|
 Martın
14-də Azərbaycanın birinci xanımı, Heydər Əliyev
Fondunun prezidenti Mehriban Əliyeva Sabunçu rayonunun
Pirşağı qəsəbəsində Fondun təşəbbüsü ilə yenidən
qurulmuş 112 nömrəli tam orta məktəbin açılışında
iştirak etmişdir.
Məktəblə tanışlıq zamanı bildirilmişdir ki, təhsilin
inkişafının dövlət siyasətinin prioritet
istiqamətlərindən biri elan olunduğu Azərbaycanda bu
prosesə Heydər Əliyev Fondu xüsusi dəstək verir. Bu
sahədə Fondun "Yeniləşən Azərbaycana yeni məktəb"
layihəsinin icrası uğurla davam edir. Layihənin həyata
keçirilməsinin ən vacib məqamlarından biri onun
paytaxtla yanaşı, regionlarda icra edilməsidir. Heydər
Əliyev Fondunun bu layihəsi təhsilin səviyyəsinə birbaşa
təsir edən problemlərin həllinə, tədris prosesinin günün
tələbləri səviyyəsində qurulmasına imkan verən müasir
məktəb binalarının inşasına istiqamətlənmişdir. Təsadüfi
deyildir ki, Fondun təşəbbüsü ilə ölkədə inşa olunan və
yenidən qurulan məktəblərin sayı artıq yüzlərlədir.
Hazırda onların sırasına Bakının ən qədim kəndlərindən
olan Pirşağıda istifadəyə verilən 112 nömrəli tam orta
məktəb də daxil olur. Heydər Əliyev Fondunun təşəbbüsü
ilə yenidən qurulan və bütün zəruri avadanlıqla təchiz
edilən məktəb ölkəmizdə həyata keçirilən təhsil
islahatlarının bariz nümunəsidir.
 Qeyd
edildi ki, 1934-cü ildən fəaliyyət göstərən bu təhsil
ocağı uzun illər ərzində təmir olunmamışdı. Bir müddət
əvvəl qəzalı vəziyyətə düşən məktəbdəki şərait tədris
prosesində çox ciddi problemlər yaratmışdı. Heydər
Əliyev Fondu məktəbin əsas tədris korpusunun inşası ilə
bağlı təşəbbüs qaldırmışdı. 2011-ci ilin dekabrında
başlanan tikinti işləri yüksək səviyyədə, bütün
standartlar nəzərə alınaraq həyata keçirilmişdir.
Üçmərtəbəli, 660 şagird yerlik binanın ümumi sahəsi 38
min kvadratmetrdən çoxdur. Burada şagirdlərin təlim-tərbiyəsi
ilə 51 müəllim məşğul olacaqdır. Məktəbdə müxtəlif fənn
kabinetləri vardır. Uşaqlarda yaradıcılıq qabiliyyətini
inkişaf etdirmək üçün rəsm və rəsmxətt otağı qurulmuşdur.
Bundan əlavə, şagirdlərin vətənpərvərlik ruhunda tərbiyə
olunmaları üçün hərbi hazırlıq kabineti yaradılmışdır.
Şagirdlərin informasiya və kommunikasiya
texnologiyalarına marağı nəzərə alınaraq məktəbdə
kompüter sinfi yaradılmış və zəruri texniki avadanlıqla
təchiz olunmuşdur. Buradakı kitabxana da yüksək
səviyyəsi ilə diqqəti cəlb edir.
Məlumat verildi ki, məktəbdə 200 adda bədii ədəbiyyat və
13 min dərslik toplanmışdır. Bütün otaqlar dərs
ləvazimatları, əyani vəsaitlər və avadanlıqla təchiz
olunmuşdur.
Fondun həyata keçirdiyi layihələrdən biri də "Təhsilə
dəstək" layihəsidir. Bu layihə birbaşa tədrisin
keyfiyyətinə təsir göstərən problemlərin həllinə -
təhsil ocaqlarının əyani vəsaitlə, şagirdlərin lazımi
dərs ləvazimatı ilə təmin olunmasına yönəlmişdir. Heydər
Əliyev Fondu məktəbdə biologiya, fizika və kimya
laboratoriyalarını şagirdlərin elmin sirlərinə
yiyələnmələri üçün bütün əyani vasitələrlə təmin
etmişdir. Beləliklə, fəaliyyətində təhsilə xüsusi önəm
verən Heydər Əliyev Fondunun 2004-cü ildən başlayaraq "Yeniləşən
Azərbaycana yeni məktəb" layihəsi çərçivəsində ölkənin
müxtəlif regionlarında məktəblərin yenidən qurulması,
müasir avadanlıqla təmin olunması, kitabxanaların
ədəbiyyatla zənginləşdirilməsi istiqamətində həyata
keçirdiyi işlər artıq öz bəhrəsini verir.
Şagirdlərin çoxluğunu nəzərə alan Heydər Əliyev Fondunun
təşəbbüsü ilə 2005-ci ildə bu təhsil ocağı üçün 240
yerlik yardımçı bina da tikilmişdi. Təbii ki, bu, mövcud
tələbatı qismən ödəməyə imkan verirdi. İndi isə əsas
korpus üçün yeni binanın inşası ilə bütün problemlər
aradan qaldırıldı.
Diqqətə çatdırıldı ki, məktəbin ətrafında və ərazisində
yenidənqurma işləri aparılmış, 3200 kvadratmetr sahədə
abadlıq işləri görülmüşdür.
Heydər Əliyev Fondunun prezidenti Mehriban xanım Əliyeva
məktəbin pedaqoji kollektivi ilə görüşdü, yeni təhsil
ocağının istifadəyə verilməsi münasibətilə onları təbrik
etdi.
Azərbaycanın birinci xanımı bildirdi ki, dövlətin həyata
keçirdiyi siyasətə daim dəstək olan Heydər Əliyev Fondu
ölkədə görülən işlərə hər zaman kömək göstərməyə
hazırdır. Mehriban xanım Əliyeva qarşıdan gələn Novruz
bayramı münasibətilə kollektivi təbrik etdi.
Məktəbin müəllimi Qafar Bağırov görülən işlərə görə
qəsəbə sakinləri adından Heydər Əliyev Fondunun
prezidentinə minnətdarlığını bildirdi.
Sonda xatirə şəkli çəkdirildi.
***
Sonra Azərbaycanın birinci xanımı, Heydər Əliyev
Fondunun prezidenti Mehriban Əliyeva paytaxtın Nəsimi
rayonundakı 268 nömrəli sağlamlıq imkanları məhdud
uşaqlar üçün xüsusi məktəbə gəldi.
Mehriban xanım Əliyeva əvvəlcə şagirdlərin əl işlərindən
ibarət sərgi ilə tanış oldu. Yüzdən çox əl işinin
nümayiş etdirildiyi sərgi uşaqların maraq dünyasını,
arzu və istəklərini yetərincə əks etdirir. Daha sonra
Mehriban xanım Əliyeva Novruz bayramı münasibətilə
məktəbdə keçirilən tədbirdə iştirak etdi.
Məktəbin özfəaliyyət dərnəyinin üzvlərinin rəqsləri
tədbirə xüsusi ovqat gətirməklə yanaşı, onun daha
maraqlı keçməsinə imkan yaratdı. Heydər Əliyev Fondunun
prezidenti Mehriban xanım Əliyeva 268 nömrəli xüsusi
məktəbin müəllim və şagirdlərini bayram münasibətilə
təbrik edərək dedi:
- Mən sizi bu gün görməyə, xüsusilə də belə bayram əhval-ruhiyyəsində
görməyə çox şadam. Sizi qarşıdan gələn Novruz bayramı
münasibətilə ürəkdən təbrik edirəm. On il bundan əvvəl
mən ilk dəfə sizin məktəbə gəlmişdim. Biz ilk dəfə o
vaxt görüşdük. Artıq o zaman birinci sinifdə oxuyan
uşaqlar indi məktəbi bitirirlər, 9-10-cu sinfin
şagirdləridirlər.
Onu da demək istəyirəm ki, Heydər Əliyev Fondu
tərəfindən həyata keçirilən Azərbaycanın internat
məktəbləri və uşaq evlərinin inkişaf proqramı məhz sizin
məktəbinizdən başladı. Sizin məktəbiniz ilk məktəb idi.
Ondan sonra onlarla məktəb yenidən quruldu, təmir
olundu. Buna görə mən hər il bu bayram ərəfəsində
sizinlə bir yerdə olmağa çox şadam. Çox şadam ki,
balalarımız gözəl təhsil alır, böyüyürlər. Çox şadam ki,
belə yaxşı şəraitdə təhsil alırsınız. Onu da demək
istəyirəm ki, mən hər zaman sizinlə görüşə xoş
duyğularla gəlirəm.
Sonra şagirdlərə Heydər Əliyev Fondunun bayram
hədiyyələri təqdim edildi.
Azərbaycanın birinci xanımı məktəbin sinif otaqlarına da
baxdı, cari təmir işlərinin aparılması ilə bağlı müvafiq
tövsiyələrini verdi.
1927-ci ildə istifadəyə verilən məktəb 2003-cü ildə
Heydər Əliyev Fondu tərəfindən əsaslı təmir olunaraq
yenidən qurulmuşdur. İkimərtəbəli bina bütün avadanlıqla
təchiz edilmişdir. Hazırda xüsusi məktəbdə təhsil alan
920 şagirdin təlim-tərbiyəsi ilə 250 pedaqoq məşğul
olur. Bu şagirdlərin 140-ı məktəblə daimi təmasdadır,
digərləri isə təhsillərini ev şəraitində davam
etdirirlər.
AzərTAc |
