|
 Martın
18-də Naxçıvan Müəllimlər İnstitutunun bir qrup tələbəsi
və müəllimi sərhəd bölgəsində "N" saylı hərbi hissədə
oldu və əsgərlərlə keçirilən bayram şənliyində iştirak
etdi. Şənlikdə Naxçıvan MR Mədəniyyət Nazirliyinin
musiqi və rəqs kollektivi və başqaları iştirak edirdi.
Polkovnik-leytenant Mirqiyas Rüstəmov bayram mərasimini
açaraq Novruz bayramının milli bayram kimi tarixi
köklərindən söhbət açdı. Bugünkü milli, adət-ənənələrin
xalqımızın birliyində oynadığı rolu dəyərləndirdi. Eyni
zamanda sovet hakimiyyəti illərində Novruz bayramının
qadağan edilməsinə baxmayaraq xalq tərəfindən adət və
ənənələrin yaşadılmasından geniş söhbət açdı.
Sonra çıxış edən Naxçıvan MR Ali Məclisinin deputatı,
Naxçıvan Müəllimlər İnstitutunun rektoru, professor Oruc
Həsənli Novruz milli bayramının gənclərin həyatındakı
rolundan, milli mənsubiyyətimizin tanınmasında,
xalqımızın tarixi keçmişimizə bağlılığına təsirindən
söhbət açdı. O bildirdi ki, bu gün dövlətimiz
tərəfindən Novruz bayramının el bayramı kimi
keçirilməsinə böyük dəyər verilir və diqqət yetirilir.
Tədbirdə Naxçıvan MR Ali Məclisinin deputatları,
professor Tariyel Talıbov, Nazim Bayramov,
şair-dramaturq Həsənəli Eyvazlı, polkovnik-leytenant
H.Məmmədov çıxış edərək əsgərləri ümumxalq bayramı olan
Novruz münasibəti ilə təbrik etdilər.
Bayram şənliyində musiqi kollektivlərinin ifa etdikləri
mahnılar və rəqslər hərarətlə qarşılandı.
Naxçıvan Müəllimlər İnstitutunun Mətbuat xidməti |
