|
Lənkəran rayonunun Osakücə kənd tam orta məktəbində
Azərbaycan Yazıçılar və Jurnalistlər birliklərinin üzvü,
yazıçı-jurnalist Hacı Etibar Əhədovun respublikanın
əməkdar müəllimi Hacı Hacırza Kişiyevə həsr etdiyi
"Şərəfli ömür yolu" kitabının təqdimatı keçirilib.
Azərbaycan Yazıçılar Birliyinin Lənkəran bölməsinin
Osakücə kənd tam orta məktəbi ilə birgə təşkil etdiyi
tədbiri məktəbin direktoru Arzu Mirzəyeva açaraq
bildirdi ki, kitabda haqqında danışılan Azərbaycan
Respublikasının əməkdar müəllimi Hacı Hacırza Kişiyev 50
ilə yaxın dövrdə kənddəki tam orta məktəbin direktoru
işləmişdir. Həyatını bütünlüklə elmə, təhsilə həsr etmiş
Hacırza Kişiyev müəllim adının şərəfini həmişə uca
tutmuşdur. Yazıçılar Birliyi Lənkəran bölməsinin məsul
katibi İltifat Saleh kitab haqqında təəssüratını
bölüşdü, bildirdi ki, o, Boladi kənd orta məktəbində
Hacırza müəllimlə bir sinifdə oxumuşdur. Hacırza
müəllimin Lənkəranda təhsilin inkişafındakı
xidmətlərindən bəhs edən natiq kitabın müəllifi Hacı
Etibar Əhədovun "Şərəfli ömür yolu" kitabını yüksək
dəyərləndirərək onu təbrik etdi.
Lənkəran Dövlət Universitetinin dosenti, filologiya
üzrə fəlsəfə doktoru, Prezident təqaüdçüsü Hacı Mirhaşım
Talışlı Hacı Etibar Əhədovun ədəbi və jurnalistlik
fəaliyyəti ilə məktəb illərindən tanış olduğunu bildirdi
və Hacırza müəllimin pedaqoji və ictimai fəaliyyətini
yüksək qiymətləndirdi. Lənkəran Ağsaqqallar Şurası
sədrinin müavini, Lənkəran Dövlət Universiteti
valideynlər şurasının sədri Sərhad Məmmədov
yazıçı-jurnalist Hacı Etibar Əhədovun yeni kitabına
toplanmış "Hacı Hacırza Hacı - dostların tacı" sənədli
povestin və publisistik yazılarının dəyərli əhvalatlar,
dəqiq faktlar əsasında obrazlı şəkildə qələmə aldığını
qeyd etdi.
Lənkəran Rayon Təhsil Şöbəsi müdirinin müavini Güloğlan
Bağırov müəllimlər müəllimi Hacı Hacırza Kişiyev
haqqında yazılmış kitaba görə minnətdarlığını
bildirdi. Qeyd etdi ki, Hacırza müəllim doğulub
boya-başa çatdığı doğma kəndin yetirdiyi ilk ali
təhsilli pedaqoqdur.
Məktəbin riyaziyyat müəllimi Qəhrəman Fərzullayev,
dil-ədəbiyyat müəllimi Xeyrulla Rzayev, Xolmili kənd tam
orta məktəbinin direktoru Qasım Əliyev kitab haqqında
təəssüratlarını bölüşdülər, Hacı Hacırza Kişiyevi anadan
olmasının 78 illiyi münasibətilə təbrik etdilər.
"Şərəfli ömür yolu" kitabının müəllifi, yazıçı-jurnalist
Hacı Etibar Əhədov tədbirə görə minnətdarlıq etdi,
kitabın vaxtı ilə ona riyaziyyatdan dərs demiş müəllimi
Hacı Hacırza Kişiyevə ad günü münasibətilə bir töhfə
olduğunu bildirdi.
Təqdimat mərasimində söz alan Hacırza Kişiyev keçdiyi
şərəfli həyat yolundan, pedaqoji fəaliyyətindən danışdı,
tədbirin təşkilatçılarına və iştirakçılara, həmçinin
kitabın müəllifinə minnətdarlığını bildirdi.
Ağamir CAVAD,
Azərbaycan Yazıçılar Birliyi
Lənkəran bölməsinin məsləhətçisi |
