|
 Fevralın
8-də Təhsil Nazirliyində "Səmərəli məktəb" layihəsinin
başa çatmasına həsr olunmuş hesabat iclası keçirildi.
Təhsil Nazirliyinin müvafiq qurumlarının rəhbərlərinin,
"Müasir Təhsil və Tədrisə Yardım Mərkəzi" İctimai
Birliyinin əməkdaşlarının, layihədə iştirak edən
məktəblərin direktorlarının qatıldığı tədbiri təhsil
naziri Misir Mərdanov açaraq bildirdi ki, bu gün
yekunlarını müzakirə etməyə yığışdığımız "Səmərəli
məktəb" layihəsi, Dünya Bankının maliyyə dəstəyi ilə
reallaşdırılan Təhsil Sektorunun İnkişafı üzrə İkinci
Layihə çərçivəsində Təhsil Nazirliyi ilə Müasir Təhsil
və Tədrisə Yardım Mərkəzi arasında bağlanmış müqaviləyə
əsasən həyata keçirilmişdir. Son iki il ərzində
reallaşdırılan layihə haqqında iclas iştirakçılarına
ətraflı məlumat verən nazir qeyd etdi ki, layihənin əsas
məqsədi məktəblərdə idarəetmənin təkmilləşdirilməsi,
müəllimlərin peşəkarlıq səviyyəsinin yüksəldilməsi
sahəsində məktəb əsaslı təlimlər sisteminin yaradılması,
məktəb-valideyn əlaqələrinin gücləndirilməsidir. Layihə
3-ü Bakıdan, 9-u regionlardan olmaqla 12 məktəbi əhatə
etmişdir.
Layihənin 6 komponent üzrə həyata keçirildiyini söyləyən
təhsil naziri hər komponent üzrə görülmüş işləri diqqətə
çatdırdı. Qeyd etdi ki, layihənin "Məktəbdə müəllimlərin
peşəkarlıq səviyyəsinin yüksəldilməsi" adlanan birinci
komponenti çərçivəsində "Tənqidi təfəkkürün əsasları"
mövzusunda 168 nəfər müəllim, "Fəal təlim üsulları"
mövzusunda 247 nəfər müəllim, "Demokratiya müzakirələri"
mövzusunda 169 nəfər müəllim, "Ünsiyyət vərdişləri"
mövzusunda 218 nəfər müəllim və valideyn, "Müəllimlərin
peşəkar inkişafı" mövzusunda 36 nəfər müəllimin iştirakı
ilə təlim, seminar və "dəyirmi masa"lar keçirilmişdir.
Layihənin ikinci - "Tədrisin keyfiyyətinin
yüksəldilməsi" komponenti çərçivəsində məktəblərdə
davamlı dərsdinləmələr və onların müzakirəsi təşkil
olunmuş, şagirdlər və valideynlər üçün "Ünsiyyət
vərdişləri" mövzusunda təlim, şagirdlərin iştirakı ilə
"Təhsildə sosial ədalət, mobil telefon vasitəsilə
sosialyönümlü foto və videoçarxların hazırlanması"
mövzusunda müzakirə və sorğu aparılmışdır.
Layihənin üçüncü komponenti olan "Əlverişli məktəb
mühitinin yaradılması və inklüziv tədris üsulları" ilə
bağlı görülmüş işlərə diqqət çəkən nazir bu komponent
çərçivəsində Latviyadan beynəlxalq məsləhətçinin dəvət
olunduğunu, bir qrup müəllim və direktorun həmin ölkəyə
təlim səfərinin təşkil edildiyini, təlim səfərindən
sonra məktəblərdə "İnklüziv tədris" mövzusunda
təqdimatlar və "dəyirmi masa"ların, eləcə də şagirdlər
arasında "Məktəb mühiti" adlı anonim sorğunun
keçirildiyini söylədi.
Nazir bildirdi ki, layihənin "Məktəbin təşkilati
mədəniyyətinin inkişaf etdirilməsi" adlanan 4-cü
komponenti çərçivəsində məktəblərdə şəxsiyyətlərarası
münasibətlər mütəxəssislər tərəfindən öyrənilmiş, məktəb
direktorları üçün təşkilati mədəniyyətin inkişaf
etdirilməsi üzrə təlim-seminar keçirilmiş, müzakirələr
aparılmış, şəxsiyyətlərarası münasibətlərin optimal
qurulması sahəsində tövsiyələr hazırlanmışdır.
Layihənin "Kitabxana və İKT-dən istifadə" məsələlərini
əhatə edən 5-ci komponentinə müvafiq olaraq layihəni
əhatə edən məktəblərdə kitabxanaların vəziyyətinin
öyrənildiyi, kitabxanaçılar üçün xüsusi təlim paketi
hazırlandığı və təlimlər keçirildiyi, onlara peşə
bacarıqları ilə yanaşı, İKT-dən istifadə bacarıqları da
aşılandığı diqqətə çatdırıldı.
Layihənin son - "Məktəbin səmərəli idarəedilməsi"
komponenti çərçivəsində də xeyli iş görüldüyünü deyən
nazir bu işlər nəticəsində idarəetmənin vəziyyətinin
öyrənildiyini, diaqnostika mərhələsində məktəb
rəhbərliyi ilə müsahibələr aparıldığını, təhlil əsasında
direktorlar üçün təlim materialları hazırlandığını qeyd
etdi.
Layihənin icrası yönündə görülmüş işlərin, xüsusən də
keçirilmiş seminarların, məktəbin
özünüqiymətləndirməsinə dair hazırlanmış sənədin təlim
səfərlərinin, müvafiq maarifləndirmə tədbirlərinin
təşkilinin əhəmiyyətini yüksək qiymətləndirən nazir
hazırkı informasiya əsrində məktəbin missiyasının əsaslı
şəkildə dəyişdiyini vurğulayaraq dünyanın inkişaf
tendensiyalarından geri qalmamaq üçün müasir məktəbin
sadalanan bütün istiqamətlərdə fəal iş aparmalı olduğunu
diqqətə çatdırdı.
İclasda "Müasir Təhsil və Tədrisə Yardım Mərkəzi"
İctimai Birliyinin təhsil siyasəti üzrə proqram
direktoru, "Səmərəli məktəb" layihəsinin rəhbəri Elmina
Kazımzadə layihə haqqında ətraflı məlumat verdi.
E.Kazımzadə bildirdi ki, layihənin əsas məqsədi tədris
ocaqlarının davamlı inkişafını təmin etmək üçün
müəllimlərin peşəkarlığının artırılmasından ibarətdir.
Layihənin 12 məktəbi əhatə etdiyini, lakin hazırlanmış
"Səmərəli məktəb" multimedia diskindən, müvafiq
vəsaitlərdən digər təhsil ocaqlarının da istifadə
etməsinin mümkün olduğunu söyləyən E.Kazımzadə
başladıqları işin pilot məktəblərdə davam etdiriləcəyinə
və digər ümumtəhsil müəssisələrinə yayılacağına ümid
etdiyini söylədi.
"Səmərəli məktəb" layihəsinin əlaqələndiricisi Vəfa
Yaqublu layihə çərçivəsində görülmüş işlər və onların
nəticələri mövzusunda geniş təqdimat etdi.
Sonra layihədə iştirak edən ümumtəhsil müəssisələrindən
Şirvan şəhər 16 nömrəli tam orta məktəbin direktoru
Çingiz Şirəliyev, Bakıdakı 287 nömrəli "Zəkalar"
liseyinin direktoru Aygün Əhmədli, Lənkəran şəhər 6
nömrəli tam orta məktəbin direktoru Akif Xalıqov,
Sumqayıt şəhəri Təbiət elmləri təmayüllü gimnaziyanın
direktoru Nizami Əhmədov "Məktəb daxilində müəllimlərin
fəaliyyəti və peşəkarlıq səviyyəsinin yüksəldilməsi",
"Məktəbin səmərəli idarə edilməsi və birgə rəhbərlik",
"Məktəb mühitinin inkişaf etdirilməsi və inklüziv tədris
üsulları", "Səmərəli məktəb" layihəsinin akkreditasiya
prosesində rolu" mövzularında çıxış etdilər.
Təhsil naziri Misir Mərdanov pilot olaraq həyata
keçirilən "Səmərəli məktəb" layihəsinin məktəbin davamlı
inkişaf istiqamətlərinin müəyyən edilməsinə, ölkədə
yaxşı məktəb modelinin formalaşmasına təkan verəcəyinə
ümid etdiyini bildirdi. Layihədə iştirak etmiş
məktəblərin əldə etdikləri təcrübədən digər təhsil
müəssisələrinin yararlanmasının əhəmiyyətinə toxunan
nazir bunun həm tədrisin keyfiyyətcə yüksəldilməsi, həm
də məktəb idarəçiliyinin təkmilləşdirilməsi baxımından
əhəmiyyətli olacağına əminliyini ifadə etdi.
Sonda layihənin yekunlarına dair müzakirələr aparıldı,
müvafiq təkliflər səsləndirildi və iştirakçıları
maraqlandıran suallar cavablandırıldı.
Yusif ƏLİYEV |
