|
Bakıdakı 182 nömrəli tam orta məktəbdə Beynəlxalq Ana
Dili Gününə həsr olunmuş "Ana dilim, yaşa, dilim!"
adlı tədbir keçirilib. Məktəbin direktoru Zinyət
Tağıyeva qonaqları salamladıqdan sonra bildirib ki,
bizim ana dilimiz Azərbaycan dilini ulu öndərimiz Heydər
Əliyev çox sevib, ona həmişə böyük qiymət verib.
Dünyanın ən qədim dillərindən sayılan dilimizi biz də
bilməli, sevməli və onun saflığını qorumalıyıq.
"Şirin dil" mahnısının sədaları altında başlayan
tədbirdə ana dilimizin gözəlliklərini, saflığını, söz
qüdrətini öz ifaları ilə canlandıran şagirdlər keçmişə
qısa nəzər salaraq dilimizin qorunması uğrunda
mübarizələrdən söz açıblar. Onlar böyük həvəslə
hazırladıqları C.Məmmədquluzadənin "Qurbanəli bəy"
hekayəsi, "Anamın kitabı" dramı, C.Cabbarlının "Oqtay
Eloğlu" əsərindən göstərdikləri səhnəciklərlə doğma ana
dilinə olan böyük məhəbbətlərini ifadə ediblər.
Şagirdlərin S.Vurğunun, R.Rzanın, M.Müşfiqin ana dili
haqqında yazılmış şeirləri əsasında hazırladıqları "Ana
dilim, yaşa, dilim!" adlı ədəbi-bədii kompozisiya
tədbir iştirakçıları tərəfindən maraqla qarşılanıb.
Sonda çıxış edən qonaqlar türk dünyası dillərinin
fövqündə dayanmağa layiq olan Azərbaycan dilinin
zənginliyindən söz açıblar. Onlar ana dilimizi bütün
xarici təzahürlərdən qorumaq üçün mübarizəyə hazır
olduqlarını bildirərək ana dili sevgisini millət və
dövlətin mövcudluğunda əsas amillərdən biri kimi
xarakterizə ediblər.
Rəşad ZİYADOV |
