|
Martın 15-də Azərbaycan Respublikasının Prezidenti
yanında Dövlət İdarəçilik Akademiyasında YUNESKO-nun baş
direktorunun müavini Pilar Alvarez-Lasonun iştirakı ilə
YUNESKO üzrə Azərbaycan Respublikasının Milli
Komissiyası "İnsan və biosfer" Komitəsinin "Ekoloji
sivilizasiya, davamlı inkişaf, ətraf mühit" adlı illik
nəşrinin təqdimatı keçirilib.
Tədbirdən öncə qonaqlar Heydər Əliyev Fondunun vitse-prezidenti
Leyla xanım Əliyevanın təşəbbüsü ilə yaradılmış IDEA
(International Dialogue for Environmental Action) Ətraf
Mühit Kampaniyası çərçivəsində ali təhsil
müəssisəsindəki Resurs Mərkəzi və akademiyanın YUNESKO
Mərkəzi ilə tanış olublar.
Təqdimat mərasimində Azərbaycan Respublikasının
Prezidenti yanında Dövlət İdarəçilik Akademiyasının
rektoru, akademik Urxan Ələkbərov çıxış edərək YUNESKO-nun
məqsədyönlü fəaliyyətindən, adıçəkilən təşkilatla
ölkəmizin geniş əlaqələrindən ətraflı söz açıb. Rektor
Azərbaycan ilə YUNESKO arasında əlaqələrin qurulmasında
ümummilli lider, dahi şəxsiyyət Heydər Əliyevin, bu
qurum ilə ölkəmizin əməkdaşlığının uğurla inkişafında
Azərbaycan Respublikasının Prezidenti cənab İlham
Əliyevin, Heydər Əliyev Fondunun prezidenti, YUNESKO-nun
və İSESKO-nun xoşməramlı səfiri, Milli Məclisin deputatı
Mehriban xanım Əliyevanın xidmətlərindən danışıb.
Akademik Urxan Ələkbərov daha sonra təqdimatı keçirilən
"Ekoloji sivilizasiya, davamlı inkişaf, ətraf mühit"
adlı nəşr barədə fikirlərini söyləyərək onun
mütəxəssislər və bütövlükdə geniş oxucu kütləsi üçün
dəyərli bir töhfə olduğunu bildirib.
Çıxış üçün söz alan YUNESKO-nun baş direktorunun müavini
Pilar Alvarez-Lason təmsil etdiyi təşkilatın inkişaf
mərhələlərindən, son illərdə bütün dünyada fəaliyyətini
daha da genişləndirməsindən, bununla əlaqədar yeni
fəaliyyət planlarının icrasına başlanılmasından ətraflı
söz açıb. O, ölkəmizlə olan əlaqələrin inkişafına xüsusi
əhəmiyyət verdiklərini və bu əməkdaşlığı yüksək
qiymətləndirdiklərini qeyd edib. Ətraf mühitlə bağlı
məsələlərə, sosial elmlərə önəm verilməsinin zəruri
olduğunu söyləyən qonaq bu sahələrə YUNESKO tərəfindən
daim diqqət göstərildiyini bildirib.
YUNESKO üzrə Azərbaycan Milli Komissiyasının birinci
katibi Günay Əfəndiyeva bu beynəlxalq qurum ilə
Azərbaycan arasında əlaqələrin genişlənməsində Heydər
Əliyev Fondunun prezidenti, YUNESKO-nun və İSESKO-nun
xoşməramlı səfiri, Milli Məclisin deputatı Mehriban
xanım Əliyevanın müstəsna rolunu diqqətə çatdırıb. Natiq
sonra YUNESKO-nun ölkəmizdə reallaşdırdığı layihələrdən
bəhs edib.
Azərbaycan Respublikasının ekologiya və təbii sərvətlər
nazirinin müavini Firdovsi Əliyev, AMEA-nın birinci
vitse-prezidenti Arif Həşimov YUNESKO ilə ölkəmiz
arasındakı işgüzar əməkdaşlıq əlaqələrinə toxunaraq əldə
olunan uğurlu nəticələrdən danışıblar.
Sonra YUNESKO üzrə Azərbaycan Respublikasının Milli
Komissiyası "İnsan və biosfer" Komitəsinin "Ekoloji
sivilizasiya, davamlı inkişaf, ətraf mühit" adlı illik
jurnalı ictimaiyyətə təqdim edilib. İllik nəşrin
əhəmiyyəti barədə danışan digər çıxışçılar topluda
Azərbaycanın vacib prioritetlərindən biri hesab olunan
davamlı inkişaf sahəsindəki məsələlərin əhatə
edildiyini, dünyada ən aktual olan mövzularla bağlı
elmi məqalələrin öz əksini tapdığını qeyd ediblər.
Samirə KƏRİMOVA |
