|
 Naxçıvan
Müəllimlər İnstitutunda Naxçıvan Muxtar Respublikasının
ümumi təhsil məktəblərində işləyən bir qrup məktəb
psixoloquna 60 saatlıq ixtisasartırma kursunu
bitirdiklərinə dair sertifikatlar verilmişdir. Bu
münasibətlə fevralın 20-də institutun akt zalında tədbir
keçirilmişdir./
Tədbiri giriş sözü ilə açan institutun rektoru,
professor Oruc Həsənli qeyd etmişdir ki, 1999-cu ildə
ümummilli liderimiz Heydər Əliyevin imzaladığı və
mərhələ-mərhələ həyata keçirilən yeni təhsil islahatı
müasir günümüzlə ayaqlaşa bilən, yeni təlim metodlarını
mənimsəyən müəllim hazırlığının təşkilini problem kimi
qarşıya qoydu. İbtidai və fənn müəllimləri ilə yanaşı
məktəb psixoloqlarının da hazırlığı məsələsi nəzərdə
tutuldu. Bildirildi ki, bu məqsədlə onlar üçün müntəzəm
olaraq qısamüddətli (60 saatlıq) kursların keçirilməsi
planlaşdırılıb. Bundan əvvəl yola salınan iki qrupa 60
nəfərdən artıq məktəb psixoloqu cəlb olunmuşdur. Bu gün
isə üçüncü qrupa sertifikat verilir. Həmin psixoloqlar
artıq məktəbdə yeni təhsil konsepsiyasına uyğun olaraq
öz işlərini qurmuşlar. Yeni təhsil islahatı yeni
təfəkkürlü şəxsiyyət formalaşdırmağı məqsəd kimi qarşıya
qoyur. Biz də buna nail olmağa çalışırıq.
Rektor çıxışının sonunda sertifikat alacaq psixoloqlara
gələcək işlərində uğurlar dilədi.
Naxçıvan MR Təhsil Nazirliyinin baş mütəxəssisi Rəşad
Əlizadə çıxış edərək qeyd etdi ki, bu gün Naxçıvan
Müəllimlər İnstitutu ilə Təhsil Nazirliyinin birgə
həyata keçirdiyi tədbirlər təhsil işçilərimizin uğur
qazanmasına kömək edir. Müəllimlərimizin və
psixoloqlarımızın bu ali təhsil ocağında təkmilləşdirmə
kurslarına cəlb olunması təkcə bilik və təcrübə
qazandırmır, həm də iki müəssisə arasında bir yaxınlığa,
doğmalığa səbəb olur. Naxçıvan Müəllimlər İnstitutu ilə
birgə işimiz həm də yeni düşüncə tərzinə malik gənclərin
böyüməsinə və cəmiyyətə qoşulmasına xidmət edir. Çünki
müəllimlərimiz burada əldə etdikləri bilik və təcrübəni
məktəblərdə tətbiq edirlər. R.Əlizadə işin düzgün
təşkilinə və müəllimlərə yaxından köməkliyə görə
Naxçıvan Müəllimlər İnstitutunun rəhbərliyinə
minnətdarlığını bildirdi.
Müdavimlər çıxış edərək kurs müddətində onlara verilən
biliklərə və göstərilən qayğıya görə institut
rəhbərliyinə və müəllimlərə təşəkkürlərini bildirdilər.
Kursu bitirən məktəb psixoloqlarına kitablar,
tədbirlərin elektron versiyası və sertifikatlar təqdim
olundu.
İnstitutun rektoru, professor Oruc Həsənli tədbirə yekun
vurdu.
Naxçıvan Müəllimlər İnstitutunun
Mətbuat xidməti |
