|
Naxçıvan Dövlət Universiteti ilə Cənubi Koreyanın
Kimçonq Universiteti arasında tələbə mübadiləsi
başlanıldı. Bu münasibətlə keçirilən tədbirdə
universitetin rektoru, akademik İsa Həbibbəyli çıxış
edərək Cənubi Koreya ilə ölkələrarası siyasi, iqtisadi,
mədəni əlaqələrin inkişafında elmin, təhsilin və dilin
müstəsna rolundan danışdı.
 Rektor,
universitetin Cənubi Koreyanın ali təhsil ocaqları ilə
əməkdaşlığın əhəmiyyətindən, muxtar respublika
rəhbərliyinin və Cənubi Koreyanın Azərbaycandakı
səfirliyinin bu sahəyə göstərdiyi diqqət və qayğıdan
bəhs etdi. Qeyd olundu ki, Naxçıvan Dövlət Universiteti
Cənubi Koreyanın Kimçonq və Busan Kyumqsunq
universitetləri ilə hərtərəfli əməkdaşlığa malikdir və
Boloniya sisteminin prinsiplərinə uyğun olaraq Cənubi
Koreyanın Kimçonq Universiteti ilə tələbə mübadiləsinə
başlanılmışdır. Koreyanın qrant yardımı və texniki
əməkdaşlıq proqramlarını həyata keçirən KOICA dövlət
agentliyi ilə universitetə müasir informasiya
texnologiyalarının alınması, elektron idarəetmə
sisteminin yaradılması ilə bağlı birgə layihə
reallaşdırılması haqqında da məlumat verən rektor,
hazırda universitetdə 10 nəfərə yaxın koreyalı tələbənin
bakalavr, magistratura, doktrantura üzrə təhsillərini
davam etdirdiklərini vurğuladı. Qeyd olundu ki,
universitetin beynəlxalq münasibətlər və xarici dillər
fakültəsində "Koreyaşünaslıq" seçmə fənni tədris olunur.
Buradakı Cənubi Koreya Mərkəzi uğurla fəaliyyət
göstərir. Mərkəzdə Koreya dili üzrə hazırlıq
kurslarının fəaliyyət göstərməsi isə Koreya dilinin,
ədəbiyyatının, tarixinin, mədəniyyətinin öyrənilməsi
baxımından böyük önəm daşıyır. Tələbə mübadiləsi
məqsədilə Naxçıvan Dövlət Universitetindən 3 nəfər
tələbə - tərcümə (ingilis dili - Azərbaycan dili)
ixtisası üzrə birinci kurs tələbəsi Nəsir Neymətli,
hüquqşünaslıq ixtisası üzrə birinci kurs tələbəsi Əkbər
Həsənli, stomatologiya ixtisası üzrə birinci kurs
tələbəsi Şahin Tağıyev Cənubi Koreyanın Kimçonq
Universitetində 6 ay müddətində təhsillərini davam
etdirəcəklər. Həmçinin Kimçonq Universitetindən gələn 2
tələbə Lee Sumi və Jeonq Seok bakalavr pilləsində
təhsillərini bir il müddətində Naxçıvan Dövlət
Universitetində davam etdirəcək.
Koreya dili hazırlıq kurslarının müəllimi, Naxçıvan
Dövlət Universitetinin beynəlxalq münasibətlərin tarixi
və nəzəriyyəsi ixtisaslaşması üzrə magistrantı, Cənubi
Koreya vətəndaşı, ilk koreyaca-azərbaycanca danışıq
kitabçasının müəllifi Çanq Se Cunq Koreya dili hazırlıq
kursunun gedişi barədə məlumat verdi. Cənubi Koreyaya
göndərilən tələbələrin bu kurslarda fəal iştirak
etdiklərini və bir neçə tələbənin arasından
seçildiklərini vurğuladı.
Kimçonq Universitetinin tələbəsi Jeonq Seok çıxış edərək
yaxşı təhsil almaq üçün Naxçıvan Dövlət Universitetində
hər cür şərait yaradıldığını, bu universitet haqqında
Cənubi Koreyada da müsbət fikirlərin olduğunu və
təhsilini bir illik davam etdirmək üçün məhz bu
universiteti seçməsindən məmnunluq duyduğunu qeyd etdi.
Stomatologiya ixtisası üzrə birinci kurs tələbəsi Şahin
Tağıyev çıxışında tələbə mübadiləsini yüksək
qiymətləndirərək ölkəmizi Cənubi Koreyada layiqli təmsil
edəcəklərini və müvəffəqiyyətlə ali təhsil almağa
çalışacaqlarını bildirdi.
Sonda universitetin rektoru, akademik İsa Həbibbəyli
Kimçonq Universitetinin elmi əsərlər jurnalında
Azərbaycan-Cənubi Koreya əlaqələri haqqında dərc olunmuş
məqaləsini universitetdə fəaliyyət göstərən Cənubi
Koreya Mərkəzinə təqdim etdi. Sonda rektor, akademik İsa
Həbibbəyli hər iki universitetin tələbələrinə uğurlar
arzuladı.
Mina QASIMOVA,
NDU-nun Mətbuat şöbəsinin əməkdaşı |
