -
azərbaycanlıların soyqırımı günü ilə bağlı elmi-praktik
konfrans keçirilmişdir. Konfransı giriş sözü ilə
universitetin tədris və elmi işlər üzrə prorektoru,
dosent İbrahim Kazımbəyli açaraq bildirmişdir ki, bu
soyqırımı Azərbaycanın tarixinə yazılmış qanlı
səhifələrdən biridir. Ölkəmiz ikinci dəfə dövlət
müstəqilliyinə qovuşduqdan sonra ulu öndər Heydər
Əliyevin 1998-ci il martın 26-da imzaladığı
"Azərbaycanlıların soyqırımı haqqında" Fərman erməni
millətçilərinin vəhşiliklərinə verilən hüquqi-siyasi
qiymət olmuşdur. Bu fərman xalqımızın milli yaddaşının
bərpası baxımından mühüm əhəmiyyətə malikdir.
Azərbaycanın indiki və gələcək nəsillərinin milli
yaddaşının qorunması baxımından proqram xarakterli həmin
sənəddə hər il martın 31-nin azərbaycanlıların soyqırımı
günü kimi qeyd edilməsi öz əksini tapmışdır.
Konfransda humanitar elmlər kafedrasının dosenti, tarix
üzrə fəlsəfə doktoru Elçin Zamanovun "XX yüzilliyin
əvvəllərində Azərbaycanda ictimai-siyasi vəziyyət. Mart
soyqırımının səbəbləri", tarix müəllimliyi ixtisası üzrə
II kurs tələbəsi Nəsib Mustafayevin "Ermənilərin
Bakıda və ətraf ərazilərdə azərbaycanlılara qarşı
soyqırımı siyasəti", I kurs tələbəsi Zivər Tağıyevanın
"Naxçıvan əhalisinə qarşı erməni vəhşiliyi" mövzularında
çıxışları dinlənilmişdir. Çıxışlarda erməni
millətçilərinin və daşnaklarının "Böyük Ermənistan"
yaratmaq xülyası ilə zaman-zaman yeni-yeni fəlakətlər
törətmələrindən, soyqırımı və deportasiyaya məruz qalmış
xalqımızın başına gətirilən müsibətlər barədə məlumat
verilmiş, bu məsələlərin beynəlxalq ictimaiyyət və
təşkilatlar tərəfindən tezliklə həqiqi qiymət alacağına
əminlik ifadə edilmişdir.
Sonda soyqırımı qurbanlarına həsr olunmuş film nümayiş
etdirilmişdir.
Nuray ƏSGƏROVA |
