|
Hər il olduğu kimi, bu ilin fevral ayında da Parisin
Dövlət Şərq Dilləri və Sivilizasiyaları İnstitutunda
(İNALCO) Açıq Qapı günü keçirilmişdir. Tədbir Fransa
ictimaiyyətini İNALCO-da tədris edilən müxtəlif
xalqların dili və mədəniyyəti ilə tanış etmək məqsədini
daşıyır.
Tədbirdə İNALCO-nun Azərbaycan dili müəllimi Aygün
Eyyubova Azərbaycanın və Azərbaycan dilinin təqdimatını
keçirmişdir.
Təqdimatda ölkəmiz, onun qədim tarixi, zəngin və
çoxşaxəli mədəni irsi, sürətli iqtisadi inkişafı, Cənubi
Qafqaz regionunda aparıcı dövlət olması haqqında
fransızlara ətraflı məlumat verilmiş, muğam musiqisi
nümunələri səsləndirilmişdir. Daha sonra A.Eyyubova
iştirakçıları Azərbaycan dilinin əsas xüsusiyyətləri ilə
tanış etmişdir.
Tədbirdə ölkəmizin Fransadakı səfirliyi tərəfindən
təqdim edilən Azərbaycana aid kitablar və broşürlərdən
ibarət sərgi nümayiş etdirilmişdir.
Açıq Qapı günü institutun prezidenti Jak Leqranın
Auditorium zalında çıxışı ilə yekunlaşmışdır. Təhsil
ocağının yaranma tarixindən bəhs edən Jak Leqran
İNALCO-nun dünyanın ən çox dilini və mədəniyyətini
tədris edən ali məktəb olduğunu və bu dillər arasında
Azərbaycan dilinin xüsusi yer tutduğunu diqqətə
çatdırmışdır.
AzərTAc |
