|
 Martın
12-də paytaxtın Xətai rayonunda yerləşən 171 nömrəli
tam orta məktəbdə "Narkomaniya əsrin bəlası" mövzusunda
"Ağ ölümə yox deyək" devizi altında tədbir keçirildi.
Tədbirdə məktəbin müəllim-şagird kollektivi ilə yanaşı,
Xətai Rayon İcra Hakimiyyəti başçısının müavini Xeyrulla
Hüseynli, Xətai Rayon Polis İdarəsinin, Bakı Şəhəri üzrə
Təhsil İdarəsinin nümayəndələri, Respublika Narkoloji
Mərkəzin baş həkiminin müavini Afət Məmmədova və digər
şəxslər iştirak edirdilər. Öncə iştirakçılar məktəbin
şagirdlərinin iştirakı ilə hazırlanmış bir gəncin
narkomaniyaya necə düçar olması və onun həkimlərin və
ictimaiyyətin köməyi ilə yenidən həyata qaytarılmasına
həsr edilmiş səhnəciyə baxdılar.
Məktəbin direktoru İradə Murquzova qonaqları
salamlayaraq tədbirin əhəmiyyətindən danışdı. Bildirdi
ki, əsrin bəlası olan narkomaniya problemi bütün dünyada
olduğu kimi, Azərbaycanda da mövcuddur. Son illərdə
dünyada narkotiklərə nəzarət, narkomaniya ilə mübarizə
istiqamətində bir sıra ciddi tədbirlər görüldüyünü deyən
İradə Murquzova ümumbəşəri bir problemə çevrilən
narkomaniyanın fəsadlarından söz açdı. Qeyd edildi ki,
narkomaniyaya qurşananlar təhsilə, işə, ailəyə,
dostlarına maraqlarını itirir və özlərini cəmiyyətdən
təcrid edirlər. Beləliklə də insan həyatı zəhərlənir.
Buna görə də ümumbəşəri problemin profilaktikası
sahəsində Azərbaycanda da bir sıra məqsədyönlü
proqramlar həyata keçirilir. İ.Murquzova narkomaniya ilə
mübarizədə ən effektiv vasitələrdən biri kimi
maarifləndirmə tədbirlərinin həyata keçirilməsinin və
buna məhz təhsil müəssisələrində daha geniş yer
verilməsinin vacibliyini vurğuladı.
Tədbirdə çıxış edən Xətai Rayon İcra Hakimiyyəti
başçısının müavini Xeyrulla Hüseynli gənclərin pis
vərdişlərdən uzaq olması və sağlam həyat tərzi üçün
narkomaniyaya qarşı mübarizədə hər bir Azərbaycan
vətəndaşının üzərinə böyük vəzifə düşdüyünü bildirdi.
Narkomaniyaya və narkotik vasitələrin qanunsuz
dövriyyəsinə qarşı mübarizənin dövlət siyasətinin
ayrılmaz tərkib hissəsi olduğunu bildirən X.Hüseynli
mövcud problemlə bağlı həyata keçirilən dövlət
proqramlarından danışdı.
Tədbirdə Respublika Narkoloji Mərkəzin baş həkiminin
müavini Afət Məmmədova, BŞTİ-nin nümayəndəsi Uğurlu
Abbasov və başqaları çıxış edərək tədbirin
əhəmiyyətindən söz açdılar.
Niyazi RƏHİMOV |
