|
 Şagirdlərin
elmi biliklərinin və təfəkkürünün inkişafı çətin və
çoxşaxəli proses olduğu üçün onu yalnız sinif dərs
sistemi ilə məhdudlaşdırmaq olmaz. Sinifdənxaric və
məktəbdənkənar tədbirlər sinif dərs sistemini
tamamlamalı və sinifdə həyata keçirilməsi mümkün olmayan
bəzi məsələləri reallaşdırmalıdır. Sinifdənxaric və
məktəbdənkənar tədbirlər yalnız öz formasına görə tədris
prosesindən fərqlənir, məzmununa görə isə bu proseslə
birləşir.
Məhz bu baxımdan da sinifdənxaric tədbirlər məktəbdə
təlim-tərbiyə prosesinin ayrılmaz hissəsidir. O,
şagirdlərin biliklərini dərinləşdirmək, dünyagörüşünü
genişləndirmək, şagirdlərə fənn proqramında və
dərsliklərdə olmayan məlumatları çatdırmaq, həmçinin
şagirdlərdə öyrənilən fənnə maraq yaratmağa xidmət edir.
Sinifdənxaric tədbirlər içərisində fənn aylıqları və
həftəliklərinin xüsusi yeri var. Şagirdlərin bilik və
bacarıqlarının formalaşmasında xüsusi rolunu, fənlərin
tədrisinə göstərə biləcəyi köməyi və şagirdlərdə fənlərə
daha çox maraq oyadacağını nəzərə alaraq, Bakı Slavyan
Universiteti Məktəb-Lisey Kompleksinin rəhbərliyi
kompleksdə fənn həftələrinin keçirilməsini qərara aldı.
Məqsəd fənlərin tədrisi vəziyyətini daha da yüksəltmək,
qabaqcıl müəllimlərin təcrübəsini öyrənmək, şagirdlərin
bilik və bacarıqlarını nümayiş etdirməyə meydan vermək
idi. İlk fənn həftəliyi "elmlərin şahı" olan riyaziyyat
həftəsi ilə başladı.
Həftə çərçivəsində keçiriləcək tədbirlərin
planlaşdırılması və həyata keçirilməsi kompleksin
riyaziyyat və informatika kafedrasına həvalə olundu.
Kafedra iclası çağırıldı, həftəlik çərçivəsində
görüləcək işlər planlaşdırıldı və kafedranın
müəllimlərinə həvalə olundu.
Həftə şagirdlərin hazırladıqları divar qəzetləri və
bülletenlərin nümayişi ilə başladı. Həftə ərzində
şagirdlər riyaziyyata aid tarixi materiallar, dünyanın,
o cümlədən Azərbaycanın məşhur riyaziyyatçıları,
riyaziyyatın tətbiqi sahələri haqqında məlumatlar
topladılar, dərslərdə bu barədə fikir mübadilələri
apardılar. Dünya elminə qiymətli töhfələr vermiş
Azərbaycan alimləri - Nəsirəddin Tusi, Əbülhəsən
Bəhmənyar və Lütfi-Zadənin həyatı, fəaliyyəti ilə bağlı
məlumatlar şagirdlər üçün xüsusilə qiymətli idi.
Siniflərdə müxtəlif tipli əyləncəli məsələlər, riyazi
rebuslar, krossvordlar həll olundu, müzakirə edildi,
viktorinalar, bilik yarışları təşkil edildi. Bu
məlumatların əksəriyyəti divar qəzetləri və
bülletenlərdə əks olunmaqla kompleksin girişini,
dəhlizləri, sinif otaqlarını bəzədi, şagirdlərin
riyaziyyata aid yaradıcı əl işləri sərgiləndi. Buradakı
məlumatlar, maraqlı və əyləncəli, məntiqi suallar təkcə
kompleksin müəllim-şagird kollektivinin deyil,
valideynlərin, kompleksdə pedaqoji təcrübədə olan
tələbələrin və başqa ziyarətçilərin də böyük marağına
səbəb oldu.
Şagirdlərin marağı və bu tədbirlərdə aktiv iştirak etmək
həvəsi növbəti günlərdə bir-birindən maraqlı
viktorinalar, riyaziyyat gecələrinin bir-birini əvəz
etməsi ilə nəticələndi. Rus bölməsinin V-VI sinifləri
fənn müəllimi Sevil Ələsgərovanın, VII və XI sinifləri
isə fənn müəllimi İradə İbrahimovanın rəhbərliyi altında
rəngarəng səhnələr təqdim etdilər. BSU Məktəb-Lisey
Kompleksində start götürən fənn həftəsi çərçivəsində
növbəti tədbir kompleksin müəllimi Afaq Əşrəfova
tərəfindən təşkil olundu. Tədbir 31 yanvar tarixində
kompleksin akt zalında baş tutdu. Burada X "n" və VIII
"c" sinifləri iştirak edərək öz məharətlərini nümayiş
etdirdilər. Tədbiri izləyənlər arasında BSU Məktəb-Lisey
Kompleksinin direktoru, professor T.Cəfərov və direktor
müavinləri də var idi.
Azərbaycan bölməsinin şagirdləri tərəfindən fənn
müəllimi Gülnaz Babayevanın ümumi rejissorluğu ilə
hazırlanmış "Riyaziyyat gecəsi" daha təmtəraqlı və
yaddaqalan idi. Burada bilik yarışlarından tutmuş
musiqili şou nömrələrə qədər çıxışlar yer almışdı.
Yarışlara Bakı Modern Məktəbinin (Baku Modern School)
5-ciləri də qoşulmuşdu. Qonaqlara kitab hədiyyələri və
təşəkkürnamələr verildi.
Növbəti - rus dili və ədəbiyyat fənn həftəsi öz
başlanğıc tədbirləri ilə riyaziyyat həftəsinə qanad
verdi.
Həftənin yekunlarına həsr olunmuş müşavirədə riyaziyyat
və rus dili üzrə dərs dinləmələri müzakirə olundu.
Aygün QƏDİROVA,
BSU Məktəb-Lisey Kompleksinin
riyaziyyat müəllimi |
