|
 Martın
1-də Bakıdakı 42 nömrəli tam orta məktəbdə "ingilis dili
fənn aylığı"na həsr olunmuş "Uşaqları qoruyun, dünyanı
qoruyun" adlı tədbir keçirildi. Tədbirdə Təhsil
Nazirliyinin, Bakı Şəhəri üzrə Təhsil İdarəsinin
nümayəndələri, Nəsimi rayonunda yerləşən ümumi təhsil
məktəblərinin direktorları və digər qonaqlar iştirak
edirdilər.
Məktəbin direktoru Firəngiz Həmidova qonaqlara tədbirin
mahiyyəti barədə məlumat verərək bildirdi ki, fevral ayı
məktəbin fəaliyyət planına "ingilis dili fənn aylığı"
kimi daxil olub. Bu məqsədlə VII-VIII siniflərdə ingilis
dili müəllimlərinin "açıq dərs"ləri keçirilib. Əvvəlcə
qonaqlar VIII "c" sinfində ingilis dili müəllimi Nabat
Əyyubovanın "açıq dərs"ini dinlədilər. "Açıq dərs"in
mövzusu filmlərə həsr olunmuşdu. Şagirdlər iki qrupa
bölünmüşdü. Dərsdə şagirdlərə Azərbaycan filmlərindən
"Dədə Qorqud", "Ulduz", "Əhməd haradadır?", "Dəli Kür",
"Şərikli çörək", "Koroğlu", "Nəsimi", "Uşaqlığın son
gecəsi", "Sehirli xalat" və başqalarına aid suallar
verildi. Şagirdlər xarici ölkələrdə istehsal olunmuş
filmlər, bu filmlərin rejissorları və ulduzları haqqında
sualları da cavablandırdılar. Filmlər haqqında slaydlar
göstərildikdən sonra aktyorların şəkilləri, oynadıqları
obrazlara aid testlər paylandı. Qrupların verdiyi
cavablar qonaqlar tərəfindən qiymətləndirildi. Onlar
dərsdə müasir təlim metodlarından geniş istifadə
olunduğunu, şagirdlərin aktivliyini və müəllimin
qabaqcıl iş təcrübəsini bəyəndiklərini qeyd etdilər.
Sonra tədbir ingilis dilində akt zalında davam etdi.
Azərbaycanın və Böyük Britaniyanın Dövlət himnləri ifa
olundu. Tədbirdə şagirdlər ingilis dilində səlis
danışırdılar. Aparıcılar qonaqları salamlayıb tədbiri
açıq elan etdilər. İngilis dilində qruplar arasında
bilik yarışı keçirildi. Şagirdlər bir-birindən maraqlı
rəqs nömrələri ifa etdilər, şeirlər söylədilər.
"Uşaqları sevin" adlı səhnəcik göstərdilər və qonaqlara
broşüralar payladılar.
Tədbirdə çıxış edən 9 nömrəli tam orta məktəbin
direktoru Zinyət Əhmədova qeyd etdi ki, 42 nömrəli tam
orta məktəbdə kimsəsiz uşaqlara yardım məqsədilə görülən
işlər artıq ənənəyə çevrilib. O, martın 1-də keçirilən
bu tədbiri də yüksək qiymətləndirərək məktəb
kollektivinə direktorlar adından təşəkkürünü bildirdi.
Rəşad ZİYADOV |
