|
Fevralın 18-də Azərbaycan Dövlət Akademik Milli Dram
Teatrında "Dilimiz varlığımızdır" devizi altında
məktəblilər arasında ənənəvi onuncu "Ana dilimizi sevək,
sevdirək" mövzusunda respublika müsabiqəsinin yekun
mərhələsi keçirildi. 21 fevral - Beynəlxalq Ana Dili
Gününə həsr edilən müsabiqə Təhsil Nazirliyinin dəstəyi
ilə "Çağ" Öyrətim İşlətmələri Şirkətinin
Azərbaycan-Türkiyə Özəl Liseyləri Baş İdarəsi tərəfindən
təşkil olunmuşdur.
Dövlət rəsmilərinin, millət vəkillərinin, xarici
qonaqların iştirak etdikləri mərasim ulu öndər Heydər
Əliyevin və vətənimizin azadlığı uğrunda şəhid olmuş
qəhrəman oğul və qızlarımızın əziz xatirəsinin bir
dəqiqəlik sükutla yad olunması və Azərbaycanın Dövlət
himninin ifası ilə başlandı.
Açılış mərasimində çıxış edən "Çağ" Öyrətim İşlətmələri
Şirkəti Azərbaycan-Türkiyə Özəl Liseyləri Baş İdarəsinin
rəisi Məsud Kurnaz müsabiqənin təşkili və əhəmiyyətindən
söz açaraq bildirdi ki, yarışma 2004-cü ilin fevral
ayından başlayaraq hər il keçirilir və YUNESKO-nun
1999-cu il noyabr ayında çağırılmış Baş konfransının
30-cu sessiyasında təsis olunmuş, 21 fevral 2000-ci
ildən dil və mədəniyyət rəngarəngliyini qoruyub saxlamaq
üçün qeyd edilən Beynəlxalq Ana Dili Gününə həsr olunur.
Müsabiqənin keçirilməsində məqsəd keçmişdən bizə miras
qalan, ən təkmil və mükəmməl dil səviyyəsinə qalxmış,
varlığımız, milli sərvətimiz olan ana dilimizi gənc
nəslə sevdirmək və gələcək nəsillərə çatdırmaqdır.
Çıxışında ümummilli lider Heydər Əliyevin ana dilimizin
qorunmasında və inkişafındakı əvəzsiz xidmətlərini
xüsusi vurğulayan M.Kurnaz müdrik rəhbərin siyasətinin
Azərbaycan Prezidenti İlham Əliyev tərəfindən əzmlə
davam etdirildiyini bildirdi. Dilimizin inkişafı və onun
dövlət dili səviyyəsinə yüksəldilməsi məqsədi ilə
görülən işlərin, xüsusən də ümummilli lider Heydər
Əliyevin, Prezident İlham Əliyevin ana dilimizlə bağlı
imzaladıqları sənədlərin əhəmiyyətindən danışan baş
idarə rəisi bütün bunları nəzərə alan Azərbaycan-Türkiyə
Özəl Liseylərinin pedaqoji kollektivlərinin 2003-cü ildə
"Dilimiz varlığımızdır" devizi altında "Ana dilimizi
sevək, sevdirək" mövzusunda müsabiqə keçirməyi qərara
aldıqlarını söylədi. Bildirdi ki, ilk illər "Çağ"
Öyrətim İşlətmələri Şirkətinin liseylərinin və "Qafqaz"
gimnaziyasının şagirdləri arasında keçirilən müsabiqə
sonralar respublika ictimaiyyəti və pedaqoji
kollektivlərin də diqqətini cəlb etmiş və get-gedə
coğrafiyasını genişləndirərək ümumrespublika səviyyəli
bir yarışa çevrilmişdir. Müsabiqənin təşkili və
keçirilməsində Təhsil Nazirliyindən hər zaman böyük
dəstək aldıqlarını qeyd edən M.Kurnaz sayca 10-cu olan
builki müsabiqənin də üç mərhələdə (məktəbdaxili, rayon
(şəhər) respublika), qrammatika, inşa yazı, şeir,
musiqi, internet saytı kateqoriyaları üzrə təşkil
olunduğunu söylədi. Bildirdi ki, ana dilimizə sonsuz
sevgi və məhəbbət hissləri ilə keçirilən müsabiqənin
birinci və ikinci mərhələləri artıq başa çatmış, ilk
mərhələdə 1115 məktəbdən 38 min 428, ikinci mərhələdə
isə 135 şagird iştirak etmişdir. Üçüncü mərhələyə mahnı
kateqoriyası üzrə 6, şeir kateqoriyası üzrə 5,
qrammatika kateqoriyası üzrə 10, internet saytı
hazırlamaq kateqoriyası üzrə 10 nəfər şagird vəsiqə
almışdır.
M.Kurnaz diqqətə çatdırdı ki, qrammatika, inşa və
internet saytının hazırlanması kateqoriyaları üzrə final
yarışlarına da artıq yekun vurulmuş, qaliblər
müəyyənləşdirilmişdir.
Sonra şeir və mahnı kateqoriyaları üzrə final yarışması
başlandı. İştirakçılar növbə ilə səhnəyə çıxıb öz şeir
və mahnı nömrələrini ifa etdilər. Onların çıxışları
respublikamızın tanınmış dilçilərindən, ədəbiyyat,
incəsənət və mədəniyyət nümayəndələrindən,
pedaqoqlarından ibarət münsiflər heyəti tərəfindən
qiymətləndirildi. Final mərhələsinin yekunlarına görə
qrammatika kateqoriyası üzrə Bakı Özəl Türk Liseyinin
şagirdi Emin Mustafayev I, Mingəçevir Özəl Türk
Liseyinin şagirdi Üzeyir Səfərli II, Lənkəran şəhər 2
nömrəli tam orta məktəbin şagirdi Pakizə Abbasova III
yerə, inşa kateqoriyası üzrə Mingəçevir şəhər 10 nömrəli
tam orta məktəbin şagirdi Zeynəb Quliyeva I, Sumqayıt
şəhər 43 nömrəli tam orta məktəbin şagirdi Aytac
Hüseynova II, Quba Özəl Türk Liseyinin şagirdi Pərviz
Quliyev III yerə, İnternet saytı kateqoriyası üzrə
Sumqayıt şəhər 36 nömrəli tam orta məktəbin şagirdi
Türkan Heydərova I, "Dədə Qorqud" Özəl Türk Liseyinin
şagirdi Vüqar Məmmədov II, Şəki şəhər 18 nömrəli tam
orta məktəbin şagirdi Nigah Səttarov III yerə, şeir
kateqoriyası üzrə Bakı şəhər 20 nömrəli məktəb-liseyin
şagirdi Türkan Məmmədova I, Gəncə şəhər 4 nömrəli tam
orta məktəbin şagirdi Fidan Məmmədova II, Ağsu rayon 4
nömrəli tam orta məktəbin şagirdi Salatın Səmədova III
yerə, mahnı kateqoriyası üzrə isə Bakı şəhər 220 nömrəli
məktəb-liseyin şagirdi Aslan Əzimzadə I, Bərdə rayon
Yeni Əyricə kənd tam orta məktəbinin şagirdi Zaur
İsgəndərov II, Bülbül adına Orta İxtisas Musiqi
Məktəbinin şagirdi Səidə Batuşova III yerə layiq
görüldülər.
Qaliblərə qızıl, gümüş, bürünc medallarla yanaşı, pul
mükafatları və xüsusi sertifikatlar, habelə digər
hədiyyələr verildi.
Mərasimdə çıxış edən təhsil nazirinin müavini Qulu
Novruzov məktəblilərin ifalarının iştirakçılara
həyəcanlı anlar yaşatdığını söylədi. Ana dilimizin
inkişafında və dövlət dili kimi işlədilməsində ümummilli
lider Heydər Əliyevin xidmətlərini xüsusi qeyd edən
nazir müavini, məhz dilimizi böyük məhəbbətlə sevən və
mükəmməl bilən ulu öndərin sayəsində Azərbaycan dilinin
bütün dünyada tanındığını bildirdi. Diqqətə çatdırdı ki,
ana dilimizin inkişafına, təkmilləşməsinə Azərbaycan
Prezidenti İlham Əliyev tərəfindən böyük diqqət və qayğı
göstərilir. Belə müsabiqələrin dilimizin sevilməsində və
dərindən öyrənilməsində mühüm əhəmiyyət kəsb etdiyini
vurğulayan təhsil nazirinin müavini bu ənənəni yaşadan
"Çağ" Öyrətim İşlətmələri Şirkətinin rəhbərliyinə öz
adından və təhsil naziri Misir Mərdanovun adından dərin
minnətdarlığını bildirdi.
Tədbirdə söz alan "Çağ" Öyrətim İşlətmələri Şirkəti
İdarə Heyətinin sədri Ənvər Özərən, tanınmış pedaqoq,
professor Zahid Qaralov, Qafqaz Universitetinin rektoru
Ahmet Saniç, Azərbaycan Turizm İnstitutunun rektoru
Cəfər Cəfərov, ADPU-nun prorektoru Vilayət Əliyev və
başqaları müsabiqənin yüksək səviyyədə təşkilini,
şagirdlərin mahir ifalarını qeyd edib qalibləri təbrik
etdilər, belə yarışmaların böyük tərbiyəvi əhəmiyyət
daşıdığını vurğuladılar, müsabiqənin təşkilində əməyi
olan hər kəsə minnətdarlıqlarını bildirdilər.
Yusif ƏLİYEV |
