|
 Fevralın
22-də Təhsil Nazirliyində "2007-2015-ci illərdə
Azərbaycan gənclərinin xarici ölkələrdə təhsili üzrə
Dövlət Proqramı"na dair Məlumat İdarəetmə Sisteminin
və yeni veb-saytın (www.xaricdetehsil.edu.gov.az)
təqdimat mərasimi keçirildi.
Tədbirdə təhsil naziri Misir Mərdanov, Azərbaycan
Respublikası Prezidentinin Administrasiyası rəhbərinin
müavini Novruz Məmmədov, Dövlət Neft Fondunun icraçı
direktoru Şahmar Mövsümov, rabitə və informasiya
texnologiyaları naziri Əli Abbasov, Təhsil Nazirliyi
Aparatının məsul işçiləri, nazirliyin şöbə müdirləri və
struktur bölmələrinin rəhbərləri, KİV nümayəndələri
iştirak edirdilər.
Mərasimi təhsil naziri Misir Mərdanov açaraq qonaqları
Təhsil Nazirliyində görməkdən məmnunluq hissi
keçirdiyini söylədi. Nazir azərbaycanlı gənclərin xarici
ölkələrdə təhsil almasına göstərilən dövlət qayğısından
söz açaraq bu istiqamətdə görülən işləri diqqətə
çatdırdı. Qeyd olundu ki, ölkə başçısı cənab İlham
Əliyevin 16 aprel 2007-ci il tarixli 2090 nömrəli
sərəncamı ilə təsdiq edilmiş "2007-2015-ci illərdə
Azərbaycan gənclərinin xarici ölkələrdə təhsili üzrə
Dövlət Proqramı" uğurla həyata keçirilməkdədir. Təhsil
naziri adıçəkilən Dövlət Proqramının əsas məqsədinin
rəqabət qabiliyyətli iqtisadi sistemin formalaşdırılması
və davamlı inkişafın təmin edilməsi baxımından ölkənin
müasir tələblərə cavab verən kadrlara ehtiyacının
ödənilməsi, Azərbaycan gənclərinin ümumbəşəri dəyərlər
əsasında layiqli təhsil almaları üçün lazımi şəraitin
yaradılması, istedadlı gənclərin dünyanın inkişaf etmiş
ölkələrinin aparıcı universitetlərində təhsil almaq
imkanlarının genişləndirilməsi prosesinin
səmərəliliyinin artırılmasını təmin etməkdən ibarət
olduğunu diqqətə çatdırdı.
Nazir Misir Mərdanov Təhsil Nazirliyi tərəfindən müvafiq
dövlət qurumları ilə birgə həyata keçirilən Dövlət
Proqramı çərçivəsində indiyə qədər 1824 nəfərin xarici
ölkələrin nüfuzlu ali məktəblərində təhsil almağa
göndərildiyini qeyd edərək azərbaycanlı gənclərin
dünyanın ən qabaqcıl universitetlərində oxumaq üçün
etdikləri müraciətlərin sayının ildən-ilə artmasını
təqdirəlayiq hal kimi dəyərləndirdi. Bildirildi ki,
Dövlət Proqramı Dövlət Neft Fondu tərəfindən
maliyyələşdirilir.
Dövlət Proqramı çərçivəsində xaricdə təhsilə yeni qəbul
olunanların, təhsil alanların, xaric edilənlərin və
məzun olanların məlumatlarının idarə olunması işinin
daha mütəşəkkil şəkildə həyata keçirilməsi, seçim, icra
və maliyyələşdirilmə prosedurlarında çoxtərəfli nəzarət
vasitəsilə tam şəffaflığın təmin olunması məqsədilə
Məlumat İdarəetmə Sisteminin və yeni veb-saytın
istifadəyə verildiyini qeyd edən təhsil naziri bu
sistemin geniş elektron xidmət imkanlarına malik
olduğunu vurğuladı. Nazir Məlumat İdarəetmə Sisteminin
ölkə Prezidenti cənab İlham Əliyevin sərəncamına əsasən
elan edilmiş "İnformasiya-kommunikasiya texnologiyaları
ili"ndə fəaliyyətə başlamasının xüsusilə əlamətdar
olduğunu bildirdi.
Sonra təhsil nazirinin müavini Qulu Novruzov
"2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı"na dair Məlumat
İdarəetmə Sisteminin və yeni veb-saytın hazırlanması ilə
bağlı təqdimat-məruzə ilə çıxış etdi.
Dövlət Proqramına gənclərin böyük maraq göstərdiklərini
və onun ictimaiyyət tərəfindən rəğbətlə qarşılandığını
söyləyən nazir müavini bu istiqamətdə görülən işlərdən
söz açdı. 2012-2013-cü tədris ilində, eləcə də
bütövlükdə bu günədək Dövlət Proqramı çərçivəsində
xaricdə təhsil almaq hüququ qazananların ölkələr,
ixtisaslar, təhsil səviyyələri üzrə statistik
göstəricilərini diqqətə çatdıran Qulu Novruzov onların
hər birini ayrı-ayrılıqda ətraflı şərh etdi.
Nazir müavini "Dövlət orqanlarının elektron xidmətlər
göstərməsinin təşkili sahəsində bəzi tədbirlər haqqında"
Azərbaycan Respublikasının Prezidenti cənab İlham
Əliyevin 23 may 2011-ci il tarixli 429 saylı fərmanından
irəli gələn müddəalara müvafiq olaraq yaradılan Məlumat
İdarəetmə Sisteminin əsas xüsusiyyətləri və üstünlükləri
barədə ətraflı məlumat verdi. Dövlət Proqramı
çərçivəsində xaricdə təhsil almağa göndərilmiş bütün
tələbələr haqqında zəruri məlumatları bundan sonra vahid
elektron mənbədən əldə etməyin mümkünlüyünü söyləyən
nazir müavini Məlumat İdarəetmə Sisteminin yaradılmasını
bu istiqamətdə atılan mühüm addımlardan biri olduğunu
dedi. Bildirildi ki, 2011-2012-ci tədris ilindən
etibarən xaricdə təhsil üzrə Dövlət Proqramına
ərizələrin qəbulu və digər müvafiq prosedurlar elektron
şəkildə həyata keçirilir. Beynəlxalq təcrübədən istifadə
edilərək hazırlanmış elektron ərizənin digər elektron
ərizələrdən üstün cəhəti məhz ondadır ki, bu sistemdə
ərizəçilər sənədləri Təhsil Nazirliyinə təqdim etmək
məqsədilə onlara münasib olan tarix və vaxtı özləri
seçirlər, doldurulan elektron ərizənin bir nüsxəsi isə
onların ərizədə göstərdiyi elektron poçt ünvanına
göndərilir. Məlumat İdarəetmə Sisteminin Dövlət
Proqramının icrasının daha şəffaf şəkildə yerinə
yetirilməsini təmin edəcəyini, həmçinin onun hökumətin
elektron xidmətlər strategiyası çərçivəsində həyata
keçirilməsində, tələbələrin təhsilinin
maliyyələşdirilməsi prosedurlarının sadələşdirilməsi və
operativliyin təmin olunmasında əhəmiyyətli rol
oynayacağını söyləyən Qulu Novruzov bu sistemə Dövlət
Neft Fondunun, digər müvafiq qurumların da qoşulmaq
imkanının olduğunu dedi.
Çıxışında daha sonra Dövlət Proqramına dair yeni
veb-saytın (www.xaricdetehsil.edu.gov.az) mövcud
imkanlarından danışan nazir müavini saytda
informasiyaların sosial şəbəkələr vasitəsilə
paylaşılmasının təmin olunması, müvafiq normativ-hüquqi
bazanın və təlimat xarakterli zəruri məlumatların
yerləşdirilməsi, təqaüdə layiq görülənlərlə daha
operativ ünsiyyət yaradılması və digər məsələlərin
nəzərə alındığını bildirdi.
Çıxış üçün söz alan Dövlət Neft Fondunun icraçı
direktoru Şahmar Mövsümov, rabitə və informasiya
texnologiyaları naziri Əli Abbasov, Azərbaycan
Respublikası Prezidentinin Administrasiyası rəhbərinin
müavini Novruz Məmmədov "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı"na dair Məlumat İdarəetmə Sisteminin müasir
tələblər baxımından üstün imkanlara malik olduğunu,
görülən işlərin, həyata keçirilən tədbirlərin, ilk
növbədə, şəffaflığa xidmət etdiyini bildirdilər. Xaricdə
təhsil üzrə Dövlət Proqramını ölkə başçısı cənab İlham
Əliyevin Azərbaycan gəncliyinə qayğısının təzahürü kimi
dəyərləndirən qonaqlar həmçinin bu proqram çərçivəsində
bir sıra prosedurların sadələşdirilməsi məsələlərinə də
toxundular.
Samirə KƏRİMOVA |
